អង់គ្លេស ក្លាយ​ជាប្រទេសមុនគេ​នៅអឺរ៉ុប ដែល​បាន​ប្រកាស​អនុញ្ញាតឱ្យ​ប្រើប្រាស់​វ៉ាក់សាំង​ប្រឆាំង​កូវីដ១៩ របស់​ក្រុមហ៊ុន​អាមេរិក Pfizer-BioNTech នៅថ្ងៃទី២ ខែធ្នូ ឆ្នាំ​២០២០នេះ ខណៈសហភាព​អឺរ៉ុប​កំពុងពិចារណានៅឡើយ។

ការ​សម្រេចចិត្តនេះធ្វើឡើង​ដោយ​អាជ្ញាធរបទបញ្ញត្តិឱសថ និង​ផលិតផល​សុខភាព (MHRA)។ MHRA ត្រូវបាន​រដ្ឋាភិបាលអង់គ្លេស ផ្តល់អំណាច​ឱ្យ​ក្នុងការ​អនុម័តប្រើប្រាស់វ៉ាក់សាំង។ ក្រោយអង់គ្លេស ចាកចេញពី EU អាជ្ញាធរអង់គ្លេស​នេះ​នឹង​មានសិទ្ធិពេញលេញ​តែម្តង។

អង់គ្លេស បាន​បញ្ជាទិញ​វ៉ាក់សាំងកូវីដ១៩ ចំនួន ៤០លានដូស ពីក្រុមហ៊ុន Pfizer បន្ទាប់ពី​វ៉ាក់សាំងនេះ​ត្រូវបានធ្វើតេស្តមានប្រសិទ្ធភាព​ ៩៥% នៅដំណាក់កាលចុងក្រោយ។ ចំនួនវ៉ាក់សាំងដំបូង នឹងត្រូវបញ្ជូនទៅអង់គ្លេស ក្នុងពេលឆាប់ៗនេះ។

ប្រធាន​ក្រុមហ៊ុន Pfizer បាន​សម្តែងការសាទរចំពោះ​ការសម្រេចចិត្តរបស់អង់គ្លេស ក្នុងការទិញ​វ៉ាក់សាំងពីក្រុមហ៊ុនខ្លួន ពោលគឺ​នេះ​ជាការចាត់វិធានការ​ទាន់ពេល​ដើម្បី​ការពារ​ប្រជាជនអង់គ្លេស។

សូមជម្រាប​ថា ចំពោះសហរដ្ឋអាមេរិកវិញ មិនទាន់បាន​ប្រកាស​អនុញ្ញាតឱ្យ​ប្រើប្រាស់​វ៉ាក់សាំង​នេះនៅឡើយទេ ដោយ​រដ្ឋបាល​ឱសថ និងអាហារ​អាមេរិក នឹងបើកកិច្ចប្រជុំ​ពិនិត្យលើសំណើរបស់​ក្រុមហ៊ុន Pfizer នៅថ្ងៃទី១០ ខែធ្នូ ឆ្នាំ​២០២០ខាងមុខនេះ៕