សរុបចំនួន​អ្នកទៅលេង​បុណ្យទន្លេ​ខេត្ត​បាត់ដំបង រយៈពេល​៣ថ្ងៃ

  • 2020-03-16 02:31:55
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ការរៀបចំ​ពិធីបុណ្យ​ទន្លេ​លើកទី៦ រយៈពេល​៣ថ្ងៃ ចាប់ពីថ្ងៃ​ទី១៣-១៥ ខែ​មីនា ឆ្នាំ២០២០ នៅខេត្តបាត់ដំបង បានប្រព្រឹត្តទៅដោយរលូន និង​ជោគជ័យ​យ៉ាង​ត្រចះត្រចង់ ដោយមាន​ប្រជាពលរដ្ឋ និង​ភ្ញៀវទេសចរ​ចូលរួម​ទស្សនា​ប្រមាណ​ជិត ៣០ម៉ឺននាក់ ខណៈ​បញ្ហា​សន្តិសុខ​សណ្ដាប់ធ្នាប់​ក៏គ្មានអ្វី​កើតឡើង​គួរឱ្យកត់​សម្គាល់​នោះឡើយ។ នេះបើ​តាមការ​បញ្ជាក់​របស់លោក ថោង ខុន រដ្ឋមន្ត្រី​ក្រសួង​ទេសចរណ៍។

លោក ថោង ខុន បានចូលរួម​ជាមួយ​លោក ងួន រតនៈ អភិបាលខេត្ត​បាត់ដំបង និង​លោក​ប្រធាន​ក្រុមប្រឹក្សាខេត្ត ក្នុងកម្មវិធី​បិទព្រឹត្តិការណ៍​បុណ្យទន្លេនារាត្រីថ្ងៃទី១៥ ខែមីនា ក្នុងនោះ​គេសង្កេតឃើញថ្នាក់ដឹកនាំ មន្ត្រីរាជការ និងប្រជាពលរដ្ឋយ៉ាងច្រើនកុះករបានចូលរួមទស្សនាទស្សនីយភាពសិល្បៈវប្បធម៌ មានល្ខោនរឿងប្រវត្តិភ្នំសំពៅ សិល្បៈរបាំមួយចំនួន ការដើរបង្ហាញម៉ូតអំពីក្រមាខ្មែរ និងការសម្ដែងសៀកកំប្លែងផងដែរ។

ជាមួយគ្នានោះ ប្រជាពលរដ្ឋ និងភ្ញៀវទេសចរក៏បានដើរទស្សនានៅតាមស្ដង់ពិព័រណ៍ ទទួលទានអាហារនៅតាមស្ដង់លក់ម្ហូបអាហារ និងការតាំងបង្ហាញផលិតផលនានានៅក្នុងបរិវេណរៀបចំពិធីបុណ្យ ចំណែកអ្នកមួយចំនួនក៏និយមថតរូបភាពជាមួយក្រុមគ្រួសារ មិត្តភក្តិជាដើម។ ក្រៅពីនេះមានការប្រគំតន្ត្រីចំនួន ២កន្លែងទៀតផងដែរ។

រយៈពេលបីថ្ងៃមកនេះ បុណ្យទន្លេបានទទួលវត្តមានភ្ញៀវទេសចរ និងប្រជាពលរដ្ឋចូលរួមទស្សនាប្រមាណជិត៣០ម៉ឺននាក់ ក្នុងនោះមានភ្ញៀវបរទេសប្រមាណ ១៣០០នាក់ ដោយនៅថ្ងៃទីមួយទទួលបានប្រមាណជាង៣ម៉ឺននាក់ នៅថ្ងៃទីពីរដែលជាថ្ងៃបើកពិធីបុណ្យជាផ្លូវការក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ទទួលបានវត្តមានប្រជាពលរដ្ឋ និងភ្ញៀវទេសចរប្រមាណជាង១០ម៉ឺននាក់ ចំណែកនៅថ្ងៃបិទបញ្ចប់នេះទទួលបានប្រមាណជាង ១៦ម៉ឺននាក់ទៀត។

ថ្វីដ្បិតក្នុងពិធីបុណ្យទន្លេគ្មានការភ័យខ្លាចពីជំងឺកូវីដ១៩ លោករដ្ឋមន្ត្រីក៏បានអំពាវនាវដល់ប្រជាពលរដ្ឋគ្រប់គ្នាកុំឱ្យមានការភ័យខ្លាចចំពោះបញ្ហាជំងឺ Covid-19 ខ្លាំងហួសហេតុពេក ទោះបីជាជំងឺនេះជាជំងឺឆ្លង ប៉ុន្តែវាក៏អាចព្យាបាលឱ្យជាសះស្បើយវិញបានដែរ។ ទោះយ៉ាងណា ដើម្បីការពារខ្លួនពីជំងឺដង្កាត់នានាទុកជាមុន ក៏ត្រូវថែរក្សាអនាម័យ សម្អាតខ្លួនប្រាណ និងត្រូវលាងដៃនឹងសាប៊ូ ហើយនៅពេលក្អក កណ្ដាស់ ត្រូវខ្ទប់មាត់ ច្រមុះនឹងកន្សែង ឬក្រមាខ្មែរ ដើម្បីការពារកុំឱ្យឆ្លងទៅដល់អ្នកដទៃផងដែរ៕

អត្ថបទ និងរូបថត៖ ក្រសួងទេសចរណ៍

;