Light ដែល​ជា​ក្រុមហ៊ុន​នៅ​ពី​ក្រោយ​ការ​បង្កើត​ប្រព័ន្ធ​កាមេរ៉ា​ ៥គ្រាប់​ដ៏​ប្លែក​​លើ​ Nokia 9 បាន​​សម្រេច​​ដើរ​ចេញ​ពី​ឧស្សាហកម្ម​ស្មាតហ្វូន ​ដោយ​និយាយ​ខ្លួន​លែង​មាន​ប្រតិបត្តិការ​​ក្នុង​ឧស្សាហកម្ម​នេះ​ត​ទៀត​ហើយ។

ក្រុមហ៊ុន​នេះ​​បាន​ធ្វើ​ឲ្យ​គេ​ចាប់​អារម្មណ៍​ខ្លាំង​កាល​ពី​ឆ្នាំ ២០១៥ នៅ​ពេល​ដែល​ប្រកាស​ចេញ​កាមេរ៉ា Light L16 ជា​កាមេរ៉ា​ខ្នាត​តូច​ដែល​មាន​ឡេន​​រូបភាព​ចំនួន ១៦។ ពេល​នោះ Light បាន​បង្អួត​លើ​បច្ចេកវិទ្យា​នេះ ដោយ​ថា​វា​អាច​បង្កើន​សមត្ថភាព​លើ​ HDR និង​ផលិត​បាន​នូវ​រូបភាព​មាន Resolution ធំ​ជាង​ធម្មតា។ ប៉ុន្តែ​កាមេរ៉ា​នេះ​ទទួល​បាន​មតិ​ចម្រុះ​ ដោយ​មាន​ខ្លះ​ត្អូញត្អែរ​លើ​តម្លៃ ២ពាន់​ដុល្លារ​របស់​វា មាន​ការ​រិះគន់​លើ​ល្បឿន​ Process រូបភាព និង​សមត្ថភាព​ខ្សោយ​ពេល​ថត​នៅ​ទី​ងងឹត។

ក្រោយ​មក​ក្រុមហ៊ុន​បាន​សហការ​ជា​មួយ​ក្រុមហ៊ុន HMD Global សម្រាប់​ការ​ផលិត Nokia 9 PureView ដែល​មាន​បំពាក់​កាមេរ៉ា​ក្រោយ​ដល់ ៥ គ្រាប់។ កាមេរ៉ា​ ៥គ្រាប់​នេះ មាន​បី​ជា​ប្រភេទ Monochrome និង​ពីរ​ទៀត​ជា​កាមេរ៉ា​ពណ៌ មាន​កម្រិត ១២MP ដូច​គ្នា​ទាំង​អស់។ វា​ខុស​ប្លែក​ពី​ស្មាតហ្វូន​ដទៃ ដែល​យ៉ាង​ហោចណាស់​ក៏​មាន​កាមេរ៉ា Ultra-Wide ឬ Telephoto មក​ជា​មួយ​​ដែរ។

កាមេរ៉ា ៥គ្រាប់​លើ Nokia 9 PureView គឺ​វា​ដំណើរ​ការ​ដោយ​ប្រើ​ប្រាស់​កាមេរ៉ា​ទាំង ៥គ្រាប់ ចាប់​យក​រូបភាព​ក្នុង​ពេល​តែ​មួយ រួច​ផលិត​ចេញ​ជា​រូបភាព​តែ​មួយ​សន្លឹក។ ចំណុច​ខ្លាំង​របស់​ប្រព័ន្ធ​កាមេរ៉ា​នេះ​គឺ​ការ​កំណត់​ជម្រៅ​រូបភាព ប៉ុន្តែ​ដំណើរ​របស់​វា​មាន​ល្បឿន​យឺត​មិន​ទាន់​ចិត្ត​ឡើយ។

ពេល​ដែល Nokia 9 PureView ប្រកាស​ចេញ ក្រុមហ៊ុន​ដទៃ​ដូច​ជា Google, Apple និង Huawei បាន​រក​ឃើញ​វេទមន្ត​ផ្ទាល់​ខ្លួន​របស់​គេ​ជា​មួយ​ Smart HDR ដែល​​ដំណើរ​ការ​ដោយ​ AI ​ដោយ​​វា​អាច​​ដាក់​បញ្ចូល​រូបភាព​ច្រើន​សន្លឹក​ដែល​ថត​បាន​ពី​កាមេរ៉ា​តែ​មួយ​​ដាក់​បញ្ចូល​គ្នា​ ​ក្លាយ​ជា​រូបភាព​តែ​មួយ ដែល​មាន​ដំណើរ​ការ​លឿន​​ជាង​ការ​ប្រមូល​រូបភាព​ពី​កាមេរ៉ា​ចំនួន ៥ រួច​ដាក់​បញ្ចូល​គ្នា​របស់​ Nokia 9 PureView។

​​​​នៅ​លើ​វិបសាយ​របស់​ក្រុមហ៊ុន Light នា​ពេល​នេះ មាន​ប្រាប់​ឲ្យ​ដឹង​ថា​ក្រុមហ៊ុន​កំពុង​ផ្ដោត​លើ​ការ​បង្កើត Platform វាស់​ជម្រៅ 3D ផ្ទាល់ៗ​មួយ ដែល​អាច​ឲ្យ​យានយន្ត​មើល​ឃើញ​ដូច​ជា​មនុស្ស​អ៊ីចឹង៕