លទ្ធផលសង់ផ្លូវកាត់ពីបាត់ដំបង ទៅកោះកុង បន្ទាប់ពីបើកការដ្ឋានជិតមួយឆ្នាំ
- 2021-01-26 01:42:24
- ចំនួនមតិ 0 | ចំនួនចែករំលែក 0
លទ្ធផលសង់ផ្លូវកាត់ពីបាត់ដំបង ទៅកោះកុង បន្ទាប់ពីបើកការដ្ឋានជិតមួយឆ្នាំ
ចន្លោះមិនឃើញ
ផ្លូវជាតិលេខ១០ ដែលតភ្ជាប់ពីសំឡូតខេត្តបាត់ដំបង អូសោម ខេត្តពោធិ៍សាត់ ដល់ខេត្តកោះកុង ប្រវែងជិត ១៩៨គីឡូម៉ែត្រ សម្រេចការសាងសង់បាន ៤៣,៧៥ភាគរយហើយ គិតត្រឹមខែធ្នូ ឆ្នាំ២០២០។ នេះបើតាមការចុះផ្សាយរបស់ក្រសួងសាធារណការ និងដឹកជញ្ជូន កាលពីថ្ងៃទី២៥ ខែមករា ឆ្នាំ២០២១។
កាលពីថ្ងៃទី២៤មករា លោក បុង ប៊ុនហួន រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំក្រុមការងារ បច្ចេកទេសចុះត្រួតពិនិត្យផ្លូវជាតិលេខ១០ ដោយមានការសហការចូលរួមពីរដ្ឋមន្ត្រីក្រសួងបរិស្ថាន និងគ្រប់ផ្នែកពាក់ព័ន្ធផងដែរ។
ការចុះពិនិត្យផ្លូវជាតិនេះ គឺក្នុងគោលបំណង តាមដានវឌ្ឍនភាពសាងសង់ និងដើម្បីធានាបានគុណភាពក្នុងការអនុវត្តស្របតាមស្តង់ដារបច្ចេកទេសត្រឹមត្រូវ និងប្រសិទ្ធភាពកិច្ចការងារត្រូវតាមផែនការ ដោយត្រូវធ្វើបែបណាក្លាយជាផ្លូវដែលផ្តល់អត្ថប្រយោជន៍ក្នុងការដឹកជញ្ជូនឆ្លងកាត់ និងរក្សាអេកូទេសចរណ៍ធម្មជាតិតំបន់ ជាកត្តាអាចទាក់ទាញភ្ញៀវអ្នកដែលចូលចិត្តធ្វើដំណើរកម្សាន្តអាចគយគន់ធម្មជាតិនៅតំបន់ទាំងនោះបានផងដែរ។
លោកបានក្រេីនរំឭកដល់ក្រុមហ៊ុនសាងសង់ CRBC និងក្រុមហ៊ុនទីប្រឹក្សាបច្ចេកទេស WACC បន្តយកចិត្តទុកដាក់លើកិច្ចការងារសាងសង់ឱ្យមានប្រសិទ្ធភាព និងស្របតាមស្តង់ដារបច្ចេកទេសត្រឹមត្រូវ។
សូមជម្រាបថា ផ្លូវជាតិលេខ១០ ត្រូវបានបើកការដ្ឋានសាងសង់ក្រោមអធិបតីភាពសម្តេច ហ៊ុន សែន កាលពីថ្ងៃទី៩ ខែមីនា ឆ្នាំ២០២០។ ផ្លូវនេះគ្រោងចំណាយប្រមាណជាង ១៨៨លានដុល្លារ ជាហិរញ្ញប្បទានរបស់ប្រទេសចិន និងថវិកាបដិភាគរបស់រាជរដ្ឋាភិបាលកម្ពុជា៕
ប្រភព៖ ក្រសួងសាធារណការ និងដឹកជញ្ជូន