បើគ្មានការប្រែប្រួលទេ នៅក្នុងខែ​កក្កដា ឆ្នាំ​២០២០នេះ ប្រទេសចំនួន៣ នឹង​បាញ់​បង្ហោះយានអវកាស ទៅភពអង្គារ រួមមាន អារ៉ាប់រួម ចិន និង​អាមេរិក។

• អារ៉ាប់រួម

យានអវកាស Hope គ្រោងនឹង​បាញ់​បង្ហោះ​ទៅភពអង្គារ នៅថ្ងៃទី​១៤ ខែកក្កដា។ យាន​នេះ​នឹងចំណាយពេល​ ២០០ថ្ងៃ ក្នុងការធ្វើដំណើរ បន្ទាប់មក​វានឹងចូលគន្លងភពអង្គារ។ Hope ​នឹង​ត្រូវចំណាយពេលយ៉ាងហោចណាស់ ២ឆ្នាំ ដើម្បី​សិក្សា​ពីអាកាសធាតុ និង​បរិយាកាស​ភពអង្គារ។

• ចិន

យាន​អវកាស Tianwen-1 គ្រោងនឹង​បាញ់​បង្ហោះ​ទៅ​ភពអង្គារ នាថ្ងៃទី២៣ ខែកក្កដា។ យាននេះ នឹងត្រូវដាក់នៅលើគន្លងភពអង្គារ ហើយ​ទម្លាក់យាន rover ចុះចតដើម្បីរុករក និង​វិភាគ​ផ្ទៃដីភព។

• អាមេរិក

យានអវកាស Perseverance របស់​អង្គការ​ NASA គ្រោងនឹង​បាញ់​បង្ហោះ​នៅថ្ងៃទី៣០ ខែកក្កដា។ បន្ទាប់មកនៅថ្ងៃទី១៨ ខែកុម្ភៈ ឆ្នាំ​២០២១ យាន​នេះ​នឹងចុះ​ចត​លើ​ផ្ទៃដីភពអង្គារ ត្រង់ចំណុចរណ្តៅ Jezero។ យាន​តម្លៃ ១,៧ពាន់លានដុល្លារនេះ នឹង​សិក្សា​អំពី​បរិយាកាស និង​ភូគព្ភសាស្រ្ត​របស់​ភពអង្គារ ព្រមទាំងខួងយក​គំរូថ្ម និងដី​មួយ​ចំនួន​ដើម្បី​ត្រៀមយកមកផែនដីវិញ។ បេសកកម្មនេះ គឺ​ដើម្បី​សិក្សាពីជីវិត​ដែល​កើតមានក្នុងអតីតកាលលើភពនេះ ពិសេស​គឺសម្រាប់បើកផ្លូវ​ក្នុង​ការបញ្ជូនមនុស្ស​ទៅភពអង្គារ​នាពេលខាងមុខ៕