ប៉ុន្មានឆ្នាំខាងមុខនេះ ជប៉ុន នឹង​មានសមត្ថភាព​អាចផលិត​យន្តហោះបំបាំងកាយ (Stealth Fighter) ដើម្បីពង្រឹងកងទ័ពអាកាសរបស់ខ្លួនបន្ថែមទៀត ក្រោមកិច្ចសហការជាមួយ​ក្រុមហ៊ុនអាមេរិក Lockheed Martin។

ក្រសួង​ការពារ​ជាតិជប៉ុន បានចេញសេចក្តីថ្លែងការណ៍​នៅថ្ងៃទី១៨ ខែធ្នូ ឆ្នាំ​២០២០ ដោយបញ្ជាក់ថា ក្រុមហ៊ុន Lockheed Martin នឹង​ចាប់ដៃគូជាមួយ​ក្រុមហ៊ុន Mitsubishi។ គម្រោង​ផលិតយន្តហោះរួមគ្នាក្រោមកិច្ចសហប្រតិបត្តិការរួមគ្នានេះ នឹងចាប់ផ្តើម​នៅឆ្នាំក្រោយនេះហើយ។

យន្តហោះចម្បាំងប្រភេទថ្មី ដែល​ក្រុមហ៊ុនទាំងពីរ​នឹងផលិតរួមគ្នា មានឈ្មោះថា F-3 ឬ F-X ដែលគ្រោងចំណាយ​ប្រមាណ ៤០ពាន់លានដុល្លារ ដោយវានឹងជំនួសយន្តហោះស៊េរីចាស់ F-2។ យ៉ាងណាមិញ ក្រុមហ៊ុន Lockheed Martin ចង់ឱ្យការផលិតយន្តហោះថ្មីនេះ យកគំរូតាមរូបរាងរបស់យន្តហោះបំបាំងកាយ F-35 និង F-22 ប៉ុន្តែភាគីជប៉ុន​ច្រានចោល ព្រោះចង់​ឌីហ្សាញ​ខ្លួនឯងជាង៕