មន្ត្រីសាលាក្រុងបាត់ដំបង មានជំហរធ្វើឱ្យកន្លែងធ្វើការរបស់ខ្លួនគ្មានប្លាស្ទិក

2019-11-20 03:04:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្រ្តីសាលាក្រុងបាត់ដំបង ខេត្តបាត់ដំបង បានគាំទ្រ និងបង្ហាញការតាំងចិត្តខ្ពស់ចង់ឱ្យកន្លែងធ្វើការរបស់ខ្លួនគ្មានការប្រើប្រាស់ដបទឹកសុទ្ធប្លាស្ទិក។ ការលើកឡើងបែបនេះរបស់គណៈអភិបាល និងមន្រ្តីរាជការក្រុងបាត់ដំបង ក្នុងពេលជួបប្រជុំកាលថ្ងៃទី១៩ ខែវិច្ឆិកា ឆ្នាំ ២០១៩ ជាមួយថ្នាក់ដឹកនាំនិងមន្ត្រីសាលាក្រុងបាត់ដំបង ខេត្តបាត់ដំបង ដឹកនាំដោយ លោក ជា សំអាង អនុរដ្ឋលេខាធិការក្រសួងបរិស្ថាន និងដោយមានការចូលរួមពីថ្នាក់ដឹកនាំនៃអគ្គនាយកដ្ឋានចំណេះដឹង និងព័ត៌មានបរិស្ថាន និងមន្ទីរបរិស្ថានខេត្តបាត់ដំបង។

រូបភាព៖ ក្រសួងបរិស្ថាន

អាជ្ញាធរក្រុងបាត់ដំបង ក៏ដូចជាជារដ្ឋបាលសាលាខេត្តបាត់ដំបង បានគាំទ្រយុទ្ធនាការកាត់បន្ថយការប្រើប្រាស់ប្លាស្ទិក និងការផ្សព្វផ្សាយកន្រ្តកបរិស្ថាន រៀបចំឡើងដោយ អគ្គនាយកដ្ឋានចំណេះដឹង និងព័ត៌មានបរិស្ថាន ក្រសួងបរិស្ថាន នៅតាមផ្សារនានានៅក្នុងក្រុងបាត់ដំបង ខេត្តបាត់ដំបងផងដែរ។

លោក ជា សំអាង អនុរដ្ឋលេខាធិការក្រសួងបរិស្ថាន បានថ្លែងអំណរគុណចំពោះការគិតគូរខ្ពស់ចំពោះការធ្វើឱ្យកន្លែងគំរូនៃការគិតគូដល់មេត្រីភាពបរិស្ថាន ជាពិសេសការចូលរួមធ្វើឱ្យទីក្រុងចាប់ផ្ដើមកាត់បន្ថយការប្រើប្រាស់ប្លាស្ទិក។ លោកក៏បានលើកទឹកចិត្តដល់គណៈអភិបាល និងមន្រ្តីរាជការទាំងអស់របស់សាលាក្រុងបាត់ដំបង ចូលរួមចំពោះកិច្ចគាំពារបរិស្ថាន ជាពិសេសការចូលរួមកាត់បន្ថយសំណល់ប្លាស្ទិក ដើម្បីគ្មានការបន្សល់ទុកមរតកនៃការបំពុលដោយសំណល់ប្លាស្ទិកដល់កូនចៅជំនាន់ក្រោយ។

រូបភាព៖ ក្រសួងបរិស្ថាន

លោក ជា សំអាង បានបញ្ជាក់ដែរថា ការប្តេជ្ញាចិត្តរបស់គណៈអភិបាលក្រុងបាត់ដំបង បានសម្តែងឱ្យឃើញពីការគាំទ្រដល់ការចូលរួមអនុវត្តកម្មវិធីកាត់បន្ថយប្លាស្ទិកនៅកម្ពុជា។ ជាមួយនឹងការចូលរួមនេះ លោកក៏មានការលើកទឹកចិត្តផ្តល់ការសហការការផ្គត់ផ្គង់សម្ភារៈផលិតទឹកស្អាតនៅសាលាក្រុងបាត់ដំបង ដើម្បីផ្តល់លទ្ធភាពមន្រ្តីរាជការទាំងអស់នៅសាលាក្រុងបានទទួលទឹកស្អាតអាចបរិភោគបាន។ ជាមួយគ្នានេះ លោក ជា សំអាង និងប្រតិភូ បានផ្តល់ដបទឹកបរិស្ថាន ដែលជួយឱ្យមន្រ្តីសាលាក្រុងអាចប្រើប្រាស់ច្រើនយ៉ាង និងអាចដាក់ទឹកបរិភោគបានគ្រប់ពេលពីម៉ាស៊ីចម្រោះទឹក៕

អត្ថបទ៖ ម៉េងងី