ប្រឹងទាល់ស្លាប់ក៏មិនស្រកគីឡូដែរ បើមិនបោះចោលទម្លាប់ទាំង៥នេះ!

2020-12-24 06:38:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខំតមអាហារ ខំហាត់ប្រាណ តែមិនស្រកគីឡូសោះអ៊ីចឹង? នេះអាចបណ្ដាលមកពីទម្លាប់ពេលព្រឹកចំនួន ៥របស់អ្នក ដែលទប់ស្កាត់មិនឲ្យសាច់ខ្លាញ់រលាយចេញពីខ្លួនប្រាណបាន។ ទម្លាប់ទាំង៥ មានដូចការរៀបរាប់ខាងក្រោម៖

១. គេងច្រើនពេក

គួរមានការកំណត់ពេលវេលាគេងឲ្យគ្រប់គ្រាន់ល្អ បើអ្នកពិតជាចង់បានរាងស្អាតសមសួនដូចគេ។ ការគេងតិចពេកនឹងធ្វើឲ្យចំណង់ទទួលទានអាហាររបស់អ្នកកើនឡើងខ្លាំង។ ដោយឡែក បើគេងច្រើនម៉ោងពេក (លើសពី១០ម៉ោងក្នុង១យប់) រាងកាយនឹងបង្កើនម៉ាសកាន់តែធំឡើង មិនងាយស្រកគីឡូឡើយ។ នេះបើយោងតាមការសិក្សារបស់សកលវិទ្យាល័យវេជ្ជសាស្ត្រ PMC នៅសហរដ្ឋអាមេរិក។

ចំនួនម៉ោងដែលល្អសម្រាប់ដំណេកយប់គឺចន្លោះពី ៧ម៉ោង ទៅ ៩ម៉ោង។

២. ភ្ញាក់ពីគេងហើយមិនចេញឲ្យត្រូវថ្ងៃ

ក្រោយក្រោកពីដំណេកភ្លាម អ្នកគួរបើកវាំងនន ឬបង្អួច ដើម្បីឲ្យស្បែកអាចស្រូបយកពន្លឺថ្ងៃ។ បើតាមការសិក្សារបស់សកលវិទ្យាល័យ PMC ដដែល បានបង្ហាញថា បើកាលណាអ្នកភ្ញាក់នៅពេលព្រឹកមានថ្ងៃរះ នោះរលកពន្លឺពណ៌ខៀវដែលប៉ះនឹងស្បែករបស់អ្នកនឹងជួយជំរុញប្រព័ន្ធរំលាយអាហារឲ្យដំណើរការល្អ ហើយជួយឲ្យអ្នកឆាប់ស្វាងថែមទៀតផង។ គួរឲ្យពន្លឺថ្ងៃរះពេលព្រឹកជះមកប៉ះសាច់អ្នកឲ្យបាន២០ ទៅ ៣០នាទីជារៀងរាល់ព្រឹក។

៣. មិនចេះរៀបចំកន្លែងដេក

ស្ដាប់ទៅចម្លែកណាស់មែនទេ? ប៉ុន្តែវាជាការពិតមួយដែលរកឃើញដោយអង្គការ Sleep Foundation នៅអាមេរិក។ បើកន្លែងគេងមិនស្អាត គ្មានការរៀបចំល្អ វាអាចធ្វើឲ្យអ្នកទទួលទានដំណេកមិនលង់លក់ស្រួលល្អ និងមិនគ្រប់គ្រាន់។ កត្តានេះហើយទើបអ្នកមិនអាចសម្រកគីឡូសមដូចបំណងប្រាថ្នាបាន។

៤. ភ្លេចមើលគីឡូខ្លួនឯង

អ្នកស្រាវជ្រាវមកពីសកលវិទ្យាល័យ Cornell បានបង្ហាញថា ការតាមដានទម្ងន់ខ្លួនឯងជាប្រចាំគឺជាយុទ្ធសាស្ត្រដ៏មានប្រសិទ្ធភាព និងជោគជ័យនៅក្នុងការជំរុញសកម្មភាពសម្រក។ ពេលដែលគួរថ្លឹងគីឡូគឺនៅពេលព្រឹក ក្រោយភ្ញាក់ពីគេងមុនទទួលទានអាហារ ឬផឹកទឹក ព្រោះពេលនោះហើយគឺជាទម្ងន់ពិតប្រាកដជាក់លាក់របស់អ្នក។

៥. ញ៉ាំអាហារព្រឹកតិចពេក

ការញ៉ាំអាហារព្រឹកតិចមិនល្អទាល់តែសោះចំពោះអ្នកចង់ស្រក និងចង់មានសុខភាពល្អ។ អាហារព្រឹកគឺជាអាហារទ្រទ្រង់រាងកាយចាំបាច់ជាងគេបំផុត ពិសេសគឺបន្ថែមការផ្គត់ផ្គង់សារធាតុចិញ្ចឹម ក៏ដូចជាធ្វើឲ្យប្រព័ន្ធរំលាយអាហារដំណើរការល្អ។ គួរញ៉ាំអាហារព្រឹកដែលមានកម្រិតកាឡូរីចំនួន ៦០០ ហើយសម្បូរប្រូតេអ៊ីនគ្មានខ្លាញ់ កាបូនអ៊ីដ្រាត និងប្រភេទបង្អែមលាងមាត់តិចតួច៕