សម្តេច ហ៊ុន សែន៖ ច្បាប់ក្នុងគ្រាមានអាសន្ន មានក្នុងដៃរួចហើយ

2020-11-10 02:15:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហ៊ុន សែន បានអំពាវនាវជាថ្មីម្តងទៀត និងច្រើនលើកច្រើនសារ ឱ្យអ្នកពាក់ព័ន្ធនឹងព្រឹត្តិការណ៍៣វិច្ឆិកា ធ្វើចត្តាឡីស័កឱ្យបានត្រឹមត្រូវបំផុត ដោយសម្តេចថា ការអំពាវនាវនេះធ្វើឡើងនៅមុនពេលដែលសម្តេចស្នើសុំព្រះមហាក្សត្រដាក់ប្រទេសក្នុងគ្រាមានអាសន្ន ខណៈច្បាប់នេះបានចូលជាធរមានរួចហើយ។

តាមរយៈសារជាសំឡេងកាលពីយប់មិញ សម្តេច ហ៊ុន សែនបានលើកឡើងយ៉ាងដូច្នេះថា៖

«ខ្ញុំសង្ឃឹមថា ការអំពាវនាវរបស់ខ្ញុំនេះ ធ្វើឡើងនៅមុនពេលដែលខ្ញុំកំពុងតែគិតថា តើត្រូវប្រកាសបិទទីក្រុងភ្នំពេញ ឬផ្នែកណាមួយនៅក្នុងប្រទេសឬទេ។ ព្រោះច្បាប់ក្នុងគ្រាមានអាសន្ន មានក្នុងដៃរួចហើយ។ ខ្ញុំអាចនឹងស្នើព្រះមហាក្សត្រ ដើម្បីឡាយព្រះហត្ថលេខាដាក់ប្រទេសជាតិក្នុងផ្នែកណាមួយ ឬទីក្រុងភ្នំពេញ ឬក្នុងប្រទេសទាំងមូលក្នុងគ្រាមានអាសន្នបាន។ ក៏ប៉ុន្តែខ្ញុំមិនចង់ទៅដល់ហ្នឹងទេ ព្រោះវាប៉ះពាល់ទៅដល់សិទ្ធិសេរីភាពមនុស្សច្រើនគ្នា»។

សូមជម្រាបថា ការដាក់ប្រទេសជាតិស្ថិតក្នុងភាពអាសន្ន អាចធ្វើឡើងនៅពេលដែលប្រជាជាតិប្រឈមមុខនឹងគ្រោះថ្នាក់ ជាអាទិ៍ គ្រោះថ្នាក់ដែលបង្កឡើងដោយសង្គ្រាម ឬការឈ្លានពានពីកម្លាំងបរទេស គ្រោះអាសន្នបន្ទាន់ចំពោះសុខភាពសាធារណៈបណ្តាលមកពីការឆ្លងរាលដាលនៃជំងឺ ភាពវឹកវរធ្ងន់ធ្ងរដល់សន្តិសុខជាតិ និងសណ្តាប់ធ្នាប់សាធារណៈ ព្រមទាំងគ្រោះមហន្តរាយធ្ងន់ធ្ងរ ដែលគំរាមកំហែង ឬអាចបង្កគ្រោះថ្នាក់រីករាលដាល់ដល់កម្រិតទូទាំងប្រទេស។ នេះបើយោងតាមច្បាប់ស្តីពី ការគ្រប់គ្រងប្រទេសជាតិស្ថិតក្នុងភាពអាសន្ន៕