ខ្លាំងណាស់! នៅអាស៊ីមានបុរសម្នាក់បំបែកកំណត់ត្រាវ៉ៃមិនចាញ់របស់ Floyd!

2020-06-22 06:55:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កំណត់ត្រាវ៉ៃមិនដែលចាញ់ 50-0 របស់ Floyd Mayweather មានអ្នកផ្ដួលបានហើយ ដោយនោះគឺជាកីឡាករ Wanheng Menayothin មានរហស្សនាមថា "Dwarf Giant"។ ការឈរនៅលើកំណត់ត្រាថ្មី ធ្វើឡើងបន្ទាប់កីឡាករថៃរូបនេះបានប្រកាសពីដំណឹងចូលនិវត្តន៍របស់ខ្លួនពីពិភពប្រដាល់ កាលពីថ្ងៃទី២១ ខែមិថុនា ឆ្នាំ២០២០ ជាមួយនឹងលទ្ធផលកន្លងមក 54-0។

កីឡាករថៃ Wanheng Menayothin

Floyd បានលាឈប់ពីប្រដាល់នៅឆ្នាំ២០១៧ ហើយកាលនោះជាពេលដែលកីឡាករសម្បូរលុយចាយរូបនេះបំបែកកំណត់ត្រាចាស់ 49-0 របស់កីឡាកររៀមច្បង Rocky Marciano។ កំណត់ត្រារបស់ Rocky ធ្វើឡើងនៅកំឡុងឆ្នាំ១៩៥៥ ហើយតាំងពីនោះមកគ្មាននរណាវ៉ាដាច់បានឡើយ មុនការលេចវត្តមានរបស់ Floyd។

កីឡាករ Floyd Mayweather

កីឡាករទម្ងន់ស្រាល WBC របស់ថៃវិញគឺ Menayothin បានចាប់តំណែងវ៉ាដាច់ Floyd បានតាំងពីខែសីហា ឆ្នាំ២០១៨ មកម៉្លេះ ដោយគ្រាន់តែកាលនោះលោកមិនទាន់ប្រកាសចូលនិវត្តន៍នៅឡើយទេ។ លុះមកទល់នឹងពេលបញ្ចប់អាជីពឈឺសាច់នេះ កីឡាករ Menayothin ធ្វើឲ្យកំណត់ត្រាខ្លួនហក់ឡើងដល់ទៅ 54-0 ឯណោះ។ Menayothin បាននិយាយថា៖ "ខ្ញុំបានសម្រេចចិត្តរួចហើយថាវាជារឿងល្អដែលឈប់ប្រដាល់។ ខ្ញុំដឹងពីខ្លួនខ្ញុំយ៉ាងណា។ គ្មាននរណាម្នាក់ដឹងពីខ្លួនប្រាណខ្ញុំជាងខ្ញុំទេ។... គ្រប់គ្នាចង់បានលុយ តែខ្ញុំត្រូវការពេលព្យាបាលខ្លួនប្រាណសិន"។

ទោះមានឈ្មោះឈរលើ Floyd ជាកីឡាករវ៉ៃមិនដែលចាញ់មែន តែបើនិយាយពីរឿងទ្រព្យសម្បត្តិវិញគឺ Menayothin ត្រូវកីឡាករសញ្ជាតិអាមេរិកវ៉ាដាច់ឆ្ងាយណាស់។ បច្ចុប្បន្ន Floyd មានទ្រព្យសម្បត្តិប្រមាណជា ៥០០លានដុល្លារ។ ដោយឡែកបើតាមវិបសាយព័ត៌មានមួយចំនួន បានប៉ាន់ស្មានថា Menayothin មានទ្រព្យសម្បត្តិចន្លោះពី ១លានដុល្លារ ដល់ ៥លានដុល្លារប៉ុណ្ណោះ៕

ប្រភព៖ The Sun ប្រែសម្រួល៖ ឈាង.