លោក ព្រីង ច័ន្ទ​បុត្រ ចេញ​មក​ជម្រះ​រឿង ក្រោយ​នារី​ម្នាក់​ចោទ​លោក​ជំពាក់​លុយ​មិន​សង

  • 2019-12-27 07:51:02
  • ចំនួនមតិ 0 | ចំនួនចែករំលែក 0

ចន្លោះមិនឃើញ


បន្ទាប់​ពី​​ម្សិលមិញ​នេះ​ ត្រូវ​នារី​ម្នាក់​ដែល​ប្រើ​គណនី​ហ្វេសប៊ុក Roselyne Delva បាន​បើក​ការ​វាយ​ប្រហារ​ខ្លួន​ថា បាន​ជំពាក់​ប្រាក់​នាង ហើយ​ព្យាយាម​គេច​វេស​មិន​សង ធ្វើ​ឲ្យ​មាន​ការ​ភ្ញាក់​ផ្អើល​នោះ នៅ​ថ្ងៃ​នេះ សាមី​ខ្លួន​ខាង​ប្រុស គឺ​អតីត​តារា​សម្ដែង ព្រីង ច័ន្ទ​បុត្រ ថា​បាន​ចេញ​មក​ឆ្លើយ​តប ដោយ​លើក​ឡើង​ថា​ទាំង​នោះ​មិន​មែន​ជា​ការ​ពិត​នោះ​ទេ។

នៅ​ម្សិលមិញ​នេះ​ហ្វេសប៊ុក Roselyne Delva ដែល​ដំបូង​ឡើយ​មិន​ដឹង​ថា​មាន​ទំនាក់ទំនង​អ្វី​ជាមួយ​អតីត​តារា​សម្ដែង បាន​ចេញ​មក​វាយ​ប្រហារ​លោក ព្រីង ច័ន្ទ​បុត្រ ថា តារា​ប្រុស​រូប​នេះ បាន​ជំពាក់​ប្រាក់​នាង ប៉ុន្តែ​បាន​ព្យាយាម​គេច​វេស​មិន​សង ហើយ​ថែម​ទាំង​គំរាម និង​ម៉ាក់​ងាយ​នាង​ទៀត។ យ៉ាង​ណា​ក៏​ដោយ តួ​ប្រុស​ក្នុង​បទ​ចម្រៀង​ស្នេហា​៤ដួង​របស់​ខ្មែរ បាន​អះអាង​ថា លោក​ពិត​ជា​មិន​ដែល​បាន​ខ្ចី​ប្រាក់​ពី​ឈ្មោះ Roselyne Delva នោះ​ទេ។

ប៉ុន្តែ​លោក​ថា លោក និង​នារី​ដែល​ប្រើ​គណនី​ហ្វេសប៊ុក​ឈ្មោះ Roselyne Delva នេះ គឺ​មាន​ទំនាក់ទំនង​ជាមួយ​គ្នា​មួយ​ចំនួន មុន​នឹង​មាន​រឿង​ម្សិលមិញ​នេះ​កើត​ឡើង។ លោក បុត្រ ប្រាប់​ថា តាម​ពិត​លោក និង​នារី​អាណិកជន​ខ្មែរ​រស់​នៅ​បារាំង​ខាង​លើ គឺ​ជា​អតីត​គូស្នេហ៍​នឹង​គ្នា ដោយ​បាន​ជួប​ស្គាល់​រហូត​ដល់​សេព​គប់​គ្នា​ធ្វើ​ជា​គូ​សង្សារ​អស់​រយៈ​ប្រមាណ ជិត ២​ឆ្នាំ​ចុង​ក្រោយ​នេះ​ប៉ុណ្ណោះ។

លោក ព្រីង ច័ន្ទ​បុត្រ ប្រាប់​ថា បើ​គិត​រយៈ​ពេល​ស្គាល់​គ្នា​គឺ​៣-៤​ឆ្នាំ​ហើយ ប៉ុន្តែ​ចាប់​ផ្ដើម​មាន​ទំនាក់ទំនង​ស្នេហា​នឹង​គ្នា​ចាប់​ពី​ដើម​ឆ្នាំ ២០១៨ ហើយ​នារី​ខាង​លើ​បាន​ចុះ​មក​ស្រុក​ខ្មែរ​ដើម្បី​ជួប​ជាមួយ​លោក។ ហើយ​បន្ត​បន្ទាប់​នាង​ក៏​បាន​ឡើង​មក​ស្រុក​ខ្មែរ​ម្ដង​ជា​ពីរ​ដង​ទៀត​ដែរ ដោយ​បាន​ដើរ​លេង​ជាមួយ​គ្នា​គ្រប់​ខេត្ត​ក្រុង​ទាំង​អស់​ក្នុង​នាម​ជា​សង្សារ​នឹង​គ្នា។ នៅ​ក្នុង​ការ​ដើរ​កម្សាន្ត​នោះ លោក​ប្រាប់​ថា ការ​ចំណាយ​ស្ទើរ​តែ​ទាំង​អស់ គឺ​ភាគី​នារី​ជា​សង្សារ​ជា​អ្នក​រាប់​រង។

“ជា​ធម្មតា ខ្ញុំ​អ្នក​ស្រុក​ខ្មែរ គាត់​អ្នក​ស្រុក​គេ គាត់​មក​លេង គាត់​ចំណាយ​លើ​យើង...គឺ​ស៊ី​ចាយ​ទាំង​អស់​គ្នា...និយាយ​ទៅ​មិន​ចង់​និយាយ​ផង​ទេ វា​គួរ​ឲ្យ​ខ្មាស​គេ​ដែរ យើង​ជា​ប្រុស​ណា​បង ប៉ុន្តែ​រឿង​ដល់​ដំណាក់​កាល​នេះ​ហើយ និយាយ​ឲ្យ​អស់​តែ​ម្ដង​ទៅ!”។ លោក ព្រីង ច័ន្ទ​បុត្រ ថ្លែង។

ក្រោយ​ពី​ផ្អែម​ល្ហែម​ជាមួយ​គ្នា​មួយ​រយៈ​ធំ លោក ព្រីង ច័ន្ទ​បុត្រ ប្រាប់​ថា ទំនាក់ទំនង​លោក និង​សង្សារ ក៏​ប្រែ​ប្រួល ពោល​គឺ​ឆ្ងាយ​គ្នា​បន្តិច​ម្ដងៗ ការ​ទំនាក់ទំនង​ក៏​លែង​ស្អិត​ល្មួត​ដូច​មុន ដែល​លោក​មិន​ដឹង​មក​ពី​មូលហេតុ​អ្វី​ឲ្យ​ប្រាកដ។ ប៉ុន្តែ​តាម​ការ​ប៉ាន់​ស្មាន​លោក​ថា អាច​ពី​លោក​មួយ​រយៈ​ពេល​មុន លោក​រមែង​ហូប​គ្រឿង​ស្រវឹង​ជាមួយ​មិត្តភ័ក្ដិ ហើយ​ជា​រឿយ​ៗ​បាន​និយាយ​ពាក្យ​ខ្លះ​ធ្វើ​ឲ្យ​សង្សារ​ខឹង​លោក។

តាំង​ពី​ពេល​នោះ​មក ពួក​គេ​ដាច់​ទំនាក់ទំនង​គ្នា​យូរ ស្រាប់​តែ​ក្រោយ​មក​នារី​ជា​សង្សារ ក៏​បាន​ទាក់​ទង​មក​លោក ហើយ​និយាយ​ទារ​ប្រាក់​ពី​លោក​តែ​ម្ដង ដែល​ប្រាក់​នោះ គឺ​ជា​ប្រាក់​ចាយវាយ​ទាំង​អស់​គ្នា​ពេល​នារី​ជា​សង្សារ​បាន​ចុះ​មក​ស្រុក​ខ្មែរ​ម្ដង​ៗ។ ម្ដង​ហើយ​ម្ដង​ទៀត​ភាគី​ខាង​ស្រី​នៅ​តែ​ទារ​ប្រាក់​វិញ ទើប​ឆ្លើយ​ថា លោក​នឹង​សង​វិញ ប៉ុន្តែ​ចាំ​លក់​ដី​របស់​ឪពុក​នៅ​បាវិត​ដាច់​សិន។

ក្រោយ​មក អតីត​សង្សារ​នៅ​តែ​ទាក់​ទង​និយាយ​ពី​ការ​ទារ​លុយ​ពី​លោក​នោះ លោក​ធុញ​ពេក​ក៏​មាន​ប្រើ​ពាក្យ​ធំ​មាត់​ខ្លះ​ដាក់​នាង។ "ចុះ​បើ​ទាក់​ទង​មក​លើក​ណា​ក៏​និយាយ​រឿង​លុយ​ៗៗៗ...ទាំង​ដែល​ខ្ញុំ​មិន​ខ្ចី លុយ​នោះ​គឺ​លុយ​ស៊ី​ចាយ​ទាំង​អស់​គ្នា ធុញ​ដែរ​ណា​បង អីចឹង​ខ្ញុំ​ក៏​ចេះ​ឆ្លើយ​ប៉ាត​ណា​ប៉ាត​ណី តាម​តែ​ចិត្ត​ខឹង​ទៅ..!"។

ក្រោយ​មក ដោយ​ធុញ​ពេក​លោក ថា​ក៏​បាន Unfriend នាង​ចោល​ទៅ ចំណុច​នេះ​ហើយ ដែល​ភាគី​ខាង​ស្រី ចោទ​លោក​ថា លោក​គេចវេះ ដោយ​ឡែក​ថា លោក​គំរាម និង​មាក់ងាយ​នោះ គឺ​មិន​មែន​ទេ។ លោក ថ្លែង​ថា "ធុញ​ពេក ខ្ញុំ​ក៏ Unfriend គាត់​ទៅ អីចឹង​ហើយ គាត់​ថា​ខ្ញុំ​គេចវេះ មិន​មែន​គេច​ទេ គឺ​ធុញ​ពេក...ដោយ​ឡែក​គាត់​ថា ខ្ញុំ​គំរាម​គាត់​អី​នោះ គឺ​អត់​ទេ...គឺ​មាន​គ្រាន់​តែ​និយាយ​ថា បើ​អូន​ឯង​នៅ​តែ​ទារ​ដដែល​ៗ​ពេក បង​ឈប់​សង អីចឹង​ទៅ...!”។

យ៉ាង​ណា លោក បញ្ជាក់​ថា លោក​មិន​ដែល​បាន​ខ្ចី​ប្រាក់​របស់​នារី​ជា​អតីត​សង្សារ​នោះ​ទេ ប៉ុន្តែ​លុយ​ដែល​នាង​ទារ គឺ​ជា​លុយ​ប្រើ​លើ​ការ​​ចាយ​វាយ​ទាំង​អស់​គ្នា​ពេល​នាង​ឡើង​មក​ស្រុក​ខ្មែរ​ម្ដង​ៗ​ប៉ុណ្ណោះ។ លុយ​នោះ​ទៀត​សោត លោក​ក៏​មិន​ដឹង​ថា ​មាន​ចំនួន​ប៉ុន្មាន​ដែរ។ "វា​ជា​លុយ​ស៊ី​ចាយ​ទាំង​អស់​គ្នា...ដល់​តែ​គាត់​លេង​មក​ទារ​ដដែល​ៗ...អីចឹង​យើង​ជា​ប្រុស​ដែរ​បង ក៏​ឆ្លើយ​ទៅ​ថា ទៅ​ចាំ​បង​សង...តែ​ចាំ​លក់​ដី​ប៉ា​ដាច់​សិន​អីចឹង​ទៅ និយាយ​ទៅ​យើង​មិន​ដឹង​ខ្លួន មិនបាន​ប្រយ័ត្ន ស្រាប់​គាត់​ថត​យក​មក​បង្ហោះ​អីចឹង!"។

ព្រីង ច័ន្ទ​បុត្រ សង្កត់​ធ្ងន់​ថា លោក​មិន​ដែល​ខ្ចី​លុយ​អតីត​សង្សារ​ក្រៅ​ពី​លុយ​ដែល​ចំណាយ​លើ​ការ​ដើរ​កម្សាន្ត​ទាំង​អស់​គ្នា​នោះ​ទេ តែ​បើ​អតីត​សង្សារ​ថា​លោក​មាន​ខ្ចី​អី​នោះ លោក​ស្នើ​សុំ​ឲ្យ​នាង​បញ្ចេញ​ឯកសារ​មក។ ចំពោះ​បញ្ហា​នេះ Roselyne Delva មិន​ទាន់​អាច​សុំ​ការ​អធិប្បាយ​បន្ថែម​បាន​ទេ​នៅ​ព្រឹក​នេះ ជុំវិញ​រឿង​ដែល​កើត​ឡើង​រវាង​នាង និង​អតីត​តារា​សម្ដែង ព្រីង ច័ន្ទ​បុត្រ៕

អត្ថបទ៖ ទារិកា

អត្ថបទថ្មី
;