មន្រ្តីឧទ្យានុរក្សដែនជម្រកសត្វព្រៃកែវសីមា និងក្រុមការងារអភិរក្សនិងអនុវត្តច្បាប់ចល័ត កាលពីថ្ងៃទី២១ ខែតុលា ឆ្នាំ២០២០ បានលែងសត្វស្វាស្រូវចំនួន៣ក្បាល និងសត្វសំពោច១ក្បាល ឲ្យចូលទៅរស់នៅក្នុងព្រៃធម្មជាតិវិញនៅចំណុចព្រៃក្នុងភូមិសាស្រ្តរបៀងអភិរក្សជីវៈចម្រុះឦសាន។

** ទាញយក App Kley Kley នៅលើ Android និង iOS ដើម្បី​ទទួលបាន​ព័ត៌មាន​លឿនរហ័ស **

ការលែងសត្វព្រៃទាំង ៤ក្បាលឲ្យចូលទៅរស់នៅក្នុងព្រៃធម្មជាតិវិញខាងលើនេះ ធ្វើឡើងបន្ទាប់ពីមន្រ្តីកងរាជអាវុធហត្ថស្រុកកែវសីមា កាលពីល្ងាចថ្ងៃទី២០ ខែតុលា ឆ្នាំ២០២០ បានស្ទាក់ចាប់ឃាត់សកម្មភាពក្រុមជួញដូរសត្វព្រៃមួយក្រុមដែលបានបើកម៉ូតូមួយគ្រឿងដឹកសត្វស្វាចំនួន៣ក្បាល ខណៈឃើញសមត្ថកិច្ចក៏រត់គេចខ្លួនបាត់អស់ ក្រោយមកសមត្ថកិច្ចក៏ប្រគល់សត្វស្វាទាំង៣ក្បាលទៅឲ្យមន្រ្តីជំនាញបរិស្ថានដើម្បីបន្តការជួយសង្រ្គោះ និងអភិរក្ស។

ដោយឡែកសត្វសំពោច១ក្បាល ដែលត្រូវមន្រ្តីឧទ្យានុរក្សដែនជម្រកសត្វព្រៃកែវសីមាជួយសង្រ្គោះ និងដកហូតបានពីប្រជាពលរដ្ឋ ក៏ត្រូវបានមន្រ្តីឧទ្យានុរក្សអប់រំណែនាំ និងធ្វើកិច្ចសន្យាឲ្យបញ្ឈប់ការប្រព្រឹត្ត៕

ប្រភព៖ មន្ទីរបរិស្ថានខេត្តមណ្ឌលគិរី