ចាន់ រតនា ដាក់គោលដៅវ៉ៃនៅ ONE ឲ្យបាន ៤ប្រកួត ក្នុងឆ្នាំ២០២០ នេះ

2020-01-10 06:45:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករគុនចម្រុះលេចធ្លោរបស់កម្ពុជា ចាន់ រតនា បានដាក់គោលដៅប្រកួតឲ្យបានច្រើនជាងឆ្នាំ ២០១៩ នៅសង្វៀន ONE Championship ក្នុងឆ្នាំ២០២០ នេះ។

ចាន់ រតនា បានបញ្ជាក់ថាខ្លួន ចង់ឡើងប្រកួត ឲ្យបាន ៤លើកនៅសង្វៀន ONE Championship ព្រោះថាឆ្នាំ ២០១៩ កន្លងទៅ រូបគេប្រកួតបានតែ ២ លើកប៉ុណ្ណោះ។

ចាន់ រតនា អបអរក្រោយជ័យជម្នះនៅ ONE នាពេលកន្លងមក (រូបភាព៖ ONE Championship)

ម្ចាស់ក្លិបសិល្បៈ ដែលឈ្នះ ៣ប្រកួតជាប់គ្នានៅ ONE បានថ្លែងថា៖ «អ្វីដែលខ្ញុំចង់បង្ហាញ គឺដាក់គោលដៅប្រកួតឲ្យបាន ៤ដងនៅឆ្នាំ ២០២០។ នេះជាការគិត របស់ខ្ញុំ បើសិនមិនមានបញ្ហារាំងស្ទះនោះទេ។ ប៉ុន្តែបំណងទាំងនេះត្រូវរង់ចាំចម្លើយអំពីអ្នកចាត់ការរបស់ខ្ញុំ ឬអ្នកផ្គូផ្គងរបស់ខ្ញុំដែរ»។

បន្ទាប់ពីឈ្នះកីឡាករជើងខ្លាំងចំបាប់របស់គុយបា Gustavo Balart កាលពាក់កណ្ដាលខែសីហា មក ចាន់ រតនា ខកខានឡើងសង្វៀនលំដាប់ពិភពលោកនេះ រយៈពេលជាង ៤ខែមកហើយ។ រតនា ព្រលយឲ្យដឹងថាខ្លួន អាចនឹងឡើងសង្វៀនដដែលនេះជាថ្មីនៅដើមឆ្នាំ ២០២០ នេះ។

បច្ចុប្បន្ន រតនា បានដាក់ចិត្តដាក់កាយខំប្រឹងប្រែងហ្វឹកហាត់ខ្លាំងជាងមុន ដើម្បីប្រឈមនឹងគូប្រជែងខ្លាំងៗទៅថ្ងៃអនាគត និងអាចជាបេក្ខភាពមួយដណ្ដើមខ្សែក្រវាត់ទៀតផង។

គួរដឹងថា ចាន់ រតនា ប្រឡូកលើសង្វៀនគុនចម្រុះចំនួន ១០ លើក ក្នុងនោះ ឈ្នះ ៧ ដង និង ចាញ់ ៣ដង ចាប់ពីឆ្នាំ ២០១៥ មក។ កំណត់ត្រាដ៏អស្ចារ្យមិនធ្លាប់មានសម្រាប់កម្ពុជា គឺ ចាន់ រតនា បានយកឈ្នះ ៣លើកជាប់គ្នានៅសង្វៀន ONE ដោយវាយកីឡាករឥណ្ឌូណេស៊ី ពីររូប Abro Fernandez និង Rudy Agustian ត្រឹមទឹកទី២ មុនពេលឈ្នះពិន្ទុ ជើងខ្លាំងជំនាញចំបាប់គុយបា Gustavo Balart កាលពីពាក់កណ្ដាលខែ សីហាកន្លងទៅ៕

អត្ថបទ៖ ស៊ីធី