ក្នុងចំណោមនគរ៣ សាមកុក នគរមួយណាដែលរលាយមុនគេ?

2020-08-11 08:14:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បន្ទាប់ពីការស្លាប់របស់ឆាវឆាវ និងការដួលរលំទាំងស្រុងនៃរាជវង្សហានក្នុងឆ្នាំ២២០នៃគ.ស ពេលនោះហើយជាពេលចាប់ផ្តើមកើតឡើងនូវនគរ៣ធំៗ ក្នុងប្រទេសចិន ឬហៅថា សាមកុក។

នគរដែលបង្កើតមុនគេ និងធំជាងគេ គឺនគរអ៊ួយ (Wei) ក្នុងឆ្នាំ២២០ ដែលគ្រងរាជ្យដោយឆាវភី កូនប្រុសរបស់ឆាវឆាវ។ ការប្រកាសបង្កើតនគរនេះ ក្រោយពេលដែលឆាវភី បង្ខំឱ្យស្តេចរាជវង្សហានចុងក្រោយ ដាក់រាជ្យ។

១ឆ្នាំក្រោយមក គឺនៅឆ្នាំ២២១ ដោយចង់ស្តាររាជវង្សហានឡើងវិញ លីវ ប៉ី ក៏សម្រេចប្រកាសបង្កើតនគរផងដែរឈ្មោះថា ស៊ូហាន (Shu Han)។ ចំណែកនគរដែលបង្កើតក្រោយគេ គឺនគរអ៊ូ (Wu) គ្រងរាជ្យដោយ ស៊ុន ឈាន ក្នុងឆ្នាំ២២៩។

ផែនទីនគរទាំង៣

នគរទាំង៣ខាងលើនេះ បានធ្វើសង្គ្រាមនឹងគ្នាអស់រយៈពេលជាច្រើនឆ្នាំ តែមិនចាញ់មិនឈ្នះ។ ប៉ុន្តែអ្វីៗចាប់ផ្តើមប្រែប្រួលនៅពេលដែលត្រកូលស៊ឺម៉ា ពោលគឺ ស៊ឺម៉ាអ៊ី និងកូនចៅជំនាន់ក្រោយ ចាប់ផ្តើមកាន់អំណាចពេញដៃ នៅក្នុងនគរអ៊ួយ។ ត្រកូលស៊ឺម៉ានេះហើយ ដែលជាអ្នកបញ្ចប់សម័យសាមកុក។

សូមបញ្ជាក់ថា នគរអ៊ូយ មានស្តេច ៥ជំនាន់ដែលសោយរាជ្យ រួមមាន ឆាវ ភី (២២០-២២៦), ឆាវ រី Cao Rui (២២៦-២៣៦), ឆាវ ហ្វាង (២៣៩-២៥៤), ឆាវ ម៉ាវ (២៥៤-២៦០) និង ឆាវ ហួន (២៦០-២៦៥)។

នៅឆ្នាំ២៤៩ សែរាជវង្សត្រកូលឆាវ បានចាប់ផ្តើមបាត់បង់អំណាច នៅពេលដែលស្តេច ឆាវ ហ្វាង ត្រូវកងទ័ពរបស់ស៊ឺម៉ាអ៊ី បះបោរបង្ក្រាបក្នុងពេលទៅសែនផ្នូរដូនតា។

តួស៊ឺម៉ាអ៊ី ក្នុងរឿងនគរ៣

នៅឆ្នាំ២៦៣ កូនប្រុសរបស់ស៊ឺម៉ាអ៊ី បានដឹកនាំទ័ពនគរអ៊ួយ ចូលឈ្លានពាននគរស៊ូហាន បានសម្រេច ដោយស្តេចស៊ូហាន ឈ្មោះ លីវ សាន (បុត្ររបស់ លាវ ប៉ី) សុំចុះចាញ់។ លីវ សាន ត្រូវបានត្រកូលស៊ីម៉ា ទុកជីវិតឱ្យរស់នៅសុខក្សេមក្សាន្ត ក្នុងក្រុងលូយ៉ាង របស់នគរអ៊ួយ។ ស៊ូហាន ជានគរដែលរលាយមុនគេ។

ចូលមកដល់ឆ្នាំ២៦៦ ស៊ឺម៉ាយាន (ចៅប្រុសរបស់ស៊ឺម៉ាអ៊ី) បានបង្ខំឱ្យស្តេច ឆាវ ហួន នៃនគរអ៊ួយ ដាក់រាជ្យ ហើយ ស៊ឺម៉ាយាន បានប្រកាសបង្កើតនគរថ្មីឈ្មោះ នគរជីន។ ដូច្នេះ នគរអ៊ួយ គឺជានគរទី២ ដែលរលាយ។

សល់ចុងក្រោយគេ គឺនគរអ៊ូ។ នគរនេះ មានស្តេច ៤ជំនាន់ រួមមាន ស៊ុន ឈាន (២២៩-២៥២), ស៊ុន លាំង (២៥២-២៥៨), ស៊ុន ហ្ស៊ី Sun Xiu (២៥៨-២៦៤) និង ស៊ុន ហាវ (២៦៤-២៨០)។ នគរអ៊ូ បានចាប់ផ្តើមចុះខ្សោយក្រោយពេលដែលស្តេច ស៊ុន ឈាន ចូលទីវង្គត។

នៅក្នុងឆ្នាំ២៧៩ នគរជីន របស់ត្រកូលស៊ឺម៉ា បានបើកការវាយលុកចូលនគរអ៊ូ និងទទួលបានជ័យជម្នះ។ ក្នុងឆ្នាំ២៨០ ស្តេច ស៊ុន ហាវ បានប្រកាសសុំចុះចាញ់ ហើយក៏ជាពេលបញ្ចប់សម័យសាមកុកនេះផងដែរ៕

ចុចអាន៖ នគរបី សាមកុក៖ ផ្នូររបស់ឆាវឆាវ ត្រូវគេរកឃើញ ចុះផ្នូររបស់ លីវ ប៉ី និង ស៊ុន ឈាន?

ប្រភព៖ chinahighlights