បាល់២គ្រាប់​របស់​វីរបុរសអាហ្សង់ទីន Diego Maradona ដែល​ស៊ុតចូល​អង់គ្លេស ក្នុងពាន​រង្វាន់ World Cup 1986 វគ្គ៨ក្រុមចុងក្រោយ ត្រូវបានហៅថា ជា​គ្រាប់បាល់ប្រចាំ​សតវត្សរ៍ (Goal of Century) និងដៃព្រះ (Hand of God)។ គ្រាប់​បាល់ដៃព្រះ គឺ​ជាគ្រាប់បាល់​ដែល Maradona ប្រើដៃវាយបញ្ចូលទី​អង់គ្លេស ហើយ​ត្រូវបានអាជ្ញាកណ្តាល​សម្រេចឱ្យគ្រាប់បាល់នេះ។

ក្នុងកិច្ចសម្ភាសន៍មួយ​ក្នុងឆ្នាំ២០០៦ Maradona បាន​លាតត្រដាង​អំពី​ការប្រើដៃវាយបញ្ចូលទីនេះ ដោយ​រៀបរាប់យ៉ាងដូច្នេះថា៖

«វាគឺដៃរបស់ខ្ញុំ។ ប៉ុន្តែនេះ​មិនមែន​មានន័យថា ខ្ញុំមិនគោរព​ចំពោះ​អ្នកគាំទ្រអង់គ្លេសឡើយ ប៉ុន្តែនេះ​ជាអ្វីដែលបានកើតឡើង។ យើងធ្លាប់ធ្វើបែបនេះ ហើយ​ខ្ញុំក៏ធ្លាប់រកបានគ្រាប់បាល់​ដោយដៃរបស់ខ្ញុំ មុន​ចូលរួម​ជាមួយក្រុមជម្រើសជាតិអាហ្សង់ទីនទៅទៀត»។

«វាជា​គ្រាប់បាល់​ដែល​… ខ្ញុំមិនអាច​ទៅដល់វាឡើយ ហើយ Shilton (អ្នកចាំទីអង់គ្លេសពេលនោះ) គឺ​បាន​ស្ថិត​នៅទីនោះ​រួចជាស្រេច ដូច្នេះ​ខ្ញុំ​មិនអាចប្រើក្បាល​តែតវាបានឡើយ ខ្ញុំក៏ធ្វើអ៊ីចឹងតែម្តងទៅ។ ហើយ​ខ្ញុំងាកក្បាល​ទៅក្រោយ និងចាប់ផ្តើមរត់ ពីព្រោះ Shilton មិនដឹងខ្លួនថាខ្ញុំរត់រកបាល់នោះទេ។ ខ្សែការពារ​អង់គ្លេសម្នាក់ បាន​ឃើញដៃរបស់ខ្ញុំ ហើយស្រែកថា Butcher Butcher។ នៅពេល​ខ្ញុំឃើញ​អាជ្ញាកណ្តាលខ្សែបន្ទាត់​កំពុងរត់ ខ្ញុំក៏ស្រែកថា​ ចូល ហើយខ្ញុំក៏មើលទៅក្រោយ​ ដើម្បី​ចង់ដឹងថា តើ​អាជ្ញាកណ្តាល​ ឱ្យគ្រាប់បាល់នេះឬអត់។ ដូច្នេះវាជាគ្រាប់បាល់បញ្ចូលទី»។

លោក Maradona អះអាងថា ទង្វើប្រើដៃវាយបញ្ចូលទីនេះពុំមែនជាការក្លែងបន្លំនោះទេ ប៉ុន្តែវាគឺជាល្បិច ហើយ​ការធ្វើបែបនេះ គឺកើតឡើង​ច្រើននៅអាមេរិកខាងត្បូង ជាងនៅអឺរ៉ុប។

ចំពោះ​ការប្រើពាក្យ ដៃព្រះ (Hand of God) ត្រូវបាន​លោកលើកឡើងថា «ព្រោះ​ព្រះ​បាន​ប្រទានដៃមកឱ្យ​យើង។ ពីព្រោះ​វាពិបាកណាស់​ក្នុងការ​មិនឱ្យ​មនុស្សពីរនាក់ឃើញ​ នូវការប្រើដៃវាយបាល់បញ្ចូលទីនេះ ពោលគឺ អាជ្ញាកណ្តាល​ធំ​ក្នុងទីលាន និង​អាជ្ញាកណ្តាល​ខ្សែបន្ទាត់»៕

សូមទស្សនាវីដេអូខាងក្រោម៖