ក្រសួងការពារជាតិអាមេរិក បាន​ចេញសេចក្តីថ្លែងការណ៍​កាលពីថ្ងៃទី២៧ ខែសីហា ឆ្នាំ​២០២០ ថ្កោលទោស​ប្រទេសចិន ដែលបាន​បាញ់មីស៊ីលបាលីស្ទីក​ចូល​ក្នុងសមុទ្រចិនខាងត្បូង ដោយថា​នេះ​ជាការគំរាមកំហែងដល់សន្តិភាព និង​សន្តិសុខ​ក្នុងតំបន់។

សេចក្តីថ្លែងការណ៍នោះ​លើកឡើងថា កងទ័ពចិន​បាន​បាញ់​មីស៊ីល​បាលីស្ទីក ៤​គ្រាប់ ក្នុង​អំឡុងធ្វើសមយុទ្ធ​យោធា​នៅ​ជុំវិញ​កោះប៉ារ៉ាសែល ហើយ​បាន​ហៅថា ជា​សកម្មភាព​បំពាន​សេចក្តីប្រកាស ២០០២ (2002 Declaration)។ សេចក្តីប្រកាសនេះ គឺ​ធ្វើឡើង​ដើម្បីបញ្ចៀស​សកម្មភាពណាមួយដែល​នាំឱ្យ​មានភាពតានតឹង​ ឬបង្កជម្លោះ​ប៉ះពាល់​ដល់ស្ថិរភាព និង​សន្តិភាព។

មន្ទីរបញ្ចកោណ​បន្តថា សមយុទ្ធយោធារបស់ចិន ពីថ្ងៃទី២៣ ដល់ ២៩ ខែសីហា ឆ្នាំ​២០២០ នៅម្តុំកោះប៉ារ៉ាសែល គឺ​ជាសកម្មភាព​ដែលអះអាងថា​ជាតំបន់សមុទ្ររបស់ខ្លួន​ដោយ​ខុសច្បាប់ ហើយ​កេងយកចំណេញ​ពីប្រទេស​អាស៊ាន​ដែលនៅជិតខ្លួន។

គួរ​រំលឹក​ថា កាលពីថ្ងៃទី២៦ ខែសីហា ឆ្នាំ​២០២០ ចិន​បានបាញ់​មីស៊ីលប្រឆាំង​យន្តហោះ​ចូលទៅក្នុងសមុទ្រចិនខាងត្បូង ត្រង់ចន្លោះ​ខេត្តហៃណាន់ និងកោះប៉ារ៉ាសែល។ ការបាញ់មីស៊ីលនេះ ធ្វើឡើង​ក្រោយពេល​ដែល​អាមេរិក បាន​បញ្ជូនយន្តហោះចារកម្ម U-2 ចូលក្នុងតំបន់គ្មានការហោះហើរ ដោយគ្មាន​ការអនុញ្ញាត​ក្នុងសមុទ្រចិនខាងត្បូង ក្នុងអំឡុងពេលចិន ធ្វើសមយុទ្ធទ័ពជើងទឹក៕