ឃើញស្គមៗអ៊ីចឹង តែតារាហុងកុងរូបនេះត្រូវប៉ាន់គេនិយមឲ្យដើរតួបែបនេះណាស់!
- 2021-01-11 06:03:52
- ចំនួនមតិ 0 | ចំនួនចែករំលែក 0
ឃើញស្គមៗអ៊ីចឹង តែតារាហុងកុងរូបនេះត្រូវប៉ាន់គេនិយមឲ្យដើរតួបែបនេះណាស់!
ចន្លោះមិនឃើញ
ថ្មីៗនេះ សារព័ត៌មានហុងកុង HK01 បានធ្វើបទសម្ភាសន៍ជាមួយតារាសម្ដែងម្នាក់ ដែលមានរូបរាងកាយតូចស្គមស្គាំងខុសពីតារាដទៃឯទៀត។ តារារូបនោះមានឈ្មោះថា Guo Hanzhu។ នៅវ័យ៣៤ឆ្នាំក៏ពិតមែន តែលោកមានទម្ងន់ត្រឹម ៤០គីឡូក្រាម និងមានកម្ពស់ត្រឹម ៦០សង់ទីម៉ែត្រតែប៉ុណ្ណោះ។
អាចនិយាយក្នុងន័យវិជ្ជមានបានថា ការដែលមានរូបរាងមិនប្រក្រតីដូច្នេះគឺជារឿងល្អមួយសម្រាប់លោក Guo នៅក្នុងវិស័យសម្ដែងភាពយន្តទៅវិញ ព្រោះមានផលិតករជាច្រើនបានចាប់អារម្មណ៍នឹងលោក ហើយហៅលោកទៅដើរតួរងនានាប្លែកៗដូចជា តួមនុស្សឈឺ តួញៀនថ្នាំ តួកំប្លែង និងតួខ្មោចបិសាច ជាដើម។
លោក Guo Hanzhu បានរៀបរាប់ប្រាប់សារព័ត៌មាន HK01 ថា លោកមានបំណងចង់ក្លាយជាតារាសម្ដែងតាំងតែពីនៅរៀនថ្នាក់អនុវិទ្យាល័យមកម៉្លេះ។ ម៉្លោះហើយទើបលោកប្ដេជ្ញាសម្រេចគោលបំណងនេះឲ្យបាន ដោយត្រូវតមអាហារថែរក្សារាង។ យ៉ាងណាមិញ ការតមអាហារនេះបែរក្លាយជាផលវិបាកចំពោះរាងកាយរបស់លោកទៅវិញ ដែលវាបានបង្កជាបញ្ហាកង្វះខាតអាហារូបត្ថម្ភ និងធ្វើឲ្យលោកកាន់តែស្គមទៅៗ។
ស្ថិតក្នុងសភាពស្គម និងមិនលូតកម្ពស់ដល់វ័យជាង៣០ឆ្នាំនេះ លោក Guo Hanzhu បានជួបប្រទះនឹងបញ្ហាជាច្រើនក្នុងជីវិត។ លោកតែងចាញ់អាកាសធាតុមិនថាក្ដៅ ឬរងា ហើយឧស្សាហ៍រមួលក្រពើ និងកោសខ្យល់ថែមទៀតផង។ "នៅពេលខ្ញុំនិយាយម្ដងៗ ខ្ញុំតែងដកដង្ហើមមិនសូវដល់គ្នា ហើយត្រូវប្រឹងដកដង្ហើមឲ្យខ្លាំងៗ...ក្រោយថតកុន១ថ្ងៃ ខ្ញុំត្រូវឈប់សម្រាក១ឬក៏២ថ្ងៃ ដើម្បីសម្រាកយកកម្លាំង" នេះជាការលើកឡើងរបស់ Guo។ លោកបានបន្តទៀតថា សម្រាប់ការជ្រើសរើសសម្លៀកបំពាក់វិញ លោកមិនហ៊ានរើសឈុតណាដែលមានពណ៌ស្រស់ៗពេកទេ ព្រោះខ្លាចគេច្រឡំថាជាកូនក្មេង។
ថ្វីត្បិតមានរូបរាងបែបនេះក្ដី លោក Guo មិនដែលបង្ហាញពីភាពអវិជ្ជមានចំពោះជីវិតឡើយ។ ផ្ទុយទៅវិញ លោកបាននិយាយថា កម្លាំងផ្លូវចិត្តគឺជាការកំណត់ពិតថាយើងជានរណាឲ្យប្រាកដ។
យោងតាម HK01 បានឲ្យដឹងថា លក្ខណៈពិសេសរបស់ Guo បានជួយឲ្យលោកទទួលបានឱកាសសម្ដែងពិសេសៗជាច្រើន។ មួយវិញទៀត សូម្បីតែផលិតករបរទេសមួយចំនួនក៏បានអញ្ជើញលោក Guo ឲ្យទៅផ្ដល់បទសម្ភាសន៍ពីបទពិសោធន៍ជីវិតផងដែរ៕