បន្ទាប់ពីមានពាក្យចចាមអារាមថា ក្រុមបាតុករ​មួយគ្រោងធ្វើរដ្ឋប្រហារ​ទម្លាក់រដ្ឋាភិបាលថៃ​របស់លោកនាយករដ្ឋមន្រ្តី ប្រាយុទ្ធ ចាន់អូចា ប៉ុន្តែលោក​បានបញ្ជាក់អះអាង​វិញថា គ្មាននរណាម្នាក់​ចង់ធ្វើបែបនេះនោះទេ។

ថ្លែងទៅកាន់​អ្នកកាសែត​ ក្រោយកិច្ចប្រជុំ​មួយនៅក្រសួងការពារជាតិថៃ កាលពីថ្ងៃទី៣០ ខែតុលា ឆ្នាំ​២០២០ លោក​ប្រាយុទ្ធ បាន​លើកឡើង​យ៉ាងដូច្នេះថា៖ «យើងមិនដែល​គិត​ពីរឿងនេះទេ។ យើងត្រូវការ​ភាព​ប្រុងប្រយ័ត្ន​ និងទប់ស្កាត់​ស្ថានភាព​បច្ចុប្បន្ន​កុំឱ្យកើនឡើង​បន្ថែមទៀត»។

លោកបន្តថា «ខ្ញុំ​មិនមែនថាមាន​ការធ្វើរដ្ឋប្រហារ ឬអត់ទេ ប៉ុន្តែគ្មាន​នរណាម្នាក់​ចង់​ធ្វើរឿងហ្នឹងទេ»។

គួររំលឹក​ដែរថា ខណៈដែល​ប្រជាជន​ថៃ ដែលសុទ្ធតែជាយុវជននោះ បានធ្វើបាតុកម្មទាមទារ​ឱ្យ​លោកប្រាយុទ្ធ ចុះចេញពីតំណែង លោកស្រី យីងឡាក់ អតីតនាយករដ្ឋមន្រ្តីថៃ បាន​សរសេរតាមទំព័រហ្វេសប៊ុករបស់លោកស្រី រំលឹក​អំពីព្រឹត្តិការណ៍ស្រដៀងគ្នានេះ កាលពី៦ឆ្នាំមុន។

លោកស្រីបញ្ជាក់​ថា៖ «ថ្ងៃនេះ ព្រឹត្តិការណ៍ដូចគ្នា​បាន​កើតឡើង​ចំពោះ​លោកប្រាយុទ្ធវិញហើយ។ និស្សិត បងប្អូនប្រុសស្រី ចង់​ឃើញប្រទេសផ្លាស់ប្តូរ ហើយ​ពួកគេ​អំពាវនាវឱ្យលោកប្រាយុទ្ធ ចុះចេញ និង​ធ្វើវិសោធនកម្មរដ្ឋធម្មនុញ្ញ។ ខ្ញុំបាន​តាមដាន​ស្ថានភាព​ក្នុងប្រទេស​ដោយក្តីបារម្ភ»។ វាបាន​រំលឹកខ្ញុំ​ពីពេល​ដែលអ្នក (ប្រាយុទ្ធ) ស្នើខ្ញុំដូច្នេះកាលពី ៦ឆ្នាំមុន ថាខ្ញុំយល់ព្រមឬអត់។ ហើយ​ខ្ញុំសង្ឃឹមថា អ្នក​នឹងចងចាំថ្ងៃនោះ ហើយធ្វើការសម្រេចចិត្ត​ដោយឆាប់រហ័ស ដើម្បី​ឱ្យប្រទេស​ស្ងប់ស្ងាត់​ និង​ដើរទៅមុខ»៕