ទាហានកូរ៉េខាងជើង ៣នាក់ត្រូវចាប់ខ្លួន ដោយសាររាំបទរបស់ BTS

2020-08-14 10:09:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកគាំទ្រ BTS ទូទាំងពិភពលោក អាចនឹងមានអារម្មណ៍ថាពួកគេត្រូវបានឃ្លាំមើល និងវាយតម្លៃពីនេះពីនោះពីមហាជន ដោយគ្រាន់តែពួកគេស្ដាប់បទចម្រៀងរបស់ BTS។ ប៉ុន្តែថ្មីៗនេះរឿងមួយបានផ្ទុះឡើងខ្លាំង ទាក់ទងនឹងទាហាន ៣នាក់មកពីកូរ៉េខាងជើង ដែលត្រូវភ័យខ្លួន ដោយសារពួកគេរាំបទចម្រៀងរបស់តារាប្រុសល្បីកំពូលរបស់កូរ៉េខាងត្បូង BTS។

នៅយប់ថ្ងៃទី ០៥ ខែសីហា មានសេចក្ដីរាយការណ៍មកថា ទាហានវ័យក្មេង ៣នាក់នោះ មានអាយុខ្ទង់ ២០ឆ្នាំជាង បានភ្លេចខ្លួនរាំបទ BTS ពេលធ្វើដំណើរអំឡុងពេលបេសកកម្ម People’s Army។ នៅតាមផ្លូវ ពេលដល់ពេលត្រូវលម្ហែអារម្មណ៍ជាមួយគ្នា ទាហាន ៣នាក់ដែលមកពីទ័ពអាកាស ក៏ចាប់ផ្ដើមរាំ។

ចៃដន្យពេលអ្នកអង្កេតការណ៍ម្នាក់ដែលជាក្រុមការងារមកពីទីភ្នាក់ងារសន្តិសុខការពារជាតិចាប់អារម្មណ៍ថា យុវជន ៣នាក់នោះរាំបទ «Blood Sweat & Tear» របស់ BTS ពួកគេក៏បានឲ្យក្រុមសន្តិសុខចាប់ខ្លួនតែម្ដង។

ពេលនាំខ្លួនទៅសួរចម្លើយពីអ្វីដែលបានកើតឡើង ទាហានទាំង ៣ ក៏បាននិយាយថា ពួកគេមិនបានដឹងថាវាជាបទរបស់ BTS ទេ ហើយមួយទៀតក្បាច់រាំ ដែលពួកគេរាំក៏មិនដូចក្បាច់រាំរបស់បទនេះដែរ តែជាក្បាច់រាំ «Exciting Boy Scout Dance» ដែលពួកគេធ្លាប់ហាត់ទៅវិញទេ។ កាន់តែធំធេងនោះ គឺថាដោយសារហេតុការណ៍នេះ ទើបនាំឲ្យមានការត្រួតពិនិត្យកងទ័ពកូរ៉េខាងជើងទាំងមូលជាថ្មី។

មកទល់ពេលនេះមិនទាន់មានការបញ្ជាក់នៅឡើយថា តើទាហានទាំង ៣ដែលត្រូវបានចាប់ខ្លួននោះ នឹងត្រូវទទួលពិន័យបែបណាទេ ប៉ុន្តែមហាជនសង្ឃឹមថានឹងមិនធ្ងន់ធ្ងរ។ វាពិតជាពិបាកស្រមៃណាស់ដែលអ្នកណាម្នាក់មកត្រូវរងពិន័យ ឬត្រូវចាប់ខ្លួន ដោយត្រឹមតែសកម្មភាពធម្មតា ដូចជាស្ដាប់ចម្រៀង ឬរាំលេងបែបនេះ តែយ៉ាងណានេះជាវិន័យរបស់ប្រទេសកូរ៉េខាងជើង ដែលប្រជាជនត្រូវតែគោរពតាម៕

ប្រភព៖ Koreaboo ប្រែសម្រួល៖ យី សុធារី