ក្រោយចេញវីដេអូថើបមាត់គ្នា កែវ សុបញ្ញា ប្រាប់ថា ១ជីវិតស្ត្រីក្រមុំ នាងទើបលើកដំបូងបំផុតហើយ!

2020-11-16 03:21:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តារាចម្រៀង កែវ សុបញ្ញា ទើបបានធ្វើឲ្យមានការចាប់អារម្មណ៍កាលពីសប្ដាហ៍មុន ក្រោយមានការទម្លាយវីដេអូឃ្លីបស្ដីការការសម្ដែងរបស់នាងក្នុងរឿងមួយនៅលើបណ្ដាញសង្គម ដែលនាងអះអាងថា នោះជាបទពិសោធន៍លើកដំបូងបំផុតរបស់នាង។

វីដេអូនោះ សាមីខ្លួនបានបញ្ចេញដោយខ្លួនឯងតែម្ដង។ តាមការបញ្ជាក់របស់តារាស្រីមកពីខេត្តបាត់ដំបង បានឲ្យដឹងថា នោះគឺជាសកម្មភាពសម្ដែងក្នុងខ្សែភាពយន្តមួយផលិតដោយទូរទស្សន៍ហង្សមាស។ យ៉ាងណា បញ្ញា បានបដិសេធ ក្នុងការបញ្ចេញពីចំណងជើងដោយសារថា នោះជាការចង់បានពីថ្នាក់លើរបស់នាង។

នៅក្នុងវីដេអូច្រើនឃ្លីប ដែលតារាចម្រៀងផលិតកម្ម We Production បញ្ចេញ គេឃើញនាង បានជួបសម្ដែងឈុតថើបមាត់គ្នាយ៉ាងកម្រជាមួយតារាប្រុសម្នាក់ដែលគេស្គាល់ថាជាលោក ទ្រី ដារ៉ាវុធ។ បញ្ហាថា នេះគឺជាបទពិសោធន៍ទី១ទាំងក្នុងជីវិតពិតនៅខាងក្រៅ និងសូម្បីតែការសម្ដែង។ "សម្រាប់ខ្ញុំ គឺលើកទី១ហើយបង ដែលជួបការសម្ដែងបែបនេះ ខ្ញុំក៏ជាលើកទី១ ឯតួប្រុសក៏លើកទី១របស់គាត់ដែរ!”។

ក្នុងស្ថានភាពបែបនេះ ម្ចាស់បទ "យើងជាមនុស្ស២នាក់ផ្សេងគ្នា!” ប្រាប់ថា នាងពិតជាមានអារម្មណ៍អៀនខ្មាសយ៉ាងខ្លាំង។ តែយ៉ាងណា នាងក៏បានព្យាយាមជម្នះខ្លួនឯងលើចំណុចនេះខ្លាំងដែរ ទើបអាចសម្ដែងបាន។ បញ្ញា ថា នេះគឺជាបទពិសោធន៍ស្នេហាថើបមាត់គ្នាលើកដំបូងរបស់នាង។ ប៉ុន្តែបទពិសោធន៍ថ្មីនេះ នាងក៏ជួបច្រើនដងណាស់ដែរក្នុងខ្សែរឿងតែមួយដែលថ្នាក់លើសុំមិនបញ្ចេញចំណងជើងនេះ។

កែវ សុបញ្ញា គឺជាអតីតបេក្ខភាពកម្មវិធី The Voice Cambodia រដូវកាលទី១ ដែលក្រោយមកនាង ក៏បានក្លាយជាតារាចម្រៀងអាជីពក្នុងផលិតកម្ម We Production ជាបុត្រសម្ព័ន្ធរបស់ផលិតកម្ម រស្មីហង្សមាស។ មកទល់បច្ចុប្បន្ននាងបានបញ្ចេញបទចម្រៀងជាច្រើនរួចមកហើយនៅលើទីផ្សារ។ បទដែលទទួលបានការពេញនិយមមានដូចជាបទ "ឯកាគ្រាន់ជាងឈឺចាប់" “យើងជាមនុស្ស២នាក់ផ្សេងគ្នា" និងបទ "សង្សារចាស់ជាដើម"។

បន្ទាប់ពីការងារចម្រៀងដំណើរទៅរលូន តារាស្រីក៏បានហក់ចូលមកការសម្ដែងភាពយន្តថែមទៀត។ តាមការបញ្ជាក់របស់សាមីខ្លួន មកទល់បច្ចុប្បន្ន នាងធ្លាប់បានចូលរួមសម្ដែងភាពយន្តបានប្រមាណជា ១០រឿងរួចមកហើយ។ សម្រាប់ភាពយន្តដែល បញ្ញា បានជួបប្រទះឈុតស្នេហាថើបមាត់គ្នានេះ គ្រោងនឹងចេញផ្សាយនៅកញ្ចក់ទូរទស្សន៍របស់ហង្សមាសឆាប់ៗខាងមុខនេះហើយ៕

មើលការសម្ដែងថើបមាត់គ្នាជាមួយតួប្រុសរបស់ សុបញ្ញា ខាងក្រោម៖

អត្ថបទ៖ ទារិកា