Kang Hanna គឺ​ជា​តារា​សម្ដែងម្នាក់ ដែល​មាន​ឈ្មោះ​បោះ​សម្លេង​មួយ​រូប​នៅ​លើ​ទឹក​ដី​​​កូរ៉េ​ខាង​ត្បូង។ នាង​ធ្លាប់​ដើរ​តួ​ឯក​ជា​ច្រើន​ហូរហែ​នៅ​ក្នុង​ភាពយន្ត​​ល្បីៗ​ដូចជា "Moon Lovers: Scarlet Heart Ryeo" "Rain or Shine" និង "Familiar Wife" ជា​ដើម។ នៅ​លើ​វិថី​សិល្បៈ Kang Hanna ធ្លាប់​បង្ហើប​ថា នាង​មាន​សេចក្ដី​សោកស្ដាយ​មួយ​ ដែល​មិន​អាច​បំភ្លេច​បាន គឺ​​ការ​ស្លៀក​រ៉ូប​ដ៏​សិចស៊ី​ កំឡុង​ចូលរួម​កម្មវិធី Busan International Film Festival ឆ្នាំ​២០១៣​កន្លង​ទៅ។

កាល​នោះ រ៉ូប​ដែល Hanna ស្លៀក​មាន​សភាព​លេច​ធ្លោ​ជាង​គេ ហើយ​ខុស​​ប្លែក​ពី​គេ​ឯង​ផង​ដែរ។ ជា​ទូទៅ រ៉ូប​គេ​ស្លៀក​​បង្ហាញ​ភាព​សិចស៊ី​នៅ​ខាង​ផ្នែក​ខាង​មុខ តែ​រ៉ូប​របស់​តារា​សម្ដែង​រូប​នេះ​បែរ​ជា​សិចស៊ី​នៅ​ខាង​ក្រោយ​ទៅ​វិញ។ រ៉ូប​នោះ​មាន​សភាព​សិចស៊ី​ដល់​ថ្នាក់​បញ្ចេញ​សាច់​ចង្អូរ​គូទ​របស់ Hanna ថែម​ទៀត​ផង។ មហាជន​ខ្លះ​ក៏​សរសើរ​ពី​ភាព​ស្រស់​ស្អាត ឯ​ខ្លះ​ទៀត​ក៏​មាន​គំនិត​អភិរក្ស​និយម​និង​បាន​រិះ​គន់​យ៉ាង​ចាស់​ដៃ​ចំពោះ Hanna។

Hanna បាន​រៀបរាប់​​ទាំង​សោកស្ដាយ​ថា រូប​ថត​ដែល​នាង​ស្លៀក​រ៉ូប​នោះ​គឺ​ជា​រូប​ដែល​អាក្រក់​បំផុត ហើយ​វា​បាន​ក្លាយ​ជា​ស្រមោល​ខ្មៅ​នៅ​​ក្នុង​ជីវិត​របស់​នាង។ បន្ថែម​ពី​នេះ Hanna បាន​បកស្រាយ​រឿង​មួយ​ទៀត​ដែល​​គ្រប់​គ្នា​យល់​ច្រឡំ​ថា​មាន​ស្នាម​សាក់​នៅ​លើ​​កំប៉េះ​គូទ​​របស់​នាង។ បើ​តាម​ពិត​ទៅ វា​​គ្រាន់​ជា​ស្បៃ​សំណាញ់​ខ្មៅៗ​​ដែល​លយ​ចេញ​មក​ក្រៅ​ទេ មិន​មែន​ជា​ស្នាម​សាក់​​អ្វី​ឡើយ។

"វា (រ៉ូប) ​ជា​ផលិតផល​របស់​អ្នក​ច្នៃ​ម៉ូដ​ល្បី​មួយ​រូប។ នៅ​ពេល​ខ្ញុំ​ទទួល​បាន​សំណើ (ឲ្យ​ស្លៀក​រ៉ូប​នោះ) ខ្ញុំ​គិត​ថា​វា​ស្រស់​ស្អាត ប្លែក និង​មើល​ទៅ​អស្ចារ្យ។ ប៉ុន្តែ​វា​កំពុង​ក្លាយ​ជា​ផ្លូវ​ដើរ​ដ៏​​ងងឹត​សម្រាប់​ខ្ញុំ​​ទៅ​តាម​ពេល​វេលា" នេះ​ជា​ការ​លើក​ឡើង​របស់ Hanna៕