លោក ថោង ខុន រដ្ឋមន្ត្រីក្រសួងទេសចរណ៍ បានពិភាក្សាការងារ​ជាមួយលោក ស៊ូ ជីស៊ីង (Xu Zhixing) នាយកប្រតិបត្តិក្រុមហ៊ុនព្រីនរៀលអេស្តេតគ្រុប (Prince Real Estate Group) និងបាន​ស្នើក្រុមហ៊ុន​នេះ លើគម្រោងរៀបចំដំណើរការនាវាទេសចរណ៍នៅតាមដងទន្លេមេគង្គ និងដើម្បីរួម​ចំណែកដល់ការអភិវឌ្ឍ និងលើកកម្ពស់វិស័យទេសចរណ៍នៅរាធានីភ្នំពេញ ក៏ដូចជានៅកម្ពុជាឱ្យមានភាពល្អប្រសើរមួយកម្រិតទៀត។ សំណើនេះត្រូវបានលើកឡើង កាលពីថ្ងៃទី០៤ ខែមិថុនា ឆ្នាំ២០២០ នៅទីស្ដីការក្រសួងទេសចរណ៍។

លោក ស៊ូ ជីស៊ីង បានលើកឡើងថា នៅខែតុលា ឆ្នាំ២០២០ ខាងមុខនេះ Prince Real Estate Group ចង់បើកសម្ពោធមជ្ឈមណ្ឌលព្រីនម៉ាណ័ររីសតជាផ្លូវការ ទើបមកសុំការណែនាំពីលោករដ្ឋ​មន្ត្រីក្រសួងទេសចរណ៍ជាមុន។ ចំពោះការលើកឡើងនេះ ត្រូវបានលោករដ្ឋមន្ត្រីបង្ហាញការពេញ​ចិត្ត ប៉ុន្តែលោករដ្ឋមន្ត្រីបានមានប្រសាសន៍ថាក្នុងខណៈនេះកម្ពុជាកំពុងស្ថិតក្នុងដំណាក់ប្រយុទ្ធប្រឆាំងនឹងជំងឺកូវីដ-១៩ ដូច្នេះអាចនឹងរង់ចាំពេលវេលាសមស្របណាមួយ ដែលរាជរដ្ឋាភិបាលមានការអនុញ្ញាត។

លោក ស៊ូ បានទទួលយកយោបល់របស់លោករដ្ឋមន្ត្រីក្រសួងទេសចរណ៍ និងរង់ចាំអនុវត្តតាមការសម្រេចរបស់ប្រមុខរាជរដ្ឋាភិបាលកម្ពុជា។ លោកបានបន្តថា នៅពេលសម្ពោធមជ្ឈមណ្ឌលព្រីនម៉ាណ័ររីសតរួចរាល់ និងបន្ទាប់ពីទទួលបានការគាំទ្រពីក្រសួង-ស្ថាប័នពាក់ព័ន្ធ ក៏ដូចជារាជរដ្ឋាភិបាលកម្ពុជាហើយនោះ ក្រុមហ៊ុននឹងចាប់អនុវត្តគម្រោងនាវាទេសចរណ៍នេះ នៅឆ្នាំ២០២០-២០២៣ ដោយចង់ឱ្យមានកំពង់ផែទេសចរណ៍ស្ដង់ដាមួយនៅមជ្ឈមណ្ឌលព្រីនម៉ាណ័ររីសតតែម្ដង។ ចំពោះគម្រោងបង្កើតឱ្យមានកំពង់ផែទេសចរណ៍នេះទៀតសោត ត្រូវបានលោករដ្ឋមន្ត្រីសម្ដែងការគាំទ្រពេញទំហឹង ហើយសន្យាថានឹងខិតខំសហការជាមួយស្ថាប័នពាក់ពាន់ ដើម្បីសុំការសម្រេចពីរាជរដ្ឋាភិបាលគាំទ្រដល់ការចូលចតរបស់នាវាទេសចរណ៍។ គូសបញ្ជាក់​ថា មជ្ឈមណ្ឌលព្រីនម៉ាណ័ររីសត មានទីតាំងស្ថិតនៅស្រុកកៀនស្វាយ ខេត្តកណ្ដាល (ចន្លោះផ្លូវជាតិលេខ១ និងទន្លេមេគង្គក្រោម)៕

ប្រភព៖ ក្រសួងទេសចរណ៍