ឡដុតសំរាម នៅស្រុកបន្ទាយស្រី ចាប់ផ្ដើមដំណើរការសាកល្បងហើយ

  • 2020-09-24 02:32:18
  • ចំនួនមតិ 7 | ចំនួនចែករំលែក 67

ចន្លោះមិនឃើញ


លោក ឃឹម ហ្វីណង់ អភិបាលស្រុកបន្ទាយស្រី បាន​ឱ្យដឹង​នៅ​ថ្ងៃ​ទី ២៤ កញ្ញានេះ​ថា ស្រុក​នេះបាន​ដំណើរការ​សាកល្បង​ឡដុតសំរាម​រួម​ជាលើកដំបូង កាលពីពេលថ្មីៗនេះ នៅក្នុងឃុំរំចេក។

លោកបញ្ជាក់​ថា សំរាមជាច្រើនតោន មក​ពី​គ្រប់​ទិស​ទី​នៅក្នុងស្រុកបន្ទាយស្រី ដែល​បានកកស្ទះ សេសសល់រាយប៉ាយនៅតាមទីសាធារណៈ នៅ​ក្នុង​ភូមិ និងតាមដងផ្លូវនានាជាយូរមកហើយ ជា​ពិសេស​សំរាម​ថ្មី​ដែល​បាន​បន្សល់​ទុក​ក្រោយ​ថ្ងៃ​សម្រាក​បុណ្យ​ភ្ជុំបិណ្ឌ ត្រូវ​បាន​ប្រមូល​យក​មក​ដុត​ជា​លើក​ទីមួយ​នៅ​ក្នុង​ទីលាន​ឡដុត​សំរាម​នេះ ក្រោយពីបានហាលសម្ងួត និង​ញែក​យកសំរាមដែលអាចលក់អេតចាយ និងអាចកែច្នៃបានរួចមក។

លោកអភិបាលស្រុកបន្ថែម​ថា ចាប់ពីថ្ងៃនេះតទៅ ប្រជាពលរដ្ឋ​នៅ​គ្រប់​ភូមិទាំង​អស់​នៅ​ក្នុង​ស្រុក​បន្ទាយ​ស្រី​អាច​ជញ្ជូន​យក​សំរាម​ប្រចាំថ្ងៃ​របស់​ខ្លួន​ទៅ​ដាក់​ដោយ​ខ្លួន​ឯង​នៅ”កន្លែង​រក្សាទុក​សំរាម​បណ្តោះ​អាសន្ន” ដែលត្រូវបានរៀបចំរួចជាស្រេចជាច្រើនកន្លែងនៅតាមភូមិរបស់ខ្លួននីមួយៗ។ សេវា​នេះ​គឺ​ជា​សេវា​មិនគិតថ្លៃសម្រាប់ប្រជាពលរដ្ឋទូទៅ តែតម្រូវឱ្យមានការញែកសំរាម និង​វេចខ្ចប់​ត្រឹម​ត្រូវ​មុន​នឹង​យក​មករក្សាទុក រង់ចាំ​ក្រុម​ការងារ​របស់​ឃុំ​និងស្រុក​ធ្វើការ​ប្រមូល​បន្ត​មក​កាន់​ទីលាន​ឡដុត​សំរាម​ជា​ប្រចាំ។

«ជាមួយនឹងយន្តការថ្មីនេះ បងប្អូន​ប្រជាពលរដ្ឋ​មិន​ចាំបាច់​ដុតសំរាម​នៅ​តាម​ផ្ទះ​រៀងៗខ្លួន រឺដឹកយក​ទៅចាក់ចោលតាមដីទំនេរជាអនាធិបតេយ្យទៀតទេ។ នៅ​ក្រោយ​ពេល​ដែល​យន្ត​កា​រថ្មីនេះ​ដំណើរការទៅបានរលូន រដ្ឋបាល​ស្រុកនឹង​រៀបចំ​ឱ្យមាន​ការផាក​ពិន័យ​ចំពោះ​ការ​ចោល​សំរាមរាយប៉ាយនៅតាមទីសាធារណៈ ក៏ដូច​​ជាការ​ហាមឃាត់​មិនឱ្យ​មាន​ការ​ដុត​សំរាម​នៅ​តាម​ផ្ទះរៀងៗខ្លួន ដែល​នាំឱ្យ​ប៉ះពាល់​ដល់សុខភាពនិងគុណភាពខ្យល់ដកដង្ហើមនៅក្នុងភូមិ»។ នេះបើតាមការបញ្ជាក់របស់​លោក ឃឹម ហ្វីណង់៕

ប្រភព៖ ហ្វេសបុក លោក ឃឹម ហ្វីណង់

;