ព្រោះមូលហេតុនេះ Mike Tyson សោកស្ដាយ ដែលយកខ្លាមកចិញ្ចឹម

2020-04-07 00:15:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អតីតកីឡាករប្រដាល់ដ៏ល្បីឈ្មោះ Mike Tyson បានរៀបរាប់ពីវិប្បដិសារីរបស់លោក ដែលធ្លាប់យកសត្វខ្លាមកចិញ្ចឹមថ្នាក់ថ្នម។ លោកថា សត្វខ្លាទាំងនោះនឹងសម្លាប់ម្ចាស់របស់វាក្នុងលក្ខខណ្ឌចៃដន្យណាមួយ។ ការថ្លែងនេះត្រូវ Mike Tyson ធ្វើឡើងនៅលើប្រព័ន្ធបណ្ដាញសង្គម Instagram ទៅកាន់តារារ៉េបអាមេរិក Fat Joe ក្នុងកម្មវិធីភាពយន្តឯកសាររបស់ Netflix មួយ។

Mike Tyson ពោលពាក្យថា លោកពិតជាឆ្កួតណាស់ ដែលហ៊ានចិញ្ចឹមសត្វខ្លា។ លោកបន្តថា គ្មានវិធីណាមួយអាចបង្ក្រាបខ្លាឲ្យក្លាយជាសត្វចិញ្ចឹមស្ដាប់បង្គាប់ ១០០% នោះទេ។ "ពួកវានឹងសម្លាប់អ្នកដោយចៃដន្យ ជាពិសេសនៅពេលអ្នកកំពុងលេងរាងធ្ងន់ដៃជាមួយពួកវា...។ ខ្ញុំពិតសប្បាយចិត្តណាស់ ដែលខ្ញុំចេះអប់រំខ្លួនឯង។ ខ្ញុំធ្លាប់ធ្វើរឿងខុស។ ខ្ញុំមិនគួរយកពួកវាមកដាក់នៅក្នុងផ្ទះទេ ដោយជឿថាពួកវាអាចផ្សាំងបាន។ ខ្ញុំខុសហើយ"។

បន្ថែមពីនេះ Mike Tyson បានរំលឹកពីគ្រោះថ្នាក់មួយ ដែលបង្កឡើងដោយសត្វខ្លារបស់លោក។ លោកប្រាប់ថា ធ្លាប់មានអ្នកជិតខាងស្រីម្នាក់លួចបានផ្លោះរបងចូលមកលេងជាមួយសត្វខ្លារបស់លោក។ ព្រោះតែមិនស្គាល់ សត្វខ្លាក៏បានវាយប្រហារស្ត្រីម្នាក់នោះរហូតដល់មានរបួសដៃ។ មុនដំបូងឡើយគ្រួសារខាងស្ត្រីនោះចង់ប្ដឹងលោក តែពេលដឹងថា ម្នាក់ស្រីនោះលួចចូលទៅផ្ទះលោកមុន ក៏បញ្ឈប់ការប្ដឹងផ្ដល់ទៅ។ យ៉ាងណាមិញ លោកបានសម្រេចផ្ដល់លុយឲ្យស្ត្រីរងគ្រោះអស់ ២៥ម៉ឺនដុល្លារ។

សូមបញ្ជាក់ថា Mike Tyson ធ្លាប់ចិញ្ចឹមខ្លា ស ចំនួន៣ក្បាល ហើយការចិញ្ចឹមនេះមានរយៈពេល ១៤ឆ្នាំ។ បន្ទាប់ពីស្វែងយល់ពីភាពកាចសាហាវដែលមិនអាចផ្សាំងបានឲ្យដូចសត្វចិញ្ចឹមដទៃ អតីតកីឡាករវ័យ៥៣ឆ្នាំរូបនេះ បានសម្រេចបោះបង់ចោលការចិញ្ចឹមសត្វខ្លា ហើយបរិច្ចាគពួកវាឲ្យទៅតំបន់ការពារសត្វព្រៃ៕