អាល្លឺម៉ង់ផ្តល់លុយជាង ២លានដុល្លារឲ្យគណៈកម្មការទន្លេមេគង្គកម្ពុជា

2019-12-16 01:44:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋាភិបាលប្រទេសអាល្លឺម៉ង់បានផ្តល់ថវិកាបន្ថែមចំនួន ២លានអឺរ៉ូ (ប្រមាណ ២,២លានដុល្លារ អាមេរិក) ឲ្យទៅគណៈកម្មការទន្លេមេគង្គ (ដែលហៅកាត់ថា MRC) ដើម្បីបង្កើនកិច្ច សហប្រតិបត្តិការ និងកិច្ចសន្ទនាធនធានទឹកឆ្លងដែន និងផ្តល់ការគាំទ្រដល់កិច្ចខិតខំប្រឹងប្រែងនានា ក្នុងការពិនិត្យតាមដានផលប៉ះពាល់បរិស្ថានឆ្លងដែនពីទំនប់វារីអគ្គិសនីតាមដងទន្លេនៃទន្លេមេគង្គក្រោម។ នេះបើយោងតាមសេចក្តីបប្រកាសព័ត៍មានរបស់គណៈកម្មការទន្លេមេគង្គកាលពីថ្ងៃទី១៣ ខែធ្នូ ឆ្នាំ២០១៩។

គណៈកម្មការទន្លេមេគង្គបានបន្តថា កិច្ចព្រមព្រៀងផ្តល់ថវិកានេះត្រូវបានចុះហត្ថលេខាដោយ លោក អាន ពេជ្រហត្ថដា នាយកប្រតិបត្តិលេខាធិការដ្ឋាន MRC និងលោក យិនស៍ លុធឃិនហែម (Jens Lütkenherm) ឯកអគ្គរដ្ឋទូតប្រទេស អាល្លឺម៉ង់ប្រចាំប្រទេសឡាវ។ ក្នុងពិធីចុះហត្ថលេខាដែលបានប្រព្រឹត្តទៅនៅទីក្រុងវៀងចន្ទ នាថ្ងៃទី១៣ ខែធ្នូ។

មូលនិធិបន្ថែមនេះ បានធ្វើឲ្យការចូលរួមចំណែកថវិការបស់ប្រទេសអាល្លឺម៉ង់សម្រាប់ MRC កើនដល់ចំនួន ៦,៤៥លានអឺរ៉ូសម្រាប់ការអនុវត្តផែនការយុទ្ធសាស្ត្របច្ចុប្បន្ន ឆ្នាំ២០១៦-២០២០ និងការចាប់ផ្តើមផែនការថ្មី ឆ្នាំ២០២១-២០២៥។ ក្នុងន័យបញ្ជាក់ជាថ្មីពីភាពជាដៃគូដ៍យូរអង្វែង របស់ប្រទេសអាល្លឺម៉ង់នឹងគណៈកម្មការទន្លេមេគង្គ មូលនិធិនេះមានគោលបំណងជំរុញកិច្ចសន្ទនា និងកិច្ចសហប្រតិបត្តិការលើការរៀបចំផែនការ និងគ្រប់គ្រងធនធានទឹកឆ្លងដែនក្នុងចំណោមប្រទេសតាមដងទន្លេមេគង្គក្រោម ដែលរួមមានប្រទេសកម្ពុជា ឡាវ ថៃ និងវៀតណាម។

សម្រាប់រយៈពេល ៣ឆ្នាំ (២០១៩-២០២១) ជំនួយឥតសំណងនេះ មានគោលបំណងលើកកម្ពស់កិច្ចខិតខំប្រឹងប្រែង ក្នុងការពិនិត្យតាមដានផលប៉ះពាល់បរិស្ថានឆ្លងដែន ពីទំនប់វារីអគ្គិសនីតាមដងទន្លេមេ ដែលបានសាងសង់រួចរាល់ក្នុងទន្លេមេគង្គក្រោមរួមមានទំនប់សាយ៉ាបូរី និងដនសាហុង និងផ្តល់នូវវិធាននានា ដើម្បីកាត់បន្ថយផលប៉ះពាល់តាមរយៈកម្មវិធីពិនិត្យតាមដានបរិស្ថានរួមរបស់ MRC។

លោក អាន ពេជ្រហត្ថដា បានលើកឡើងថា «ការគាំទ្ររបស់ប្រទេសអាល្លឺម៉ង់មកដល់ចំពេលដ៍សំខាន់ គឺពេលដែលទន្លេមេគង្គកំពុងប្រឈមនឹងការថ្លឹងថ្លែងដ៏ពិបាក រវាងការង្កើនការអភិវឌ្ឍក្នុងវិស័យថាមពល ដឹកជញ្ជូន និងកសិកម្ម និងផលប៉ះពាល់លើបរិស្ថាន និងការប្រកបរបរចិញ្ចឹមជីវិតរបស់ប្រជាជនក្នុងស្រុក»៕

អត្ថបទ៖ កុសល