គ្រួសារហ្វេនតូចកម្សត់របស់ Messi៖ "យើងគួរតែស្គាល់ Ronaldo ល្អប្រសើរជាង"

2021-01-31 23:03:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

Murataza Ahmadi គឺជាក្មេងសញ្ជាតិអាហ្វហ្គានីស្ថាន១រូប ដែលទទួលបានចំណាប់អារម្មណ៍យ៉ាងខ្លាំងពីពិភពលោកទាំងមូលកាលពីកំឡុងឆ្នាំ២០១៦ បន្ទាប់ពីបងប្រុសរបស់ក្មេងតូចនេះបានបង្ហោះរូបភាពយ៉ាងកម្សត់នៅលើបណ្ដាញសង្គម បង្ហាញពីការគាំទ្រនៃប្អូនប្រុសដែលមានចំពោះកីឡាករល្បី Lionel Messi។ ក្នុងរូបភាព Murtaza បានពាក់ថង់ប្លាស្ទិក ដែលមានសរសេរហ្វឺតឈ្មោះនិមិត្តរូប Messi។ រាល់គ្នារំពឹងថា ការដែលល្បីដូច្នេះនឹងកែប្រែជីវិតរបស់ក្មេងតូច Murtaza បាន។ ប៉ុន្តែរឿងរ៉ាវបែរផ្ទុយស្រឡះ១៩០ដឺក្រេ ពោលគឺជីវិតក្រុមគ្រួសាររបស់ក្មេងតូច Murtaza បានធ្លាក់ចូលក្នុងរណ្ដៅទុក្ខទៅវិញ។

ក្រោយល្បីពីការបង្ហោះរូបខាងលើ ប៉ុន្មានខែក្រោយមក Murtaza អាចសម្រេចក្ដីស្រមៃរបស់ខ្លួន ដោយនោះគឺជាការជួបផ្ទាល់ជាមួយកីឡាករ Messi បន្ទាប់ការប្រកួតមិត្តភាពមួយនៅប្រទេសកាតារបស់ខ្សែប្រយុទ្ធក្រុម Barcelona។ រូបភាពរបស់ហ្វេនតូចកម្សត់រូបនេះជាមួយអាយដល ក៏ផ្ទុះល្បីសាជាថ្មីម្ដងទៀតនៅលើប្រព័ន្ធបណ្ដាញសង្គម។ នេះមិនជារឿងល្អទេសម្រាប់ Murtaza? "ខុស" ស្រឡះពីការគិតទាំងស្រុងគឺទីនេះហើយជាការទាញទម្លាក់ក្រុមគ្រួសារ Murtaza ឲ្យជួបទុក្ខលំបាក បន្ថែមពីលើជីវភាពដែលកំពុងក្រីក្រ។

ក្រុមគ្រួសារ Murtaza បានរងការគំរាមកំហែងពីក្រុមជ្រុលនិយមតាលីបង់។ "យោធានៅក្នុងតំបន់បានហៅ ហើយនិយាយថា អ្នកឯងក្លាយជាអ្នកមានហើយត្រូវឲ្យលុយទាំងដែលទទួលបានពី Messi មកយើង បើមិនដូច្នោះទេយើងនឹងចាប់កូនប្រុសរបស់អ្នក" នេះជាការថ្លែងរបស់ម្ដាយ Murtaza ដែលមានឈ្មោះថា Shafiqa។

ក្រុមគ្រួសារ Murtaza ធ្លាប់រំពឹងទុកថា ក្រោយជួប Messi នោះពួកគេនឹងទទួលបានការគាំទ្រផ្នែកហិរញ្ញវត្ថុក្នុងរូបភាពណាមួយ ឬក៏អាចមានឱកាសធ្វើអន្តោប្រវេសន៍មករស់នៅអឺរ៉ុប ដូចដែលកីឡាករ Ronaldo ធ្លាប់ធ្វើដាក់ក្មេងប្រុសស៊ីរីម្នាក់ ដោយជួយឲ្យគេមានសិទ្ធិមករស់នៅអេស្ប៉ាញបាន។ យ៉ាងណាមិញ ជាការពិត Murtaza មិនទទួលបានលុយសូម្បីតែ១សេនពីកីឡាករ Messi។

ក្រោយរងការគំរាមជាច្រើន ក្រុមគ្រួសារ Murtaza បានសម្រេចរើផ្ទះចេញពីខេត្ត ដែលជាកន្លែងកំណើតទៅរស់នៅក្នុងរដ្ឋធានី Kabul ជាមួយបងប្អូនទីនោះ។ លំនៅថ្មីរបស់ Murtaza ពិតជាបង្កផលវិបាកជាខ្លាំងសម្រាប់ក្មេងប្រុសតូច ដែលចូលចិត្តវិស័យបាល់ទាត់យ៉ាងខ្លាំងរូបនេះ។ Murtaza មិនអាចចេញក្រៅ ហើយរាប់មិត្ត និងជាពិសេសគឺមិនអាចលេងបាល់ ព្រោះនៅ Kabul មិនសុវត្ថិភាពទេ និងសម្បូរទៅដោយការវាយប្រហារពីក្រុមភេវរករ។

មួយវិញទៀត ទោះនៅកន្លែងថ្មីក៏ដោយ អ្នកផ្ទះរបស់ Murtaza នៅព្រួយបារម្ភពីកូនដដែល ដោយខ្លាចក្រុមតាលីបង់មកតាមចាប់ Murtaza។ អ្នកស្រី Shafiqa បាននិយាយថា "ពួកគេប្រាប់ថា ប្រសិនបើពួកគេចាប់គាត់បាន (Murtaza) ពួកគេនឹងកាប់ជាចំណែកតូចៗ"។

ត្បិតអីមានបញ្ហាបានកើតឡើងច្រើនចំពោះជីវិត តែក្មេងតូច Murtaza នៅតែអះអាងប្រាប់គេឯងថា ខ្លួននៅតែស្រឡាញ់ពេញចិត្តពេញថ្លើមខ្លាំងចំពោះ Messi។ ពេលត្រូវអ្នកសារព័ត៌មានសួរថា បើដឹងរឿងរ៉ាវមុនដូច្នេះ តើឯងនៅពាក់អាវគាំទ្រ Messi ទៀតទេ? Murtaza ឆ្លើយថា "ខ្ញុំនឹងនៅតែពាក់វា ព្រោះខ្ញុំស្រឡាញ់ Messi"៕

ប្រភព៖ La Opinion ប្រែសម្រួល៖ ឈាង.