សិង្ហបុរី​បាន​ទទួល​ចំនួន​ដូសដំបូង​នៃវ៉ាក់សាំងកូវីដ១៩របស់​ក្រុមហ៊ុន Pfizer-BioNTech នៅយប់ថ្ងៃទី២១ ខែធ្នូ ឆ្នាំ​២០២០ ដែល​ធ្វើឱ្យប្រទេសនេះ ក្លាយជាប្រទេស​ដំបូងគេ​នៅអាស៊ី​ ក្នុង​ការទទួលវ៉ាក់សាំងនេះ។

ចំពោះការមកដល់​នៃវ៉ាក់សាំងនេះ នាយករដ្ឋមន្រ្តីសិង្ហបុរី លោក លី សៀនឡុង បាន​ហៅថាវាជា កាដូមួយដែល​ទន្ទឹងរង់ចាំ​ជាយូរមកហើយ។ វា​ក៏ជាសញ្ញាល្អមួយ សម្រាប់ឆ្នាំ​២០២១​ផងដែរ។

លោក​បាន​សរសេរ​នៅលើទំព័រហ្វេសប៊ុកដោយអរគុណចំពោះ​អ្នកពាក់ព័ន្ធ​ដែល​ជួយឱ្យ​វ៉ាក់សាំងនេះ បាន​មកដល់ទឹកដីសិង្ហបុរី។ លោកថា អ្នកអាទិភាព​ដែលទទួលវ៉ាក់សាំងនេះ គឺ​បុគ្គលិក​សុខាភិបាល និង​មនុស្សចាស់ជរា ហើយការទទួល​ចាក់វ៉ាក់សាំង ផ្អែកលើការ​ស្ម័គ្រចិត្ត ប៉ុន្តែ​លោកជំុរញ​ឱ្យពលរដ្ឋសិង្ហបុរី ទទួលយក។

យ៉ាងណាមិញ ចំពោះ​កាលបរិច្ឆេទនៃកម្មវិធីចាក់វ៉ាក់សាំងក្នុងប្រទេសសិង្ហបុរីនេះ មិនទាន់ត្រូវបាន​កំណត់នៅឡើយ៕