ប្រាសាទរាងពីរ៉ាមីតមួយ មានឈ្មោះថា «Yonaguni Monument» ត្រូវបាន​អ្នកមុជទឹកម្នាក់រកឃើញ​នៅបាតសមុទ្រ​ក្បែរកោះ Yonaguni ប្រទេសជប៉ុន តាំងពីឆ្នាំ១៩៨៦មក ហើយរហូតមកដល់ពេលនេះ អ្នកស្រាវជ្រាវនៅតែមិនទាន់អាចកំណត់ជាក់លាក់បានទេថា វាជាប្រាសាទដែលសង់ឡើងដោយមនុស្ស ឬកើតឡើងដោយធម្មជាតិ។

** ទាញយក App Kley Kley នៅលើ Android និង iOS ដើម្បី​ទទួលបាន​ព័ត៌មាន​លឿនរហ័ស **

ប្រាសាទនេះ មាន​ប្រវែងជាង ៥០ម៉ែត្រ និង​ទំហំ ២០ម៉ែត្រ។ បន្ទាប់ពីការរកឃើញ គឺមាន​អ្នកស្រាវជ្រាវជាច្រើន បាន​ចុះមុជទឹក​ទៅទីតាំង​នោះ ដើម្បី​សិក្សាពី​ប្រភព​ដើម​នៃការកើតឡើង​នៃប្រាសាទ ប៉ុន្តែ​នៅតែស្រពិចស្រពិល។

មាន​ការលើកឡើងខ្លះថា ប្រាសាទដែលសង់ជារាងពីរ៉ាមីតបែបនេះ គឺប្រាកដជាសង់​ដោយមនុស្សហើយ។ លើសពីនេះ ថ្មប្រាសាទខ្លះ មានឆ្លាក់ទៀតផង។ ប្រាសាទនេះ ត្រូវបានសន្និដ្ឋានថា សាងសង់ឡើង​ក្នុងអរិយធម៌ Mu ឬ Lemuria ដែលមានអាយុកាលតាំងពី ៥ពាន់ឆ្នាំមុន។ ក្រោយមក​ក្រុងបុរាណ​ក្នុងសម័យនោះ ត្រូវបានលិចលង់។

យ៉ាងណាក្តី អ្នកស្រាវជ្រាវផ្សេងទៀត បាន​អះអាងថា វាជាប្រាសាទ​ដែលកើតឡើង​ពីធម្មជាតិ ដោយផ្អែកលើស្លាកស្នាមនៃ​បំណែកថ្មប្រាសាទ ក្នុងនោះគឺមានរន្ធតូចៗ​ជាខ្សែបន្ទាត់​លើថ្ម ដែល​បង្កើតឡើងដោយសត្វសមុទ្រ។ ចំណែក​ជញ្ជាំងប្រាសាទដែល​មានការសរសេរ ឬឆ្លាក់នោះ គឺមិនមែនឡើយ ពោលគឺវាគ្រាន់​តែជាការសឹករិចរិលដោយ​ធម្មជាតិ​តែប៉ុណ្ណោះ៕