ទំនិញសំខាន់ដែលកម្ពុជា-កូរ៉េ នាំចេញនាំចូលពីគ្នាទៅវិញទៅមក
- 2019-11-25 08:29:59
- ចំនួនមតិ 0 | ចំនួនចែករំលែក 0
ទំនិញសំខាន់ដែលកម្ពុជា-កូរ៉េ នាំចេញនាំចូលពីគ្នាទៅវិញទៅមក
ចន្លោះមិនឃើញ
នៅក្នុងឆ្នាំ២០១៨កន្លងទៅ ទំហំពាណិជ្ជកម្មនៃប្រទេសទាំងពីរ បានកើនឡើងជាលំដាប់ គឺមានទំហំប្រមាណ ៧៥៦លានដុល្លារ ដោយកើនប្រមាណ ១៤,៦៩ភាគរយ បើធៀបនឹងឆ្នាំ២០១៧។ នេះបើតាមសេចក្តីប្រកាសព័ត៌មានស្តីពីពិធីចុះហត្ថលេខារវាងលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា និងលោកស្រី Yoo Myung-Hee រដ្ឋមន្រ្តីពាណិជ្ជកម្មកូរ៉េ លើសេចក្តីថ្លែងការណ៍រួមស្តីពីការចាប់ផ្តើមសិក្សាលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-សាធារណរដ្ឋកូរ៉េ នៅថ្ងៃទី២៥ ខែវិច្ឆិកា ឆ្នាំ២០១៩។
ទំនិញនាំចេញសំខាន់ៗរបស់កម្ពុជា ទៅកូរ៉េរួមមាន អាវយឺត សម្លៀកបំពាក់បុរស គ្រឿងអេឡិចត្រូនិក ស្បែកជើង វ៉ាលី កម្ទេចអាលុយមីញ៉ូម ភេសជ្ជៈ សម្ភារពេទ្យ (ចេសវះកាត់) តង់ និងកៅស៊ូធម្មជាតិ។ ទំនិញនាំចូលសំខាន់ៗរបស់កម្ពុជា ពីកូរ៉រួមមាន រថយន្តដឹកទំនិញ ក្រណាត់ចាក់ ទឹករ៉ែធម្មជាតិ ភួយ គ្រឿងអេឡិចត្រូនិច គ្រឿងចក្រ (ប៊ុលដូហ្សែ) បន្ទះឬសន្លឹកនីកែល ស្បែកពីសត្វចៀមកែច្នៃរួច ក្រណាត់ជ្រលក់ពណ៌ និងផលិតផលថែរក្សាសម្រស់។
ក្រសួងពាណិជ្ជកម្មរំពឹងថា កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ នឹងជួយពង្រឹងទំនាក់ទំនង និងពង្រីកទំហំពាណិជ្ជកម្មនៃប្រទេសទាំង២បន្ថែមទៀត ព្រមទាំងបង្កើតឱកាសការងារក្នុងស្រុក ការនាំចេញសេវា និងពង្រីកវិនិយោគបន្ថែម ដែលនឹងចូលរួមសំខាន់ក្នុងការអភិវឌ្ឍសេដ្ឋកិច្ចជាតិ និងផ្តល់ផលប្រយោជន៍ដល់ប្រជាជននៃប្រទេសទាំង២ផងដែរ៕