ថ្ងៃនេះ សិស្សចូលរៀនវិញហើយ ក្រោយផ្អាកកន្លះឆ្នាំដោយសារកូវីដ (បណ្តុំរូបភាព)
- 2020-09-07 01:24:13
- ចំនួនមតិ 0 | ចំនួនចែករំលែក 0
ថ្ងៃនេះ សិស្សចូលរៀនវិញហើយ ក្រោយផ្អាកកន្លះឆ្នាំដោយសារកូវីដ (បណ្តុំរូបភាព)
ចន្លោះមិនឃើញ
នៅថ្ងៃទី៧ ខែកញ្ញា ឆ្នាំ២០២០នេះ សិស្សានុសិស្សបានចូលរៀនវិញហើយតាមគ្រឹះស្ថានសិក្សាមួយចំនួន ក្នុងដំណាក់កាលទី២ បន្ទាប់ពីផ្អាកប្រមាណកន្លះឆ្នាំ ដោយសារបញ្ហាជំងឺកូវីដ១៩។ ការចូលរៀនវិញនេះ ធ្វើឡើងខណៈកម្ពុជា មិនមានករណីកូវីដ១៩ ប៉ុន្មានថ្ងៃជាប់គ្នាមកហើយ និងមានករណីជាសះស្បើយជាបន្តបន្ទាប់។
យ៉ាងណាមិញ ក្រសួងអប់រំបញ្ជាក់ថា ការបើកដំណើរការសិក្សាដំណាក់កាលទី២ ឡើងវិញនេះ មិនមែនបើកទាំងប្រថុយប្រថាននោះទេ គឺបើកដំណើរការប្រកបដោយសុវត្ថិភាព ដោយអនុវត្តតាមស្តង់ដា SOP តាមការណែនាំរបស់ក្រសួងសុខាភិបាល សាលាត្រូវធានាបាននូវសុវត្ថិភាព អនាម័យ រៀបចំនូវហេដ្ឋារចនាសម្ព័ន្ធ សមស្រប ពិសេសធានានូវគម្លាតសុវត្ថិភាព ជៀសវាសកុំឱ្យសិស្សជួបជុំគ្នា ដោយមានការត្រួតពិនិត្យត្រឹមត្រូវ ដើម្បីជៀសវាងនូវការឆ្លងរីករាលដាលនៃជំងឺកូវីដ១៩។
តាមរយៈសេចក្ដីណែនាំរបស់ក្រសួងអប់រំ យុវជន និងកីឡា បានចែងថា សាលារៀន ត្រូវរៀបចំបរិស្ថានសិក្សាប្រកបដោយសុវត្ថិភាព បរិយាបន្ន ផាសុកភាព និងមេត្រីភាព កៅអីអង្គុយសម្រាប់សិស្សានុសិស្ស ត្រូវរក្សាគម្លាតសុវត្ថិភាពយ៉ាងហោចណាស់២ម៉ែត្រ និងរៀបចំចំណុះថ្នាក់ ដោយកំណត់សិស្សមិនឱ្យលើសពី១៥ ទៅ២០នាក់ក្នុងមួយថ្នាក់ កាត់បន្ថយការប្រមូលផ្ដុំជាដើម។
សូមជម្រាបថា សាលារៀនទាំងអស់ ក្នុងប្រទេសកម្ពុជា នឹងបើកដំណើរការឡើងវិញ តាម ៣ដំណាក់កាល រួមមាន ដំណាក់កាលទី ១ គឺបើកសម្រាប់តែសាលារៀន ដែលមានស្តង់ដារសុវត្ថិភាពខ្ពស់។ ចំណែកដំណាក់កាលទី ២ នឹងបើកដំណើរការ សម្រាប់សាលារៀន ដែលមានស្តង់ដារមធ្យម ខណៈដំណាក់កាលទី ៣ នឹងបើកចំពោះសាលារៀន ដែលមានស្តង់ដារអប្បបរមា។ ដូច្នេះជារួម ការបើកដំណើរការឡើងវិញនេះ គឺមិនមែនគ្រប់សាលារៀនទាំងរដ្ឋ និងឯកជន អាចបើកទ្វារទទួលសិស្សានុសិស្សរួមគ្នានោះទេ៕
សូមទស្សនាទិដ្ឋភាពសិស្សចូលរៀននៅវិទ្យាល័យជាស៊ីមសន្ធរមុខ ដូចខាងក្រោម៖