មន្ត្រីជាន់ខ្ពស់នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំង គ្រឿងញៀនបានលើក ឡើងថា ក្នុងរយៈពេល ៥ខែ ឆ្នាំ២០២០កន្លងមកនេះសមត្ថកិច្ចបានបង្រាបបទល្មើសគ្រឿងញៀនបានជាង៤ពាន់ករណី និងឃាត់ខ្លួនជនសង្ស័យជិត៩ពាន់នាក់។ ការលើកឡើង​នេះ ធ្វើឡើងក្នុងពិធីដុតបំផ្លាញគ្រៀងញៀននាឱកាសអបអរសាទទិវាអន្តរជាតិប្រយុទ្ធប្រឆាំងគ្រឿងញៀន នៅថ្ងៃទី២៦ ខែមិថុនា ឆ្នាំ២០២០នៅមជ្ឈមណ្ឌលសន្និបាត និងពិព័រណ៍កោះពេជ្រ

លោកនាយឧត្តសេនីយ៍ មាស វិរិទ្ធ អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានគូសបញ្ជាក់ថា ក្នុងរយៈពេល៥ខែ ដើមឆ្នាំ២០២០នេះ កាអនុវត្តផែនការយុទ្ធនាការប្រយុទ្ធប្រឆាំគ្រឿងញៀនខុសច្បាប់លើកទី៥ (ពីថ្ងៃទី០១ខែមករា ដល់ថ្ងៃទី៣១ ខែឧសភា ឆ្នាំ២០២០) របស់រាជរដ្ឋាភិបាលត្រូវបានចាត់តាំងអនុវត្តន៍យ៉ាងសកម្មនូវវិធានការគន្លឹះទាំង៥ រួមមាន៖ វិធានការអនុវវត្តន៍ច្បាប់ ដោយបង្ក្រាបបាន៤,៥១០ករណី ឃាត់ខ្លួនជនសង្ស័យបាន ៨ ៩២៧នាក់ រឹបអូសគ្រឿងញៀនបានជាង២០៩គីឡូក្រាម។

ចំពោះវិធានការអប់រំផ្សព្វផ្សាយ ដោយបានគ្រប់ដណ្តប់ទៅលើអ្នកមកទទួលយកសាអប់រំចំនួនជាង២លាន១សែននាក់។ ទន្ទឹមនេះ វិធានការព្យាបាល និងស្តារនីតិសម្បទាអ្នកញៀនគ្រឿងញៀនគ្រប់គ្រងបានអ្នកប្រើប្រាស់ និងអ្នកញៀនគ្រឿងញៀនចំនួន១ម៉ឺននាក់។ លោកនាយឧត្តសេនីយ៍បានបន្ថែមថា វិធានការដ្ឋបាលអនុវត្តន៍បានចំនួន៦០៥លើក លើ៩គោលដៅ និងបានធ្វើតេស្តរកសារធាតុញៀន លើមុខសញ្ញាមានតម្រុយប្រើប្រាស់គ្រឿងញៀនមួយចំនួនធំថែមទៀត។

ជាមួយគ្នានេះដែរ ក្នុងទិវាទិវាអន្តរជាតិប្រយុទ្ធប្រឆាំងគ្រឿងញៀន សម្ដេច ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ក៏បានអំពាវនាវឱ្យមាតាបិតា និងអាណាព្យាបាល បន្តយកចិត្តទុកដាក់ថែទាំ និងអប់រំកូនចៅឱ្យបានល្អ ដើម្បីឱ្យពួកគេលូតលាស់ធំធាត់ ប្រកបដោយសុខភាព និងសុវត្ថិភាព ចៀសផុតពីបញ្ហាគ្រឿងញៀន បញ្ហាកូវីដ-១៩ និងបញ្ហាអវិជ្ជមានក្នុងសង្គមផ្សេងៗទៀត៕

ប្រភព៖ ក្រសួងព៍ត៌មាន