ក្នុងខែ​វិច្ឆិកា ឆ្នាំ​២០១៩នេះ ចិន និង​អាមេរិក បាន​បញ្ជូន​នាវា​ផ្ទុក​យន្តហោះ និង​នាវាចម្បាំង​របស់ខ្លួន​ចូលក្នុង​សមុទ្រ​ចិនខាងត្បូង ដែលកំពុងមានជម្លោះ ប៉ុន្តែនាវាប្រទេសទាំង២ សុទ្ធតែត្រូវបានឃ្លាំមើលដោយ​ប្រយ័ត្ន​ប្រយែង​បំផុត។

កាលពីថ្ងៃទី១៨ ខែវិច្ឆិកា នាវាផ្ទុក​យន្តហោះ​ចិន បាន​ធ្វើដំណើរ​ទៅកាន់​សមុទ្រ​ចិន​ខាងត្បូង ដោយ​ដោយឆ្លងកាត់​ច្រកសមុទ្រ​តៃវ៉ាន់ ដើម្បី​ធ្វើការសាកល្បងវិទ្យាសាស្រ្ត និង​ហ្វឹកហាត់​ជាធម្មតា។ ប៉ុន្តែទាហានជើងទឹកចិនថា ការបញ្ជូននាវានេះ មិនមានគោលដៅ​លើប្រទេសណាមួយ ហើយក៏មិនទាក់ទង​នឹង​ស្ថានភាព​បច្ចុប្បន្ន​នេះដែរ។

យ៉ាងណាមិញ ក្រសួង​ការពារជាតិតៃវ៉ាន់ បាន​ឱ្យដឹងថា នាវាផ្ទុកយន្តហោះចិន (Type 001A) បាន​បរឆ្លងកាត់​សមុទ្រតៃវ៉ាន់ បន្ទាប់ពីចេញមកពី​សមុទ្រចិនខាងកើត ហើយ​ត្រូវបាន​តាមដាន​យ៉ាងយកចិត្តទុកដាក់ពី​នាវាអាមេរិក និង​ជប៉ុន។ តៃវ៉ាន់​បញ្ជាក់​ថា ដំណើររបស់នាវាចិន ត្រូវបាន​ត្រួតពិនិត្យ​យ៉ាងពេញលេញ ដើម្បី​ធានា​ដល់​សន្តិសុខជាតិ និង​រក្សា​ស្ថិរភាព និង​សន្តិភាព​ក្នុងតំបន់។

ដោយឡែក​សម្រាប់អាមេរិកវិញ គឺបាន​បញ្ជូន​នាវាចម្បាំង USS Gabrielle Egiffords និង​នាវាពិឃាដ​ Wayne E. Meyer ចូលកាន់សមុទ្រចិនខាងត្បូង ជិត​ប្រជុំកោះ​ដែល​គ្រប់គ្រងដោយចិន កាលពីថ្ងៃទី២០ និង ២១ ខែវិច្ឆិកា។

អ្នកនាំពាក្យ​កងនាវាទី៧ នៃទ័ពជើងទឹកអាមេរិក បាន​បញ្ជាក់​ថា បេសកកម្មនេះ គឺ​ផ្អែកទៅលើច្បាប់ និង​បង្ហាញពីការតាំងចិត្តរបស់ខ្លួននូវសិទ្ធិ សេរីភាព អំពីការ​ប្រើប្រាស់​យ៉ាងពេញលេញ​នូវ​ផ្លូវ​សមុទ្រ និង​អាកាស​ក្នុងសមុទ្រចិនខាងត្បូង។

ចំពោះ​ដំណើរ​របស់​នាវាអាមេរិក ត្រូវ​បាន​យោធាចិនឱ្យដឹងថា ខ្លួន​បានតាមដាន​យ៉ាងយកចិត្តទុកដាក់ និង​ជំរុញ​ឱ្យក្រុងវ៉ាស៊ីងតោន បញ្ឈប់​សកម្មភាព​ដ៏គគ្លើននេះ៕