រឿងរ៉ាវពិតអំពីស្ត្រីជប៉ុនម្នាក់ រស់នៅជាមួយក្រុមបុរស ៣១នាក់ លើកោះដាច់ស្រយាល!

2021-01-13 22:33:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មានរឿងរ៉ាវជាច្រើនដែលបានកើតឡើងនៅក្នុងសម័យសង្គ្រាមលោកលើកទី២ ហើយក្នុងនោះមានរឿងល្បីមួយជាប់ពាក់ព័ន្ធនឹងជីវិតរបស់ស្ត្រីជនជាតិជប៉ុនមួយរូប ដែលបានរស់នៅលើកោះដាច់ស្រយាលមួយកន្លែងជាមួយវត្តមានបុរសៗចំនួន ៣១នាក់ផ្សេងទៀត។ ដោយសារតែនាងជានារីភេទតែម្នាក់គត់នៅលើកោះក្នុងចំណោមក្រុមបុរសជាច្រើនបែបនេះ គ្រប់គ្នាបានចាត់ប្រដូចនាងទៅនឹងព្រះនាងម្ចាស់ និងជាស្រីស្អាតបំផុតក្នុងលោក។

កោះ Anatahan

រឿងរ៉ាវប្លែកនេះកើតឡើងនៅអំឡុងសង្គ្រាមលោកលើកទី២ ស្ថិតនៅលើកោះមួយឈ្មោះថា Anatahan ដែលជាកោះទីទៃពីគេមួយនៅក្នុងមហាសមុទ្រប៉ាស៊ីហ្វិចជាមួយផ្ទៃក្រឡាដីត្រឹម ៣៣គីឡូម៉ែត្រការ៉េ។ ស្ត្រីជប៉ុនរូបនោះមានឈ្មោះពេញថា Kazuko Higa។

នៅក្នុងប្រវត្តិសាស្ត្រ កោះនេះត្រូវបានប្រទះឃើញនិងទៅដល់ដំបូងគេដោយអ្នកផ្សព្វផ្សាយសាសនាអេស្ប៉ាញមួយរូបនៅក្នុងឆ្នាំ១៨៦៨។ បុរសអេស្ប៉ាញរូបនោះបាននាំជនជាតិដើមភាគតិចចេញពីកោះ Anatahan ទាំងអស់ ហើយលោកបានចាប់ផ្ដើមធ្វើចម្ការដាំផ្លែដូង ដែលមានសមត្ថភាពប្រមូលផលបាន ១២៥តោនក្នុង១ឆ្នាំៗ។ បន្ទាប់មកនៅក្នុងឆ្នាំ១៨៩៩ អេស្ប៉ាញបានលក់កោះនេះឲ្យទៅអាល្លឺម៉ង់ ក្រោយមកក៏មានការលក់បន្តឲ្យទៅជប៉ុន ក្រោយចប់សង្គ្រាមលោកលើកទី១។

ជប៉ុនបានកែលម្អកោះនេះឡើងវិញ ហើយក៏បញ្ជូនបុរសម្នាក់ឈ្មោះ Kikuichiro Higa ឲ្យទៅគ្រប់គ្រងកោះ។ នៅលើកោះ លោក Kikuichiro Higa មានកម្មករផ្នែកកសិកម្មបម្រើការចំនួន ៤៥នាក់។ ក្រោយមកៗទៀត លោកក៏បានអញ្ជើញបុរសម្នាក់ឈ្មោះ Shoichi Higa មកជួយការងារនៅលើកោះ។ លោក Shoichi Higa ក៏បាននាំភរិយាវ័យក្មេងរបស់លោកគឺ Kazuko Higa ទៅរស់នៅលើកោះជាមួយគ្នាផងដែរ។

នៅពេលសង្គ្រាមលោកលើកទី២ផ្ទុះឡើង កោះ Anatahan មិនបានទទួលរងផលប៉ះពាល់ពីការវាយប្រហារអ្វីឡើយ។

យ៉ាងណាមិញ លោក Shoichi Higa បានកើតក្ដីបារម្ភជាខ្លាំងចំពោះប្អូនស្រីរបស់លោក ដែលរស់នៅលើកោះមួយផ្សេងទៀត (កោះនោះជាកោះរបស់អេស្ប៉ាញ)។ លោក Shoichi Higa ក៏សម្រេចចាកចេញពីកោះ Anatahan ទៅស្វែងរកប្អូនស្រី។ ដោយឡែក ក្រុមកម្មករក៏គេតម្រូវឲ្យចាកចេញទៅកាន់ប្រទេសជប៉ុនវិញផងដែរ។

ចំណែកនាង Kazuko មិនបានចាកចេញពីកោះទេ ដោយនាងនៅរង់ចាំប្ដីរបស់នាងវិលត្រឡប់មកវិញ។ ប៉ុន្តែចាំអស់រយៈពេលជាច្រើនខែ ប្ដីរបស់នាងគឺលោក Shoichi មិនបានវិលត្រឡប់វិញឡើយ ពោលគឺបាត់ដំណឹងសូន្យឈឹង។ ព្រោះគិតថាប្ដីស្លាប់ នាង Kazuko ក៏រៀបការធ្វើជាប្រពន្ធរបស់លោក Kikuichiro ដែលជាថៅកែ និងជាបងប្អូនល្អរបស់លោក Shoichi។

មិនយូរប៉ុន្មាន ក៏កើតមានការទម្លាក់គ្រាប់បែកវាយប្រហារកោះ Anatahan នាង Kazuko និងប្ដីថ្មីលោក Kikuichiro ក៏បានរត់ចូលក្នុងព្រៃដើម្បីលាក់ខ្លួន។

ថ្ងៃមួយនៅក្នុងខែមិថុនា ឆ្នាំ១៩៤៤ កងកម្លាំងអាមេរិកបានបាញ់កម្ទេចនាវាចម្បាំងជប៉ុន៣គ្រឿង ដែលនៅក្បែរកោះ Anatahan។ ទាហានជប៉ុន ៣១នាក់នៅរស់រានមានជីវិត ហើយក៏ហែលទៅកាន់កោះ Anatahan។ ប្ដីប្រពន្ធ Kazuko ក៏បានជួយសង្គ្រោះក្រុមទាហានទាំងនោះ។ ពួកគេបានព្យាយាមរស់នៅដោយពឹងផ្អែកលើរបស់របរដែលសេសសល់ពីនាវាចម្បាំង។

ក្នុងខែសីហា ឆ្នាំ១៩៤៥ សង្គ្រាមលោកលើកទី២ក៏បានបញ្ចប់។ រដ្ឋាភិបាលជប៉ុនបានផ្ញើលិខិតទៅកាន់កោះ Anatahan ប្រាប់ពីការបញ្ចប់សង្គ្រាម ប៉ុន្តែអ្នកនៅលើកោះមិនបានជឿទេ ហើយសម្រេចចិត្តបន្តរស់នៅលើកោះដដែល។

ជីវិតលើកោះ Anatahan មានភាពប្រក្រតីធម្មតា រហូតដល់មានថ្ងៃមួយនៅក្នុងឆ្នាំ១៩៤៦ លោក Kikuichiro បានធ្លាក់ខ្លួនឈឺធ្ងន់ និងបានស្លាប់ចោលប្រពន្ធបាត់ទៅ។ ត្រង់ចំណុចនេះហើយទើបបញ្ហាចាប់ផ្ដើមកើតមាន។ នាង Kazuko គឺស្ត្រីម្នាក់គត់នៅលើកោះ។ ទោះសម្រស់នាងមិនសូវជាស្អាតខ្លាំង ប៉ុន្តែសម្រាប់អ្នកនៅលើកោះ ដែលសុទ្ធតែជាប្រុសៗនោះ នាង Kazuko ប្រៀបបានដូចជាព្រះនាងម្ចាស់ដ៏សោភាដាច់គេអ៊ីចឹង។

គ្រប់គ្នានៅលើកោះ ចង់បាន Kazuko មកធ្វើជាស្រីកំណាន់របស់ខ្លួន។ បែបនេះហើយពួកគេក៏ចាប់ផ្ដើមមានជម្លោះនឹងគ្នា។ ដើម្បីដោះស្រាយបញ្ហា បុរសម្នាក់ឈ្មោះ Ishida ដែលជាមេបញ្ជាការមានឋានៈខ្ពស់ជាងគេ ក៏បានផ្គូរផ្គង់ឲ្យបុរសម្នាក់រៀបការជាមួយ Kazuko។ រៀបការមិនទាន់ដឹងអីផង ស្រាប់តែប្ដីថ្មីរបស់ Kazuko ត្រូវគេប្រទះឃើញលង់ទឹកស្លាប់។

Kazuko បានបន្តរៀបការជាមួយបុរសចំនួន ៤នាក់ផ្សេងទៀត។ ប៉ុន្តែបុរសទាំង៤នាក់នោះក៏ត្រូវគេសម្លាប់ផងដែរ។ ការកាប់សម្លាប់បន្តកើតមានមិនចេះចប់ រហូតដល់មានមនុស្ស ១១នាក់បានស្លាប់។ ឃាតកដែលសម្លាប់មនុស្សម្នាលើកោះ ត្រូវគេសង្ស័យថាជាបុរសម្នាក់ ដែលកើតក្ដីឈឺចាប់ ព្រោះមិនបានរៀបការជាមួយ Kazuko។

នាង Kazuko ចាប់ផ្ដើមភ័យខ្លាច ព្រោះអំពើឃាតកម្មដែលបានកើតឡើង។ នាងក៏សម្រេចចិត្តរត់ចេញពីកោះ ហើយត្រូវបានជួយសង្គ្រោះដោយក្រុមយោធាអាមេរិក។

Kazuko បានទៅដល់ទឹកដីជប៉ុនវិញ ក្រោយធ្វើដំណើរតាមទូកអស់រយៈពេល៣ទៅ៤សប្ដាហ៍។ តាំងពីនោះមក នាង Kazuko Higa ក៏ចាប់ផ្ដើមល្បីល្បាញ ដោយសារតែរឿងរ៉ាវជីវិតនៅលើកោះ។

ពេលទៅដល់ខេត្ត Okinawa ដែលជាកន្លែងកំណើត នាង Kazuko បានភ្ញាក់ផ្អើលជាខ្លាំងមែនទែន នៅពេលនាងបានជួបប្ដីដើមរបស់នាងវិញគឺលោក Shoichi ដែលនៅមានជីវិត។ លោក Shoichi បាននិយាយប្រាប់ថា ព្រោះសង្គ្រាមទើបលោកមិនអាចទៅកោះ Anatahan ទៅយកប្រពន្ធមកវិញបាន។ ចុងក្រោយ អ្នកទាំងពីរក៏ចាប់ដៃគ្នាកសាងគ្រួសារជាថ្មីម្ដងទៀត។

ងាកមកនិយាយអ្នកលើកោះវិញ ពួកគេនៅមានគ្នាចំនួន ២០នាក់ ហើយបន្តរស់នៅទីនោះរយៈពេល១ឆ្នាំក្រោយការចាកចេញរបស់ Kazuko។ ពួកគេនៅតែមិនជឿថាសង្គ្រាមបានបញ្ចប់ ទាល់តែខាងយោធាអាមេរិកបានផ្ញើរូបថតសាច់ញាត្តិរបស់ពួកគេឲ្យឃើញទើបពួកគេដឹងច្បាស់ថាសង្គ្រាមពិតជាចប់ប្រាកដមែន ហើយចាកចេញពីកោះទៅជប៉ុនវិញ។

ក្រោយត្រឡប់មកវិញ ទាហានជប៉ុនទាំង២០នាក់មិនសូវជាសំណាងប៉ុន្មានទេ ព្រោះមានរឿងរ៉ាវជាច្រើនបានកើតឡើងនៅអំឡុងអវត្តមានរបស់ពួកគេ។ មួយក្នុងនោះគឺមានប្រពន្ធអ្នកខ្លះបានរៀបការជាមួយប្ដីថ្មី ព្រោះគិតថាប្ដីរបស់ខ្លួនបានស្លាប់ទៅហើយ៕