ក្រោយរយៈពេល ​២ម៉ោងក្រោយតារាងចម្រៀង មាស សុខសោភា ប្រកាសចាកចេញពីផលិតកម្ម លោក អ៉ិន រិទ្ធីចិត្រ នាយកគ្រប់គ្រងផលិតកម្ម ថោន បានឆ្លើយតបថា លោកមិនបានដឹង និងមិនទាន់បានទទួលដំណឹង និងលិខិតផ្លូវការនៃការចាកចេញរបស់តារាច្រៀង មាស សុខសោភា នៅឡើយនោះទេ។

លោក អ៉ិន រិទ្ធីចិត្រ នាយកគ្រប់គ្រងផលិតកម្ម ថោន ឆ្លើយបញ្ជាក់តាមទូរសព្ទយ៉ាងដូច្នេះថា **"ខ្ញុំអត់ទាន់ដឹងច្បាស់ផងបង ចាំមើលខ្ញុំមើលសិន ខ្ញុំមិនហ៊ាននិយាយអ្វីទាំងអស់ ខ្ញុំមិនទាន់បានដំណឹងច្បាស់ពីសាមីខ្លួន និងលិខិតផ្លូវការក៏មិនទាន់បានទទួលដែរ ខ្ញុំរងចាំការបញ្ជាក់ពីថ្នាក់លើសិន ពេលនេះខ្ញុំមិនហ៊ាននិយាយអ្វីទេព្រោះខ្លាចប៉ះពាល់ទាំងសងខាង។ កុងត្រាបន្តរបស់គាត់ជាមួយផលិតកម្មស្ថិតក្នុងការចរចារឥឡូវមិនទាន់ដឹងច្បាស់យ៉ាងម៉េចនោះទេ ចាំខ្ញុំសួរមេបន្តិចសិន ហើយរឿងកុងត្រានេះខ្ញុំក៏មិនដឹងច្បាស់ទេ ព្រោះខ្ញុំទើបចូលមកកាន់ដំណែងបានប្រហែលជា១ ខែ ២ខែ មិនទាន់ដឹងច្បាស់ពីបញ្ហាហ្នឹងទេ ព្រោះ មាស សុខសោភា កុងត្រាគាត់យ៉ាងម៉េចប្រហែលជាចប់យូរហើយក៏មិនដឹង គាត់បានធ្វើកុងត្រា ឬមិនបានធ្វើកុងត្រាជាមួយ ថោន ក៏អត់ដឹងដែរវានៅស្រពេចស្រពិលនៅឡើយ ខ្ញុំមិនទាន់លម្អិតព្រោះគាត់តួធំបែបនេះ ភាគច្រើនមានការអ្វីគាត់និយាយជាមួយមេផ្ទាល់។ សម្រាប់បញ្ហានេះ ខ្ញុំនឹងពិភាក្សា និងឆ្លងថ្នាក់លើសិន បើមានព័ត៌មានច្បាស់ខ្ញុំនឹងឆ្លើយប្រាប់បន្ថែមទៀត**"។

សូមបញ្ជាក់ថា តារាចម្រៀង មាស សុខសោភា ដែលជាតារាចម្រៀងស្រីល្បីប្រចាំផលិតកម្មថោន ​បានប្រកាសក្នុងផេកហ្វេសបុកផ្លូវការរបស់ខ្លួនកាលពីរសៀលថ្ងៃនេះថា "ថ្ងៃនេះគឺជាថ្ងៃដ៏តានតឹងមួយរបស់នាងខ្ញុំ ដែលនាងខ្ញុំត្រូវចាកចេញពីផលិតកម្ម Town។ អរគុណដល់បងប្រុស បងស្រីដែលបានមើលថែប្អូនរយៈពេល ៩ឆ្នាំនេះ អនុស្សារីយ៍ និងអំពើល្អរបស់បងទាំងពីរនៅតែស្ថិតក្នុងបេះដូងរបស់ប្អូនជានិច្ច។ ឆ្លៀតក្នុងឱកាសនេះ នាងខ្ញុំក៏សូមអរគុណដល់បណ្តាផលិតកម្មទាំងអស់ ដែលបានផ្តល់ឱកាសដល់នាងខ្ញុំនាពេលកន្លងមក ទន្ទឹមនឹងនេះនាងខ្ញុំក៏សូមស្វាគមន៍ជាថ្មីសម្រាប់ការសហការផលិតបទចម្រៀង ពីបណ្តាផលិតកម្មទាំងអស់ដូចគ្នា។ អរគុណដល់បងប្អូនទាំងអស់ដែលតែងតែគាំទ្រនាងខ្ញុំ ហើយដរាបណាបងប្អូននៅតែគាំទ្រ និងស្រលាញ់នាងខ្ញុំ នោះនាងខ្ញុំក៏តែបន្តខិតខំប្រឹងប្រែងផលិតនូវបទចម្រៀងថ្មីៗ ដើម្បីបងប្អូនទាំងអស់គ្នាជានិច្ច។ #thankyou " ៕