ស្ពានជ្រោយចង្វារទី១ ដែលមាន​ប្រវែង​សរុប ៧០៩​ម៉ែត្រ ជាស្ពាន​ឆ្លងកាត់​ទន្លេសាប​មុនគេ​នៅកម្ពុជា ស្ថិតក្នុងភូមិសាស្រ្តរាជធានីភ្នំពេញ តភ្ជាប់​ជាមួយផ្លូវជាតិលេខ៦A។ ស្ពាន​នេះ ត្រូវបាន​សង់ឡើង​ក្នុងឆ្នាំ​១៩៦៣ ក្នុង​សម័យសង្គមរាស្រ្តនិយម ក្រោយជំនួយបច្ចេកទេស​របស់​រដ្ឋាភិបាលជប៉ុន។

ដោយសារសង្គ្រាមស៊ីវិលក្នុងអំឡុងទសវត្សរ៍ឆ្នាំ១៩៧០ ស្ពាននេះត្រូវទទួលរងនូវ​ការ​ខូចខាតស្ទើរតែទាំងស្រុង។ រហូតមកដល់ឆ្នាំ១៩៩២ ស្ពាននេះត្រូវបានជួសជុលស្ដារ​ឡើង​វិញ  ក្រោមជំនួយឥតសំណងរបស់រដ្ឋាភិបាលជប៉ុន ហើយបានបើកឱ្យដំណើរការជា​ថ្មី​ម្ដ​ង​​​ទៀតនៅឆ្នាំ១៩៩៦ បានក្លាយជាច្រករបៀងសេដ្ឋកិច្ចយ៉ាងសំខាន់តភ្ជាប់រាជធានីភ្នំពេញទៅ ​នឹ​ងបណ្ដាខេត្តផ្សេងៗរបស់ប្រទេសកម្ពុជា។

ក្រោយមកស្ពានជ្រោយចង្វារទី១ ត្រូវបានដាក់​ឈ្មោះ​ថា « ស្ពានមិត្តភាពកម្ពុជា-ជប៉ុន» ហើយស្ពាននេះបានជួយសម្រួលដល់ការធ្វើដំណើរ​រប​ស់​ប្រជាពលរដ្ឋ កាត់បន្ថយគ្រោះថ្នាក់ចរាចរណ៍ លើកកម្ពស់សកម្មភាពសេដ្ឋកិច្ចតាមរយៈ​ការ​ដឹក​​ជញ្ជូនទំនិញមកកាន់ទីក្រុងភ្នំពេញ ។

ដោយសារស្ពាននេះ មានអាយុកាលដ៏ចំណាស់ ហើ​យ​ស្របពេលកំណើនសេដ្ឋកិច្ច និងលំហូរចរាចរណ៍កើនឡើងជាលំដាប់នោះ ស្ពាន​នេះ​តម្រូវ​ឱ្យ​មានការជួសជុលឡើងវិញជាបន្ទាន់ ដោយចំណាយថវិកាអស់ប្រមាណ ៣០លាន​ដុល្លារ​អា​មេ​រិ​ក ជាហិរញ្ញប្បទានឥតសំណងរបស់រដ្ឋាភិបាលជប៉ុន ដែលដំណើរការជួសជុល​ឡើង​វិញ​នេះ​បានចាប់ផ្តើមបើកការដ្ឋានសាងសង់ជួសជុលនៅថ្ងៃទី១៥ ខែកញ្ញា ឆ្នាំ២០១៧ និង​បញ្ចប់មុនកាល​កំ​ណត់ ហើយយកថ្ងៃទី០៣ ខែមេសាឆ្នាំ២០១៩ ដាក់ឱ្យដំណើរការឡើងវិញ​រហូតមកដល់បច្ចុប្បន្ន៕

ប្រភព៖ Press OCM