លោក ពូទីន សម្រេចយកប្រទេសអាស៊ី២ ធ្វើជាកន្លែងផលិតវ៉ាក់សាំងកូវីដ១៩

2020-11-19 08:02:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីរុស្ស៊ី លោក វ្លាឌីមៀ ពូទីន បានឱ្យដឹងថា វ៉ាក់សាំងប្រឆាំងកូវីដ១៩ Sputnik V នឹងត្រូវផលិតក្នុងប្រទេសចិន និងឥណ្ឌា ដែលជាសមាជិកក្រុមប្រទេស BRICS។ លោកថ្លែងដូច្នេះក្នុងកិច្ចប្រជុំ BRICS តាមរយៈប្រព័ន្ធវីដេអូ កាលពីថ្ងៃទី១៧ ខែវិច្ឆិកា ឆ្នាំ២០២០។

លោក ពូទីន គឺជាអ្នកដឹកនាំកិច្ចប្រជុំនេះ ដែលមានការចូលរួមពីមេដឹកនាំប្រទេស៤ទៀតនៃ BRICS គឺ ណារិនដ្រា មូឌី នាយករដ្ឋមន្រ្តីឥណ្ឌា, លោក ស៊ី ជិនពីង ប្រធានាធិបតីចិន, លោក ហ្ស៊ែ បូលសូណារ៉ូ ប្រធានាធិបតីប្រេស៊ីល និងលោក ស៊ីរីល រ៉ាម៉ាហ្វូសា ប្រធានាធិបតីអាហ្វ្រិកខាងត្បូង។

លោកប្រធានាធិបតីរុស្ស៊ីបញ្ជាក់យ៉ាងដូច្នេះថា៖ «យើងជឿជាក់ថាវាមានសារៈសំខាន់ណាស់ក្នុងការបង្កើនល្បឿននៃការបង្កើមជ្ឈមណ្ឌលអភិវឌ្ឍន៍ និងស្រាវជ្រាវវ៉ាក់សាំង របស់ BRICS ដែលយើងបានព្រមព្រៀងគ្នាកាលពី២ឆ្នាំមុន»។

លោកបន្តថា៖ «ក្រុមហ៊ុនមូលនិធិវិនិយោគផ្ទាល់របស់រុស្ស៊ី បានចុះកិច្ចព្រមព្រៀងជាមួយដៃគូប្រេស៊ីល និងឥណ្ឌា ក្នុងការដំណើរការសាកល្បងវ៉ាក់សាំង Sputnik V។ ជាមួយគ្នានោះ ក៏បានចុះកិច្ចព្រមព្រៀងជាមួយក្រុមហ៊ុនផលិតឱសថ ក្នុងប្រទេសចិន និងឥណ្ឌា ដើម្បីចាប់ផ្តើមផលិតវ៉ាក់សាំងនេះ ក្នុងប្រទេសទាំងពីរ»។

បើតាមការអះអាងរបស់លោក ពូទីន នាពេលកន្លងមកឱ្យដឹងថា វ៉ាក់សាំង Sputnik V គឺមានប្រសិទ្ធភាពទាំងស្រុង ដោយអាចបង្កើតប្រព័ន្ធសុំា អាចប្រឆាំងនឹងវីរុសកូវីដ១៩។ ក្នុងនោះកូនស្រីរបស់លោក ក៏បានទទួលយកចាក់វ៉ាក់សាំងនេះរួចមកហើយដែរ៕

ប្រភព៖ NDTV