រដ្ឋមន្រ្តី​ការបរទេសហុងគ្រី លោក Peter Szijjarto ដែល​មានផ្ទុក​ជំងឺកូវីដ១៩ បាន​អះអាងថា មាន​មនុស្ស​មួយចំនួន​ចង់​បង្កភាព​តានតឹងរវាង​ប្រទេសហុងគ្រី និងកម្ពុជា ពិសេសផលប្រយោជន៍នយោបាយ និងប្រព័ន្ធផ្សព្វផ្សាយ ចំពោះ​ការឆ្លងជំងឺកូវីដ១៩របស់លោក។ ការលើកឡើង​នេះ ធ្វើឡើង​តាមរយៈទំព័រហ្វេសប៊ុករបស់​លោកកាលពីថ្ងៃ១២ ខែវិច្ឆិកាម្សិលមិញ បន្ទាប់ពី​ត្រូវបាន​ចេញមុខការពារ​ដោយ​រដ្ឋមន្រ្តីការបរទេសកម្ពុជា។

សូម​រំលឹក​ថា លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តី​ក្រសួងការបរទេស និងសហប្រតិបត្តិការ​អន្តរជាតិ បាន​លើកឡើងថា ហុងគ្រី​ជាប្រទេស​​ដែល​តែហ៊ាន​ចេញ​មុខ​ការពារកម្ពុជា នៅលើឆាកអន្តរជាតិ ជាពិសេសរឿង EBA។

លោក ប្រាក់ សុខុន បាន​បញ្ជាក់ដូច្នេះថា៖

«លោក Szijjártó ជារដ្ឋមន្ត្រីការបរទេសនៃប្រទេសជាសមាជិកសហភាពអឺរ៉ុបមួយដែលតែងហ៊ានចេញមុខការពារយុត្តិធម៌ចំពោះកម្ពុជា។ គាត់គឺជាអ្នកក្រោកឡើង បន្លឺសំលេងប្រឆាំងនឹងការជ្រៀតជ្រែកពីខាងក្រៅចូលកិច្ចការផ្ទៃក្នុងកម្ពុជា។ គាត់គឺជាអ្នកតវ៉ាប្រឆាំងនឹងការព្យួរភាពអនុគ្រោះពន្ធក្រោមក្របខ័ណ្ឌEBA 20% ពីកម្ពុជា។ ឧប្បត្តិហេតុនៃការចម្លងCovid-19នេះ មិនអាចធ្វើឱ្យប៉ះពាល់ សាបរលាបបំណងល្អ ថ្លៃថ្នូរ ដិតដានដោយមិត្តភាពជ្រាលជ្រៅនៃដំណើរទស្សនកិច្ចរបស់លោក Szijjártó ដែលបាននាំមកនូវផលចំណេញដល់ទំនាក់ទំនងទ្វេភាគីរបស់យើងនោះទេ»៕