សិស្សានុសិស្សតំណាងព្រះរាជាណាចក្រកម្ពុជាចំនួន ២ក្រុមទទួលបានពានរង្វាន់ពីកម្មវិធីប្រកួតប្រជែងអន្តរជាតិផ្នែកបច្ចេកវិទ្យា e-ICON លើកទី១០ តាមប្រព័ន្ធអេឡិត្រូនិកដែលរៀបចំដោយ Korea Education Frontier Association នៃក្រសួងអប់រំសាធារណរដ្ឋកូរ៉េ។

ក្រុមដែលមកពីវិទ្យាល័យហ៊ុនសែនកំពង់ចាម បានបង្កើតកម្មវិធីទូរស័ព្ទមានឈ្មោះថា "Cleaning Water Advanture Quiz" ដែលជាល្បែងសិក្សាសម្រាប់ឱ្យអ្នកប្រើប្រាស់យល់ដឹងអំពីទឹកស្អាត និងអនាម័យជាប្រចាំថ្ងៃដើម្បីរក្សាសុខភាពឱ្យបានល្អ ទទួលបានជ័យលាភីលេខ២ យុវសិស្ស អឿ ធាមៈនី មកពីវិទ្យាល័យហ៊ុនសែនកំពង់ចាម និងយុវសិស្ស ហេង ពុធភា មកពីវិទ្យាល័យហ៊ុនសែនកំពង់ចាម។

ក្រុមដែលមកពីវិទ្យាល័យព្រះយុគន្ធរ (កម្មវិធី E2STEM Education) បានបង្កើតកម្មវិធីទូរស័ព្ទមានឈ្មោះថា "Medic Kit" ដែល ផ្ដល់ភាពងាយស្រួលដល់អ្នកប្រើប្រាស់ក្នុងការប្រើប្រាស់ និងស្វែងរកសម្ភារៈអនាម័យដូចជាទឹកលាងដៃ ម៉ាស ជាដើម ដែលទទួលស្គាល់ដោយស្ថាប័នក្នុងប្រទេស ឬតំបន់ ទទួលបានជ័យលាភីលេខ៣ យុវសិស្ស ពូន វីរៈរ័ត្ន មកពីវិទ្យាល័យព្រះយុគន្ធរ (E2STEM Education) និងយុវសិស្ស ស៊ីណាត រតនា មកពីវិទ្យាល័យព្រះយុគន្ធរ (E2STEM Education)។

ក្នុងកម្មវិធីនេះ សិស្សកម្ពុជាបានចែកជា ០៣ក្រុម រួមគ្នាជាមួយសិស្សកូរ៉េចំនួន២នាក់ក្នុង១ក្រុម បានសហការគ្នា អភិវឌ្ឍកម្មវិធីទូរស័ព្ទ ដើម្បីចូលរួមចំណែក លើកកម្ពស់គោលដៅអភិវឌ្ឍន៍ ប្រកប​ដោយ​ចីរភាពទី ៦ ដែលជម្រុញសកម្មភាពឆ្ពោះទៅរកការទទួលបានជាសកលនូវការគ្រប់គ្រងទឹកស្អាត និងអនាម័យដោយសុវត្ថិភាព។

គូស​បញ្ជាក់​ថា ក្រសួងអប់រំ យុវជន និងកីឡា តាមរយៈនាយដ្ឋានបច្ចេកវិទ្យាព័ត៌មានបានបញ្ជូនគ្រូចំនួន ០៣រូប និងសិស្សចំនួន ០៦រូប ដើម្បីចូលរួមក្នុងកម្មវិធី ប្រកួតប្រជែង ស្ដីពី e-Learning International Contest of Outstanding New Ages (e-ICON) លើកទី១០ តាមប្រព័ន្ធអេឡិត្រូនិកដែលរៀបចំដោយ Korea Education Frontier Association នៃក្រសួងអប់រំសាធារណរដ្ឋកូរ៉េ។

ប្រភព៖ ក្រសួងអប់រំ