សម្តេច​នាយករដ្ឋមន្រ្តី​ ហ៊ុន សែន បាន​បញ្ជាក់​ថា ឥណ្ឌាមានសកម្មភាពនយោបាយ​មកទិសខាងកើត កូរ៉េខាងត្បូង មាននយោបាយមកទិសខាងត្បូង ចំណែកកម្ពុជាគឺ​មាន​គោលនយោបាយគ្រប់ទិសទី និង​ជុំវិញខ្លួន។

ក្នុងពិធីបើកការដ្ឋាន​សាងសង់រោងចក្រប្រព្រឹត្តកម្មទឹកស្អាតបាក់ខែង និងប្រកាសសម្ពោធដាក់ឱ្យដំណើរការផ្លូវការរោងចក្រប្រព្រឹត្តកម្មទឹកស្អាតចំការមន កាលពីព្រឹកថ្ងៃទី១ ខែកុម្ភៈ ឆ្នាំ​២០២១ សម្តេចតេជោ លើកឡើង​យ៉ាងដូច្នេះថា៖

«ខ្ញុំ​ក៏សូមអំពាវនាវចំពោះសហភាពអឺរ៉ុបដែរ បើមានលទ្ធភាពជួយដល់កម្ពុជា (វ៉ាក់សាំង) យើងខ្ញុំអរគុណ។ រាប់ទាំងលោកជំទាវអគ្គរដ្ឋទូតបារាំង ប្រាប់ទៅឯកឧត្តមប្រធានាធិបតីម៉ាក្រុងថា កម្ពុជាក៏ត្រូវការជំនួយដ៏សប្បុរសពីសាធារណរដ្ឋបារាំងដែរ។ កុំមើលឃើញថាកម្ពុជាត្រូវការតែចិននោះ ត្រូវការទាំងអស់ហ្នឹង។ កម្ពុជាមើលគ្រប់ជ្រុងទាំងអស់ បាន​សេចក្តីថាមើលជុំវិញខ្លួន មិនមែនមើលតែទិសណាមួយទេ។ ឥណ្ឌាមាន​នយោបាយសំឡឹងមកទិសខាងកើត បន្ទាប់មកជំនាន់នាយករដ្ឋមន្រ្តីមូឌី ប្រើពាក្យថា សកម្មភាព​មកទិសខាងកើត។ ប្រធានាធិបតីកូរ៉េខាងត្បូង ម៉ូន ចេអ៊ីន ប្រើពាក្យថា សកម្មភាពមកទិសខាងត្បូង។ ឯសម្រាប់ខ្ញុំ សកម្មភាពជុំវិញខ្លួន មើលគ្រប់ទិស។ នេះជាគោលនយោបាយការបរទេសរបស់យើង»៕