ក្រសួង​ការពារ​ជាតិកូរ៉េខាងត្បូង ទើបតែ​បាន​បញ្ចេញ​រូបគំរូ​នាវាផ្ទុកយន្តហោះថ្មីមួយ​ដោយដាក់ឈ្មោះថា «LPX-II» ដែល​ប្រើសម្រាប់​តែការចុះចត និងហោះឡើង​របស់​យន្តហោះចម្បាំង F-35B តែប៉ុណ្ណោះ។

នាវាថ្មីនេះ មានរូបរាង​ស្រដៀង​នឹងនាវាផ្ទុកឧទ្ធម្ភាគចក្រ​របស់កូរ៉េខាងត្បូងផងដែរគឺ នាវា Dokdo-class។ យ៉ាងណាមិញ គេមិនទាន់​ដឹងលម្អិតជុំវិញ​លក្ខណៈសម្បត្តិរបស់នាវា LPX-II នេះនៅឡើយទេ គ្រាន់តែដឹងថា វាអាចផ្ទុកទម្ងន់ដល់ ៣ម៉ឺនតោន ឬអាចផ្ទុកយន្តហោះ F-35B ប្រហែល ២០គ្រឿង។

សូមជម្រាប​ថា ក្រុមហ៊ុនផលិតនាវារបស់កូរ៉េខាងត្បូង Hyundai Heavy Industries បាន​ទទួលកិច្ចសន្យា​ក្នុងការឌីហ្សាញ​នាវា LPX-II នេះ កាលពីខែតុលា ឆ្នាំ​២០១៩។ ពេលនោះ ក្រុមហ៊ុនរំពឹងថា ការរចនានឹងរួចរាល់​ត្រឹមពាក់កណ្តាលឆ្នាំ​២០២០នេះ ហើយគ្រោងនឹង​ផលិត ព្រមទាំងអាចឱ្យកូរ៉េប្រើបាន នៅអំឡុងឆ្នាំ​២០៣០៕