ចិត្តធ្ងន់! ប្ដីប្រពន្ធតារាហុងកុង១០គូ សុខចិត្តខាំមាត់ខន្តីអំពើផិតក្បត់របស់ដៃគូ

2020-11-11 01:18:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅក្នុងរឿងមនោសញ្ចេតនាតារា អំពើផិតក្បត់មិនមែនជាព័ត៌មានប្លែកធំដុំអ្វីឡើយ។ ក្រោយមានភាគីទី៣មកជ្រែក គូស្នេហ៍តារាខ្លះក៏សម្រេចចិត្តចែកផ្លូវពីគ្នា ហើយខ្លះទៀតក៏មានចិត្តធ្ងន់គួរឲ្យសរសើរដែលហ៊ានផ្ដល់ឱកាសឲ្យដៃគូជាលើកទី២។ ខាងក្រោមនេះគឺជាគូស្នេហ៍តារាហុងកុងចំនួន ១០គូ ដែលធ្លាប់មានប្រវត្តិខូចចិត្ត ត្បិតអីដៃគូលួចលាក់មានថ្មី៖

១. Kathy Chow និង Julien Lepeu

រៀបការបាន៧ឆ្នាំ តារាសម្ដែង Kathy Chow និងស្វាមីជាអ្នកជំនួញសញ្ជាតិបារាំងឈ្មោះ Julien Lepeu រមែងបង្ហោះរូបបង្ហាញពីសេចក្ដីសុខក្នុងក្រុមគ្រួសារយ៉ាងកក់ក្ដៅ។ យ៉ាងណាមិញ កាលពីដើមឆ្នាំ២០២០ ស្រាប់តែធ្លាយចេញនូវរូបថតលោក Julien កំពុងឱបថើបយ៉ាងស្និទ្ធស្នាលជាមួយស្រីម្នាក់ផ្សេងទៀតទៅវិញ។ ក្រោយការចុះផ្សាយព័ត៌មាននេះមិនបានប៉ុន្មាន Kathy ក៏បានប្រកាសជាសាធារណៈនៅលើហ្វេសប៊ុកថា រឿងផិតក្បត់នេះជាការពិត ប៉ុន្តែនាងសុខចិត្តលើកលែងទោសឲ្យស្វាមីម្ដង។

២. Sammi Cheng និង Andy Hui

កាលពីខែមេសា ឆ្នាំ២០១៩កន្លងទៅ តារាសម្ដែងប្រុស Andy Hui ត្រូវគេចាប់បានថា កំពុងមានស្នេហ៍លួចលាក់ជាមួយតារាស្រីឈ្មោះ Jacqueline Wong ហើយបានថើបគ្នាយ៉ាងស្និទ្ធស្នាលនៅលើតាក់ស៊ីមួយគ្រឿង។ ព័ត៌មាននេះបានធ្វើឲ្យក្រុមអ្នកគាំទ្របារម្ភជាខ្លាំងចំពោះតារាស្រី Sammi Cheng ដែលជាភរិយា ព្រោះខ្លាចរឿងនេះប៉ះពាល់ដល់ផ្នែកស្មារតីនាង។ យ៉ាងណាមិញ អ្វីដែលគួរឲ្យភ្ញាក់ផ្អើល ត្រឹម៣ថ្ងៃបន្ទាប់ក្រោយដឹងរឿងផិតក្បត់របស់ស្វាមី Sammi Cheng ក៏ប្រកាសសម្រេចលើកលែងទោសឲ្យ Andy Hui។ Sammi Cheng ប្រាប់ថា នាងជឿលើគ្រិស្តសាសនា ហើយនិងព្រះគម្ពីរ ដែលថា "ស្នេហាគឺជាការដែលមិនបោះបង់ចោល មិនដែលបាត់បង់នូវជំនឿទុកចិត្ត ហើយគឺត្រូវតែមានសង្ឃឹមជានិច្ច និងពុះពារគ្រប់កាលៈទេសៈទាំងអស់"។

៣. Kenix Kwok និង Frankie Lam

បច្ចុប្បន្ន ក្រុមអ្នកគាំទ្រសង្កេតឃើញថា ចំណងស្នេហ៍រវាង Kenix Kwok និង Frankie Lam កំពុងមានភាពល្អូកល្អើនណាស់ នេះបើយើងមិនរំលឹកដល់រឿងផិតក្បត់មួយកាលពីឆ្នាំ២០០៩របស់លោក Frankie Lam។ កាលនោះ តារាសម្ដែង Frankie បានលួចលាក់ស្នេហ៍ជាមួយតារាសម្ដែងស្រីជនជាតិចិនម្នាក់ឈ្មោះ Vicki Dong។ ក្នុងនាមជាប្រពន្ធ Kenix Kwok មិនបានយកទោសពៃរ៍ស្វាមីឡើយ។

៤. Vivian Chow និង Joe Nieh

ក្នុងរឿងស្នេហាតារា១គូនេះ ភាគីខាងប្រុសគឺលោក Joe Nieh រមែងលួចលាក់ស្នេហ៍ខាងក្រៅជាមួយស្រីផ្សេងជារឿយៗ។ យ៉ាងណាមិញ តារាស្រី Vivian Chow នៅតែស្រឡាញ់ស្វាមីជាខ្លាំង ហើយថែមទាំងនិយាយថា ស្វាមីគឺសំខាន់ជាងខ្លួននាងទៅទៀត ហើយរាល់ការសម្រេចចិត្តទាំងអស់គឺនាងទុកអាទិភាពឲ្យស្វាមីទាំងអស់។

៥. Wong Wai Po និង Michael Tao

តារាសម្ដែងហុងកុងទាំង២នេះផ្ដើមស្នេហ៍ជាមួយគ្នា១០ឆ្នាំមកហើយ មុនសម្រេចចិត្តចូលរោងការនាឆ្នាំ២០០០។ ពេលមានស្រីថ្មី Michael Tao ក៏សម្រេចចិត្តលែងប្រពន្ធចោល កាលពីឆ្នាំ២០០៧។ ប៉ុន្តែក្រោយមកលោកក៏ត្រូវរ៉ូវជាមួយភរិយាវិញ តែមិនបានចុះសំបុត្រអាពាហ៍ពិពាហ៍ម្ដងទៀតឡើយ។

៦. Lisa Jiang និង Benny Chan

នៅក្នុងឆ្នាំ២០១១ លោក Benny Chan ត្រូវគេចាប់បានថាកំពុងលួចថើបគ្នា និងបង្កាត់ភ្លើងស្នេហ៍ក្រៅផ្លូវការជាមួយតារាស្រីម្នាក់ឈ្មោះ Rose Chan។ ក្រោយបែកធ្លាយនូវព័ត៌មានអាស្រូវនេះ Benny បានបើកសន្និសីទកាសែតសុំទោសប្រពន្ធជាសាធារណៈ ដែលកាលនោះនាងកំពុងតែពរពោះកូនក្នុងផ្ទៃ។

៧. Karen Cheung និង Joe Ma

ស្គាល់គ្នាតាំងពីអាយុត្រឹម១២ឆ្នាំមកម៉្លេះ គូស្នេហ៍តារាសម្ដែង Karen Cheung និង Joe Ma ក្លាយជាប្ដីប្រពន្ធស្របច្បាប់អស់រយៈពេល២៧ឆ្នាំមកហើយ។ រំលឹករឿងអាស្រូវមួយកាលពីឆ្នាំ២០០៦ គឺលោក Joe Ma បានលួចលាក់ប្រពន្ធនាំនារីម្នាក់ទៅដើរលេងឯប្រទេសថៃ។ កាលនោះ Karen ខឹងជាខ្លាំង ហើយក៏មានបំណងលែងលះ ប៉ុន្តែចិត្តស្នេហ៍មិនដាច់ក៏បន្តរហូតមកទល់នឹងបច្ចុប្បន្ន។

៨. Yoyo Chen និង Vincent Wong

តារាសម្ដែងហុងកុង Vicent Wong ធ្លាប់កើតមានព័ត៌មានអាស្រូវលួចលាក់ជាមួយតារាម៉ូឌែលស្រីម្នាក់ឈ្មោះ Cammi Tse។ ទោះជាយ៉ាងនេះក្ដី Yoyo Chen ជាភរិយានៅតែមិនប្រកាន់ទោសពៃរ៍ស្វាមី ហើយជឿជាក់ថាវាជាព័ត៌មានមិនពិតនោះឡើយ។

៩. Christine Ng និង Kasey Lin

មុនរៀបការ តារាស្រី Christine Ng បានលួចលាក់មិត្តប្រុស Kasey Lin (ដែលត្រូវជាប្ដីបច្ចុប្បន្ន) ទៅគេងជាមួយបុរសម្នាក់។ លុះក្រោយរៀបការរួច ប្ដីរបស់ Christine Ng គឺលោក Kasey ក៏លួចមានស្រីក្រៅម្នាក់ នៅឆ្នាំ២០១៦កន្លងទៅ។ ព្រោះធ្លាប់មានកំហុសម្ដងម្នាក់ដូចគ្នាទើប Christine ប្រហែលជាមិនបន្ទោសស្វាមីអំពីអំពើផិតក្បត់នេះឡើយ។

១០. Angelica Lee និង Oxide Pang

ស្វាមីរបស់តារាស្រី Angelica Lee ដែលជាអ្នកដឹកនាំរឿង បានលួចផិតក្បត់ទៅមានស្នេហ៍ជាមួយតារាម៉ូឌែលម្នាក់ឈ្មោះ Liddy Li កាលពីឆ្នាំ២០១៤។ ដោយសារតែជំនឿលើព្រះពុទ្ធសាសនា Angelina បាននិយាយថា ស្វាមីរបស់នាងគួរតែត្រូវផ្ដល់ឱកាសឲ្យជាលើកទី២៕