ផ្លូវ-ស្ពានធំៗ ដែលនឹងបញ្ចប់ការសាងសង់នៅឆ្នាំនេះ និងឆ្នាំក្រោយ

2020-06-03 07:07:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផ្លូវ និងស្ពាន ដែលនឹងបញ្ចប់ការសាងសង់នៅឆ្នាំ២០២០ និង ២០២១ រួមមាន៖ ផ្លូវជាតិលេខ១១, ផ្លូវ ៣៤ខ្សែនៅខេត្តព្រះសីហនុ, ស្ពានស្ទឹងត្រង់-ក្រូចឆ្មារ, ផ្លូវជាតិលេខ៣ និងស្ពានអាកាស និងផ្លូវក្រោមដីចោមចៅ។

ផ្លូវជាតិលេខ១១

ផ្លូវនេះ មានប្រវែង៩៦គីឡូម៉ែត្រ តភ្ជាប់រវាងខេត្តព្រៃវែងត្រង់ចំណុចប្រសព្វផ្លូវជាតិលេខ១ (អ្នកលឿង) និងខេត្តត្បូងឃ្មុំ ត្រង់ចំណុចប្រសព្វផ្លូវជាតិលេខ៧ (ថ្នល់ទទឹង) ក្រាលបេតុងកៅស៊ូAC គិតត្រឹមថ្ងៃទី២៥ ខែមេសា ឆ្នាំ២០២០ សម្រេចការសាងសង់បានចំនួន ៩១,១៤ ភាគរយហើយ។ ផ្លូវនេះគ្រោងចំណាយទឹកប្រាក់សាងសង់ចំនួនជាង ៩៨លានដុល្លារ ដោយប្រើរយៈពេល៤៤ខែ គិតចាប់ពីខែធ្នូ ឆ្នាំ២០១៧ និងគ្រោងបញ្ចប់នៅចុងឆ្នាំ២០២០។

ផ្លូវ៣៤ខ្សែនៅខេត្តព្រះសីហនុ

ផ្លូវ ៣៤ខ្សែនេះមានប្រវែងសរុបជាង ៨៤គីឡូម៉ែត្រ ដោយចំណាយថវិកាជិត ៣០០លានដុល្លារ។ ផ្លូវទាំង៣៤ខ្សែ ត្រូវចែកចេញជា ៣ប្រភេទ៖ មហាវិថីចំនួន ៣ខ្សែ ប្រវែងជាង ២២គីឡូម៉ែត្រ, វិថីចំនួន ១៦ខ្សែ ប្រវែងជិត ៥០គីឡូម៉ែត្រ និងអនុវិថីចំនួន១៥ខ្សែ ប្រវែងជិត ១២គីឡូម៉ែត្រ។ ផ្លូវនេះ ត្រូវបានបើកការដ្ឋានសាងសង់កាលពីខែវិច្ឆិកា ឆ្នាំ២០១៩ ដោយប្រើរយៈពេល ៨ខែ។ គិតមកត្រឹមដើមខែមិថុនានេះ ការសាងសង់សម្រេចបាន ៩៤%ហើយ។

ស្ពានស្ទឹងត្រង់-ក្រូចឆ្មារ

ស្ពានតភ្ជាប់ពីស្រុកស្ទឹងត្រង់ ខេត្តកំពង់ចាម ទៅស្រុកក្រូចឆ្មារ ខេត្តត្បូងឃ្មុំ សម្រេចបានការសាងសង់ ៨៧,៥%ហើយ ដោយគ្រោងនឹងបញ្ចប់មុនកំណត់នៅខែមីនា ឆ្នាំ២០២១។ ស្ពានប្រវែង ១១៣១ម៉ែត្រនេះ ត្រូវបានបើកការដ្ឋានសាងសង់កាលពីខែកុម្ភៈ ឆ្នាំ២០១៨ ដោយគ្រោងចំណាយថវិកាសរុប ៥៦,៩៩៨លានដុល្លារ។

ផ្លូវជាតិលេខ៣

ផ្លូវជាតិលេខ៣ ពីភ្នំពេញ ទៅកំពត សម្រេចការសាងសង់បាន ៧៤%ហើយ គិតត្រឹមចុងខែឧសភា ២០២០ ដោយនឹងបញ្ចប់នៅខែធ្នូ ឆ្នាំ២០២១ ពោលគឺមុនការគ្រោងទុកចំនួន ៩ខែ។ ផ្លូវនេះត្រូវបានបើកការដ្ឋានសាងសង់កាលពីខែឧសភា ឆ្នាំ២០១៨ ដោយគ្រោងចំណាយថវិកាជិត ២២០លានដុល្លារ។ ការពង្រីកផ្លូវនេះគឺត្រូវបានបែងចែកជា ២កំណាត់ គឺពីចោមចៅ-បែកគូស និងបែកគូស-ក្រុងកំពត។ ផ្លូវពីចោមចៅ ទៅបែកគូស ក្នុងខេត្តតាកែវ ប្រវែង ៦៤,៩០គីឡូម៉ែត្រ នឹងត្រូវពង្រីក ២គន្លងទៅ ៤គន្លង (២ទៅ ២មក) និងមានសួនកណ្តាល។ ចំណែកកំណាត់ផ្លូវពីបែកគូស ទៅក្រុងកំពត ប្រវែងជាង ៦៤គីឡូម៉ែត្រ នឹងត្រូវពង្រីកតួផ្លូវដល់ ១២ម៉ែត្រ ដោយមាន ២គន្លងផ្លូវដដែល (១ទៅ ១មក)។

ស្ពានអាកាស និងផ្លូវក្រោមដីចោមចៅ

គិតត្រឹមចុងខែឧសភា ឆ្នាំ២០២០ លទ្ធផលនៃការសាងសង់ស្ពានអាកាស និងផ្លូវក្រោមដីចោមចៅសម្រេចបាន ៤១%នៃគម្រោង ដែលតាមផែនការនឹងបញ្ចប់ការសាងសង់នៅចុងឆ្នាំ២០២១ខាងមុខ។ ស្ពានអាកាស និងផ្លូវក្រោមដីនេះ ត្រូវបានបើកការដ្ឋានសាងសង់ជាផ្លូវការកាលពីថ្ងៃទី២៩ ខែមិថុនា ឆ្នាំ២០១៨។ គម្រោងតម្លៃប្រមាណ២២លានដុល្លារនេះ នឹងប្រើប្រាស់រយៈពេលសាងសង់ចំនួន ៣០ខែ។ លក្ខណៈនៃគម្រោងនេះរួមមាន៖ ស្ពានអាកាសទី១ (ភ្ជាប់ពីមហាវិថីសហព័ន្ធរុស្ស៊ី ទៅផ្លូវជាតិលេខ៣), ស្ពានអាកាសទី២ (បំបែកចេញពីស្ពានអាកាសមេ បត់ឆ្វេងតភ្ជាប់ចរាចរណ៍ពីមហាវិថីសហព័ន្ធរុស្ស៊ី ឆ្ពោះទៅផ្លូវវេងស្រេង), ស្ពានអាកាសទី៣ (ជាស្ពានកោងបត់ឆ្វេង តភ្ជាប់ចរាចរណ៍ពីផ្លូវវេងស្រេង ទៅផ្លូវជាតិលេខ៣), ផ្លូវក្រោមដី (ផ្លូវតភ្ជាប់ចរាចរ ពីផ្លូវជាតិលេខ ៤ ទៅមហាវិថីសហព័ន្ធរុស្ស៊ី ) និងផ្លូវអ៊ុតកៅស៊ូ៕