ប្រធានសហគមន៍ខ្មែរ-Canada ក្រើនរំលឹកសិល្បករខ្មែររឿងមួយ បើខ្លាចប៉ូលីសកាណាដាចាប់ខ្លួន

2020-02-21 08:36:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានសហគមន៍ខ្មែរ-Canada និងជាម្ចាស់ស្ពុនស័រម្នាក់ដែលមានឈ្មោះថា Khundavid នៅមិនសុខបានចេញមុខមកផ្ដាំផ្ញើដល់សិល្បករខ្មែរឲ្យមានការប្រុងប្រយ័ត្នរាល់ពេលមានបេសកកម្មការងារទៅប្រទេសកាណាដា ដោយត្រូវធ្វើរឿងកុំខាន បើមិនចង់មានរឿងដល់ខ្លួន។

ម្ចាស់ស្ពុនស័រដែលអះអាងថា ធ្លាប់បានធានាសិល្បករខ្មែរប្រមាណ៤០នាក់ទៅកាណាដារូបនេះ បានចេញមុខមកប្រកាសដូច្នេះ បន្ទាប់ពីកន្លងមកលោកបានដឹងថា មានរឿងរ៉ាវមួយចំនួនបានកើតឡើងរួចទៅហើយនៅកាណាដាទៅលើសិល្បករខ្មែរ ដោយត្រូវប៉ូលីសអន្តោប្រវេសន៍ប្រទេសគេចាប់ឃាត់ខ្លួន ដោយសារតែពួកគេបានចូលទៅកាណាដាខុសច្បាប់ការងារ។

លោកថា ដូចនៅសហរដ្ឋអាមេរិកដែរ នៅកាណាដា គឺមានច្បាប់មួយ ដែលតម្រូវឲ្យសិល្បករបរទេសចូលទៅប្រទេសខ្លួនត្រូវបំពេញជាដាច់ខាត នោះគឺច្បាប់ "Work Permit”។ ច្បាប់នេះ តម្រូវឲ្យសិល្បករបរទេសត្រូវបង់ពន្ធចំនួន ១០២៥ដុល្លារក្នុងម្នាក់ ដើម្បីអាចចូលទៅដោយស្របច្បាប់។ ប៉ុន្តែកន្លងមកសិល្បករខ្មែរមួយចំនួនធំ បានឆកល្វែងលើច្បាប់មួយនេះ ហើយចូលប្រទេសរបស់គេ។ លោកថា នេះមិនមែនជាកំហុសសិល្បករទាំងស្រុងនោះទេ ប៉ុន្តែអាចមានម្ចាស់ស្ពុនស័រខ្លះបានគេចវេស ព្រោះមិនចង់ចំណាយច្រើនលើសិល្បករ។

ប្រធានសហគមន៍ខ្មែរ កាណាដា បានបញ្ជាក់ថា កាលពីអតីតកាល មានសិល្បករខ្មែរមួយចំនួន(សុំមិនបញ្ចេញឈ្មោះ)ត្រូវប៉ូលីសឃាត់ខ្លួន ហើយខ្លះទៀតត្រូវបង្ខំឲ្យលើកយន្តហោះត្រឡប់មកកម្ពុជាវិញថែមទៀត ក្រោយពីត្រួតពិនិត្យដឹងថា សិល្បករខ្មែរទាំងនោះ បានខកខានបង់ប្រាក់ Work Permit(កាតព្វកិច្ចស្ពុនស័រ) បើទោះសូម្បីពួកគេបានចុះដល់ដីក្នុងប្រលានយន្តហោះកាណាដាទៅហើយក្ដី។

រូបតំណាងសិល្បករច្រៀងនៅកាណាដា(ហ្វេសប៊ុក ឃុនដាវីដ)

ជាមួយនឹងការចេញមុខរបស់ម្ចាស់ស្ពុនស័រខាងលើ ក្រោយថ្មីៗនេះ មានដំណឹងថា មានសិល្បករខ្មែរមួយក្រុមទៀត សុទ្ធតែតារាល្បីៗ គ្រោងនឹងទៅបំពេញបេសកកម្មសិល្បៈនៅប្រទេសកាណាដាទៀត។ ដូច្នេះហើយក្នុងនាមជាប្រធានសហគមន៏ ខ្មែរ Canada លោកសូមក្រើនរំលឹក ឲ្យសិល្បករ ទំនាក់ទំនងឲ្យច្បាស់លាស់ជាមួយម្ចាស់ស្ពុនស័រ លើប្រាក់បង់ពន្ធ “Work Permit” ចៀសវាងមានរឿង ធ្វើឲ្យបង់ខាតកិត្តិយស និងមុខមាត់សិល្បករខ្លួនឯង។

លោក Khundavid បានសង្កត់ធ្ងន់ថា "បើមានរឿង គេចាប់តារាយើងសុទ្ធតែល្បីៗ មិនប៉ះពាល់ដល់គ្នា ហើយមួយទៀតមិនមែនប៉ះតែ សិល្បករខ្លួនឯងទេ គឺជះឥទ្ធិពលដល់សិល្បៈវប្បធម៌ខ្មែរទាំងមូល និងប៉ះពាល់ដល់សហគមន៍ខ្មែរនៅកាណាដាថែមទៀត!”។ លោកបន្តថា ដូច្នេះហើយ លោកស្នើឲ្យសិល្បករ និងម្ចាស់ឧបត្ថម្ភធ្វើការជាមួយគ្នាឲ្យច្បាស់លាស់លើប្រាក់ Work Permit ចៀសវាងជួបរឿងស្ដាយក្រោយ។

តាមការបញ្ជាក់របស់លោក ដាវីដ បានឲ្យដឹងថា កន្លងមក ដោយសារតែធ្លាប់មានបាតុភាពបែបនោះ សិល្បករខ្មែរខ្លះ ត្រូវបានស្ថានទូតកាណាដាបដិសេធផ្ដល់ទិដ្ឋាការឲ្យចូលទៅបំពេញការងារនៅក្នុងប្រទេសគេថែមទៀត ធ្វើឲ្យពួកគេបាត់បង់ផលប្រយោជន៍ពីការងារ។ ដូច្នេះហើយ លោកថា ករណីនេះ ប៉ះពាល់ដល់សិល្បៈវប្បធម៌ខ្មែរទាំងមូល។

"Work Permit" គឺជាច្បាប់ពន្ធដារបស់កាណាដា សម្រាប់អនុវត្តលើជនបរទេសទាំងឡាយដែលចូលទៅបំពេញកិច្ចការងារ រកស៊ីរយៈពេលខ្លីនៅក្នុងប្រទេសរបស់ខ្លួន។ សម្រាប់សិល្បករដែលចូលទៅក្នុងដំណើរកម្សាន្ត មិនជាប់កាតព្វកិច្ចលើច្បាប់ពន្ធនេះទេ ប៉ុន្តែបើទៅបំពេញការងារសិល្បៈ គឺជាប់ ប៉ុន្តែតាមធម្មតាជាបន្ទុករបស់ស្ពុនស័រអ្នកនាំទៅ។ ប៉ុន្តែប្រសិនបើសិល្បករចូលទៅប្រទេសកាណាដាដោយដាក់ថា ដំណើរកម្សាន្ត តែក្រោយមកបានលួចធ្វើកិច្ចការងារសិល្បៈលើដីគេ គឺខុសច្បាប់ហើយ ហើយត្រូវប្រឈមនឹងការចាប់បណ្ដេញចេញក្រោមនៃច្បាប់នេះ៕

អត្ថបទ៖ ទារិកា