អូស្ត្រាលី បោះបង់ការផលិតវ៉ាក់សាំងកូវីដ ក្រោយលទ្ធផលតេស្ដបង្ហាញវិជ្ជមានវីរុសហ៊ីវ

2020-12-11 03:55:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការផលិតវ៉ាក់សាំងកូវីដ១៩ នៅអូស្ត្រាលីត្រូវបានបោះបង់ចោលនៅថ្ងៃសុក្រទី ១១ ធ្នូ នេះបន្ទាប់ពីការសាកល្បងព្យាបាលបានបង្កើតលទ្ធផលវិជ្ជមានវីរុសហ៊ីវមិនពិតក្នុងចំណោមអ្នកដែលចូលរួមក្នុងការសាកល្បងព្យាបាលដំណាក់កាលដំបូង។

លោក ស្កុត ម៉ូរីសុន នាយករដ្ឋមន្ត្រីនៃប្រទេសអូស្ត្រាលី បាននិយាយថាលទ្ធផលនេះបានជំរុញឱ្យរដ្ឋាភិបាលបញ្ឈប់គម្រោងទិញវ៉ាក់សាំងនេះរាប់លានដូស ហើយជំនួសមកវិញគឺបង្កើនការបញ្ជាទិញវ៉ាក់សាំងផ្សេងពីក្រុមហ៊ុន AstraZeneca និង Novax ។

លោក ម៉ូរីសុន បញ្ជាក់ថា “វ៉ាក់សាំងរបស់សាកលវិទ្យាល័យឃ្វីនស៍លែននឹងមិនអាចបន្តទៅមុខទៀតបានឡើយ ដោយផ្អែកលើដំបូន្មានវិទ្យាសាស្ត្រហើយវានឹងលែងជាផ្នែកមួយនៃផែនការទិញវ៉ាក់សាំងរបស់អូស្ត្រាលីទៀតដែរ”។

លោក ហ្គ្រេក ហាន់ រដ្ឋមន្ត្រីក្រសួងសុខាភិបាលអូស្ត្រាលីថា បេក្ខជនវ៉ាក់សាំង ដែលកំពុងស្ថិតក្នុងដំណាក់កាលទី១ នៃការសាកល្បងនៅសាកលវិទ្យាល័យឃ្វីនស៍លែនបានប្រើប្រាស់បរិមាណប្រូតេអ៊ីនរបស់វីរុសហ៊ីវតិចតួចសម្រាប់ជា “ម៉ូលេគុលបង្គំ” ប៉ុន្តែបង្កឱ្យមានប្រតិកម្មអង្គបដិប្រាណ ដែលអាចរំខានដល់ការតាមដានរកមេរោគហ៊ីវ។

មន្ត្រីជាន់ខ្ពស់ក្រសួងសុខាភិបាលលោក ប្រេនដាន់ មឺហ្វី បញ្ជាក់ថា ទោះបីជាវ៉ាក់សាំងនេះបានបង្ហាញពីប្រសិទ្ធភាពក្នុងការបង្ក្រាបកូវីដ១៩ និងគ្មានឱកាសចម្លងហ៊ីវក៏ដោយក៏ប៉ុន្តែការអភិវឌ្ឍវ៉ាក់សាំងត្រូវតែបោះបង់ចោលដោយសារការបារម្ភថា វាអាចធ្វើឱ្យអន្តរាយដល់ទំនុកចិត្តសាធារណៈក្នុងការចាក់វ៉ាក់សាំង៕

ប្រភព៖ rasmeinews