បើមិនក្លាយជា​តារា K-Pop កុំអីអ្នកទាំងនេះ​ធ្វើជា​កសិករបាត់ទៅហើយ

  • 2020-12-22 02:50:00
  • ចំនួនមតិ 0 | ចំនួនចែករំលែក 0

ចន្លោះមិនឃើញ


តារា K-Pop តែង​តែ​ជា​មនុស្ស​ដែល​លេចធ្លោ​ជានិច្ច​ក្នុង​ចិត្តអ្នក​គាំទ្រយុវវ័យ ដែល​តែង​បង្ហាញ​នូវភាពអស្ចារ្យ​បំផុត​លើ​ឆាក​សម្ដែង។ ទោះជា​យ៉ាង​ណាមុន​មាន​ថ្ងៃ​នេះ​ តារា​ជា​ច្រើន​នាក់​មានជីវិត​សាមញ្ញ ខ្លះ​ស្ថិត​នៅក្នុង​គ្រួសារ​ដែល​ស្ថិតនៅជនបទ​ដាច់ស្រយ៉ាលជា​ដើម។

ដូច​តារា​ចម្រៀង​ខាងក្រោម​ជា​ដើម ពេល​នេះ​ពួកគេ​គឺ​ជា​តារា K-Pop លំដាប់កំពូល ប៉ុន្តែ​ពីអតីតកាលពួកគេ​ទាំង​នេះ​សុទ្ធ​តែ​ជា​អ្នក​ស្រុកស្រែចម្ការ ហើយ​បើ​សិន​ជា​ពួកគេ​មិន​បាន​ធ្វើ​ជា​តារា​ដូចសព្វថ្ងៃ ពួកគេ​មុខ​តែ​ធ្វើជា​កសិករបាត់ទៅហើយ៖

១. V (BTS)

ជីដូន​របស់​ V គឺជាកសិករ ហើយ​បាន​និយាយ​ថា​បើ​កុំ​តែចៅ​ខ្លួន​ក្លាយ​ជា​តារា​ មិនដូច្នោះ​ទេ V ត្រូវ​បន្ត​របរជា​កសិករដែរ​បាត់ទៅហើយ។ V បាន​ធំ​លូតលាស់​នៅជនបទ​ជាមួយ​គ្រួសារ​ ហើយ​ក្ដី​ស្រមៃ​កាលពីតូច​ លោក​ថែមទាំង​ចង់ដើរតាមគន្លង​ជីដូន​ទៀតផង។

២.​ JB (GOT7)

ឪពុក​របស់​លោក​ មាន​ចម្ការ​ប៉េងប៉ោះក្នុង​ស្រុក Ilsan ហើយ​មេក្រុម​ GOT7 រូបនេះ​ ទម្លាយ​ថា​ខ្លួន​ចេញ​ជួយ​ធ្វើ​ចម្ការ​ឪពុកម្ដាយ​តាំង​តែ​ពី​តូច​មក។

៣. Ju Haknyeon (The Boyz)

ម្ដាយ​របស់​លោក​ មាន​កសិដ្ឋានចិញ្ចឹម​ជ្រូក លើ​កោះ Jeju ហើយ​មក​ដល់​បច្ចុប្បន្ន បើ​សម្រាក​ពី​ការងារ លោក​តែង​ទៅ​ជួយ​មើល​ការ​ខុសត្រូវ​នៅ​កសិដ្ឋាន​ម្ដាយ​ជានិច្ច។ មិន​ថែម​ទាំង​ប៉ុណ្ណោះ​ Haknyeon និយាយទៀត​ថា​ ចំណូល​ចិត្ត​របស់​លោកគឺ ដាក់បាយជ្រូក។

៤. Ha Seung Woon

ជីដូនជីតា របស់​ Seung Woon មាន​កសិដ្ឋាន​បែប​ធម្មជាតិ ឬ​ផ្ទះ​បៃតង​ដ៏ធំ​មួយ​កន្លែង​ ហើយ​ជា​កន្លែង​ដែល​ស្រស់ស្រាយ​បំផុត​ ក្នុង​តំបន់។

៥. Gongchan (B1A4)

ជីតា​របស់​ Gongchan វិញ​គឺជា​ម្ចាស់​ចម្ការ​ត្រសក់​ ហើយ​សូម្បី​សមាជិក B1A4 ក៏តែង​ទិញ​ត្រសក់​ពី​គ្រួសារ​ Gongchan ជារឿយៗដែរ។

៦. Lim Young Min (MXM)

អ្នក​គាំទ្រ​មួយ​ចំនួន​បាន​ស្រាវ​ជ្រាវ​ដឹង​ថា​ ឪពុក​ម្ដាយ​របស់​ Young Min មាន​ចម្ការ​ប៉េងប៉ោះ នៅ​ក្នុង​ក្រុង Busan។

​៧. Mir

ទោះ​បី​ប្រឡូក​ចូល​វិស័យសិល្បៈជា​តារា K-Pop ល្បីឈ្មោះ​ ប៉ុន្តែ​ Mir មិនដែល​ភ្លេចកំណើត​ថា​ខ្លួន​មកពីណា​ទេ។ ជាការពិត​ ឪពុកម្ដាយ​របស់​ Mir គឺ​ជា​កសិករ​ ហើយ​ពេល​ដក​ខ្លួនពីសិល្បៈ​ដ៏​យូរ​ Mir បាន​ទៅ​ផ្ទះជួយ​ការងារ​ក្នុង​ចម្ការ​ជាមួយ​ឪពុកម្ដាយជាយូរទៀតផង៕

ប្រភព៖ Soompi ប្រែ​សម្រួល៖ យី សុធារី

អត្ថបទពេញនិយម
;