ប្រឡូក​ក្នុង​អាជីព​សម្ដែង​វីដេអូ​កំប្លែង​ខ្លីៗ​អស់​រយៈពេល​​៥​ឆ្នាំ​មក​នេះ កុមារី Emmanuella Samuel បាន​កសាង​កេរ្តិ៍ឈ្មោះ​ល្បី​​ល្បាញ​​ជា​ខ្លាំង​នៅ​លើ​បណ្ដាញ​សង្គម​យូធូប ហើយ​ក៏​រក​ចំណូល​បាន​​យ៉ាង​ច្រើន​ក្រាស់ក្រែល​ផង​ដែរ។ បើ​យោង​តាម​ប្រភព​សារព័ត៌មាន​មួយ​ចំនួន បាន​ឲ្យ​ដឹង​​ថា តួ​សម្ដែង​វ័យ​ក្មេង​សញ្ជាតិ​នីហ្សេរីយ៉ា​រូប​នេះ​មាន​ទ្រព្យ​សម្បត្តិ​សរុប​ប្រមាណ ១៥​ម៉ឺន​ដុល្លារ ដែល​ចាត់​ចូល​​​មួយ​នៅ​​ក្នុង​ចំណោម​ក្មេង​ដែល​រក​ចំណូល​បាន​ច្រើន​ជាង​គេ​បំផុត​​​ប្រចាំ​ប្រទេស។

មាន​អាយុ​ត្រឹម​១០​ឆ្នាំ​ក៏​​ពិត​មែន តែ​កុមារី Emmanuella ចេះ​ដឹង​គុណ​​ឪពុកម្ដាយ​បាន​យ៉ាង​ល្អ។ កាល​ពី​ពេល​ថ្មីៗ​កន្លង​ទៅ Emmanuella បាន​ប្រកាស​ថា នាង​​កំពុង​​សង់​​ភូមិគ្រឹះ​​​​ឲ្យ​ម្ដាយ​ជា​ទី​គោរព​របស់​នាង ដែល​នឹង​​បញ្ចប់​ការ​សាងសង់​នៅ​​ឆ្នាំ​២០២១​ខាង​មុខ។ Emmanuella បាន​សរសេរ​រៀបរាប់​នៅ​លើ​បណ្ដាញ​សង្គម Instagram ថា "ខ្ញុំ​សង់​​​វា​ឲ្យ​ម៉ាក់ សម្រាប់​រាល់​ការ​បួងសួង ការ​លើក​ទឹក​ចិត្ត និង​ការ​គាំទ្រ"។

គួរ​រំលឹក​ថា Emmanuella បាន​បង្ហាញ​វត្តមាន​ដំបូង​នៅ​លើ​​គណនី​បណ្ដាញ​សង្គម​យូធូប​មួយ​របស់​តារា​កំប្លែង​នីហ្សេរីយ៉ា​ឈ្មោះ Mark Angel Comdedy កាល​ពី​ឆ្នាំ​២០១៥។ វីដេអូ​​​សម្ដែង​មុន​គេ​របស់ Emmanuella មាន​ចំណង​ជើង​ថា "Who Mess?"។ ​ព្រោះ​​តែ​ភាព​ល្បីល្បាញ និង​មើល​ឃើញ​ពី​ការ​ប៉ិនប្រសប់ ក្រុមហ៊ុន​យក្ស Disney បាន​​ហៅ​ Emmanuella ឲ្យ​ចូល​រួម​សម្ដែង​ភាពយន្ត​ហូលីវូដ​១​ កាល​ពី​ឆ្នាំ​២០១៨​កន្លង​ទៅ។ យ៉ាង​ណា​មិញ មក​ទល់​នឹង​ពេល​នេះ Emmanuella មិន​​ទាន់​បាន​បង្ហើប​ឲ្យ​ដឹង​ពី​សាច់រឿង ក៏​ដូច​ជា​ចំណង​ជើង​រឿង​នៅ​ឡើយ​ទេ៕