Roberto Escobar ដែល​ជា​បងស្ដេច​គ្រឿង​ញៀន​កូឡុំប៊ី​ល្បី​ឈ្មោះ Pablo Escobar បាន​ទាមទារ​សំណង​ពី Apple ចំនួន ២,៦ពាន់​លាន​ដុល្លារ ជុំ​វិញ​រឿង​រ៉ាវ​ដែល iPhone X របស់​ខ្លួន​ត្រូវ​បាន​គេ Hack ចូល។

ផ្អែក​តាម​ការ​ចុះ​ផ្សាយ​របស់ TMZ ​បាន​ឲ្យ​ដឹង​ថា​​ ក្នុង​ពាក្យ​បណ្ដឹង Roberto បាន​និយាយ​ថា​ខ្លួន​បាន​ទិញ iPhone X ពី​ខែ​មេសា​ឆ្នាំ ២០១៨ ហើយ​មួយ​ឆ្នាំ​ក្រោយ​មក​ក៏​ទទួល​បាន​សារ​គំរាមកំហែង​អាយុ​ជីវិត​ពី​បុរស​ម្នាក់​ឈ្មោះ Diego។ បុរស​ម្នាក់​នោះ​និយាយ​ថា​គេ​បាន​រក​ឃើញ​អាសយដ្ឋាន​ផ្ទះ​របស់ Roberto តាម​រយៈ​កម្មវិធី FaceTime។

Roberto និយាយ​ថា​ iPhone X របស់​ខ្លួន​ត្រូវ​ Hacker ចូល​លុកលុយ​បាន​តាម​រយៈ​ចន្លោះ​ប្រហោង​នៃ​កម្មវិធី FaceTime។ លោក​បាន​ប្រាប់​រឿង​នេះ​ដល់ Apple ប៉ុន្តែ​បុគ្គលិក Apple ទទូច​ថា iPhone X គឺ​ជា​ស្មាតហ្វូន​មាន​សុវត្ថិភាព​ខ្ពស់​មួយ​លើ​ទីផ្សារ។ Roberto បាន​ឲ្យ​ដឹង​ដែរ​ថា​រូប​គេ​ត្រូវ​រើ​ផ្ទះ និង​ត្រូវ​ចំណាយ​ថវិកា​ច្រើន​សន្ធឹក​ដើម្បី​បង្កើន​សុវត្ថិភាព​របស់​ខ្លួន។

​គួរ​ដឹង​ថា​ក្រោយ​ចេញ​ពី​ពន្ធនាគារ​ Roberto Escobar ទទួល​បាន​មរតក​ប្រមាណ ៣០​ពាន់​លាន​ដុល្លារ​ពី​ប្អូនប្រុស​របស់​ខ្លួន​ដែល​ត្រូវ​ប៉ូលិស​បាញ់​សម្លាប់​ក្នុង​ឆ្នាំ ១៩៩៣។ ជា​មួយ​មរតក​នេះ Roberto បាន​បង្កើត​ក្រុមហ៊ុន Escobar Inc. ឡើង។

នៅ​ឆ្នាំ ២០១៩ ក្រុមហ៊ុន Escobar បាន​បញ្ចេញ​លក់​ស្មាតហ្វូន​បត់​របស់​ខ្លួន​ម៉ូដែល Escobar Fold 1 ដែល​មាន​តម្លៃ​ត្រឹម ៣៤៩​ដុល្លារ ដើម្បី​ប្រកួតប្រជែង​នឹង​ Galaxy Fold របស់ Samsung។ កន្លង​មក​ Roberto ធ្លាប់​បាន​ប្ដឹង​ Apple ថា​លក់ iPhone ឲ្យ​អតិថិជន​ថ្លៃ​ពេក។

កាល​ពី​ថ្មីៗ​នេះ​ក្រុមហ៊ុន Escobar បាន​បន្ត​បញ្ចេញ​លក់ iPhone 11 Pro ស្រោប​មាស​ទំហំ ២៥៦GB ក្នុង​តម្លៃ​ត្រឹម ៤៩៩​ដុល្លារ ដែល​​ប្រៀប​ដូច​ជា​ការ​​សង​សឹក​ទៅ​កាន់ Apple គឺ​លក់​ផលិតផល Apple ក្នុង​តម្លៃ​ថោក​ជាង​ក្រុមហ៊ុន​បាន​លក់៕