រដ្ឋាភិបាលថៃ បាន​បង្ហាញពីការចង់ផ្លាស់ប្តូរគំនិត​ពីការសាងសង់ព្រែកជីកក្រា (Kra Canal) មកសង់កំពង់ផែទឹកជ្រៅចំនួន២ ផ្លូវដែក១ និងផ្លូវហាយវេ ១ វិញ។ ការសិក្សាផែនការ គ្រោងនឹង​ចំណាយប្រមាណ ៥,៣លានដុល្លារ។ នេះបើតាមការបញ្ជាក់របស់​លោក Saksiam Chidchob រដ្ឋមន្រ្តី​ដឹកជញ្ជូនថៃ ក្នុងកិច្ចសម្ភាសន៍មួយជាមួយ សារព័ត៌មាន Bloomberg កាលពីសប្តាហ៍មុន។

លោក​អះអាងថា ការសង់កំពង់ផែ និងផ្លូវដែកនេះ គឺចំណាយតិចជាង និងមានផលប៉ះពាល់បរិស្ថានតិចជាងការសាងសង់​ព្រែកជីកក្រា។ «ការប្រើប្រាស់​ផ្លូវជម្រើសមួយ ឆ្លងតាម​ប្រទេសថៃ នឹង​កាត់បន្ថយ​ពេល​វេលាដឹកជញ្ជូនជាង ២ថ្ងៃ ដែល​នេះគឺមានតម្លៃណាស់​សម្រាប់​ពាណិជ្ជកម្ម»។

សូមរំលឹក​ថា កាលពីឆ្នាំ២០១៥ ថៃ និងចិន បានចុះ MoU ស្តីពីគម្រោង​សាងសង់​ព្រែកជីកក្រា ប្រវែង ១០០គីឡូម៉ែត្រ ទទឹង ៤០០ម៉ែត្រ នៅភាគខាងត្បូងបំផុត​នៃប្រទេសថៃ ដែល​ភ្ជាប់ពី​ឈូងសមុទ្រថៃ ទៅសមុទ្រអានដាម៉ាន់។ ការធ្វើដំណើរតាមព្រែកជីកនេះ គឺលឿនជាងខ្លាំងណាស់​ពីការធ្វើដំណើរ​តាមច្រកសមុទ្រ​ម៉ាឡាកា។ ប៉ុន្តែគម្រោងសង់ព្រែកជីកនេះ អាចនឹងចំណាយដល់ ២៨ពាន់លានដុល្លារឯណោះ៕

ប្រភព៖ Global Construction Review