យក​ព្រិល​ទៅ​ធ្វើ​ទឹកកក​ឈូស​ញ៉ាំ ប៉ះពាល់​សុខភាព​អត់?

  • 2021-01-18 23:12:29
  • ចំនួនមតិ 0 | ចំនួនចែករំលែក 15

ចន្លោះមិនឃើញ


ធ្លាប់​នឹក​ស្រមៃ​ទេ​ថា បើ​មាន​​​​ព្រិល​​ធ្លាក់ អ្នក​​នឹង​​យក​​វា​ទៅ​ធ្វើ​ជា​​ទឹកកក​ឈូស​​ និង​ការ៉េម​ញ៉ាំ​លេង? យ៉ាង​ណា​មិញ អ្នក​ក៏​ប្រហែល​ជា​ធ្លាប់​​​លួច​​​គិត​ផង​ដែរ​ថា តើ​ការ​ធ្វើ​ដូច្នេះ​​មាន​​គ្រោះថ្នាក់​​ដែរ​ឬ​អត់? ជាទូទៅ ការ​ញ៉ាំ​ ឬ​យក​ព្រិល​មក​ផឹក មិន​បង្ក​ជា​គ្រោះថ្នាក់​​អ្វី​ឡើយ​ចំពោះ​សុខភាព លើក​លែង​តែ​កត្តា​មួយ​ចំនួន​ប៉ុណ្ណោះ។

ព្រិល​គឺ​ជា​ប្រភេទ​ទឹក​ដែល​​កក​​នៅ​ក្នុង​ស្រទាប់​បរិយាកាស​លើ​មេឃ។ ហេតុ​ដូច្នេះ​ហើយ​វា​មាន​ភាព​បរិសុទ្ធ​ជាង​ប្រភេទ​ទឹក​​ភ្លៀង​​ភាគ​ច្រើន​ ហើយ​ជួន​កាល​អាច​ល្អ​ជាង​ទឹក​​នៅ​ក្បាល​​ម៉ាស៊ីន​រ៉ូប៊ីណេ​ទៀត​ផង​ក៏​ថា​បាន។ អ្នក​និយម​បោះតង់​តាម​ព្រៃ ឬ​អ្នក​ឡើង​​ភ្នំ​នៅ​ជុំវិញ​ពិភពលោក បាន​ប្រើប្រាស់​​ព្រិល​​ជា​ប្រភព​ទឹក​ផឹក​របស់​ពួក​គេ ដោយ​​​​មិន​ទទួល​នូវ​ផល​ប៉ះពាល់​​អ្វី​នោះ​ទេ។ ចំណែក​អ្នក​នៅ​ទីក្រុង​ ឬ​ទី​ប្រជុំជន​វិញ ក៏​អាច​​យក​ព្រិល​មក​ប្រើប្រាស់​ជា​ទឹក​ផឹក ឬ​​បង្អែម​បរិភោគ​​បាន​ដូចគ្នា ប៉ុន្តែ​ត្រូវ​ចេះ​សង្កេត​ពី​បញ្ហា​មួយ​ចំនួន​ជា​មុន​សិន។

ជា​ចម្បង​គឺ​អ្នក​​មិន​ត្រូវ​យក​ព្រិល​ដែល​ទើប​ធ្លាក់​​ភ្លាមៗ​មក​ទទួល​ទាន​នោះ​ឡើយ ព្រោះ​មុន​ធ្លាក់​មក​ដី ព្រិល​​បាន​ធ្លាក់​ចូល​ក្នុង​ស្រទាប់​ខ្យល់​ដែល​មាន​លាយ​ឡំ​ជាមួយ​សារធាតុ​ដី និង​គីមី​មួយ​ចំនួន។ ដូច្នេះ​ហើយ​ត្រូវ​រង់ចាំ​​​ប៉ុន្មាន​ម៉ោង​សិន​ទម្រាំ​សារធាតុ​ដី និង​គីមី​ទាំង​នោះ​​រលាយ​អស់​ទៅ​តាម​ព្រិល​ដែល​ទើប​ធ្លាក់​ភ្លាមៗ។ បញ្ហា​មួយ​ទៀត​ដែល​គួរ​ដឹង​នោះ​គឺ​កន្លែង​ដែល​​អ្នក​យក​ព្រិល​មក​ញ៉ាំ។ គប្បី​រើស​យក​កន្លែង​ណា​ដែល​មាន​អនាម័យ ហើយ​ជៀសវាង​​រើស​ព្រិល​ពី​កន្លែង​ដែល​នៅ​ក្បែរ​ទីតាំង​កង្វក់​មិន​ស្អាត​ដូចជា គំនរ​សំរាម ភ្នំភ្លើង ផ្លូវ​សាធារណៈ ឬ​រោងចក្រ​គីមី ជា​ដើម។

រឿង​មួយ​ទៀត​ដ៏​សំខាន់​មិន​គួរ​រំលង​នោះ​គឺ​ពណ៌​របស់​ព្រិល។ បើ​ព្រិល​មាន​ពណ៌ ស ក្បុស​ល្អ អ្នក​អាច​ញ៉ាំ​វា​ដោយ​គ្មាន​បញ្ហា។ ប៉ុន្តែ​បើ​ខុស​ពី​ពណ៌ ស ដាច់​ខាត​មិន​ត្រូវ​បរិភោគ​សោះ​ឡើយ។ ជា​ឧទាហរណ៍ ព្រិល​ពណ៌​លឿង បង្ហាញ​ថា ព្រិល​​ទទួល​រង​នូវ​ការ​ខូច​គុណភាព ជា​ពិសេស​ដោយ​សារ​ទឹក​នោម។ ចំណែក​បើ​មាន​ពណ៌​ក្រហម ឬ​បៃតង បង្ហាញ​ថា ក្នុង​ព្រិល​មាន​សារធាតុ​ស្លែ ឬ​សារ៉ាយ មិន​ល្អ​ចំពោះ​សុខភាព​ទេ។ ពណ៌​ដែល​គួរ​ប្រុង​ប្រយ័ត្ន​ផ្សេងៗ​ទៀត​មាន​ដូចជា ខ្មៅ ត្នោត និង​ប្រផេះ ព្រោះ​សុទ្ធ​តែ​មាន​សារធាតុ​កង្វក់​​ជា​ច្រើន​ខុសៗ​គ្នា៕

ប្រភព៖ Thought Co ប្រែ​សម្រួល៖ ឈាង.

;