​កូរ៉េខាងត្បូង កំពុង​ចរចា​ជាមួយ​យោធាមីយ៉ានម៉ា ក្រោយ​រកឃើញ​បំណែក​យន្តហោះ

  • 2021-02-18 09:15:07
  • ចំនួនមតិ 0 | ចំនួនចែករំលែក 0

ចន្លោះមិនឃើញ


រដ្ឋាភិបាល​កូរ៉េខាងត្បូង កំពុងធ្វើការ​ចរចាជាមួយ​យោធា​មីយ៉ាន់ម៉ា អំពី​លទ្ធភាព​នៃការ​បញ្ជូនក្រុម​ស្រាវជ្រាវ​ទៅស៊ើបអង្កេត​បំណែក​យន្តហោះ​មួយ​ដែល​បាន​រកឃើញ​ក្នុងសមុទ្រ​មីយ៉ាន់ម៉ា ដោយ​សង្ស័យថា ជាបំណែក​នៃ​យន្តហោះកូរ៉េមួយគ្រឿង​ដែល​បាន​ធ្លាក់​កាលពីឆ្នាំ​១៩៨៧។ នេះបើតាម​ការបញ្ជាក់​របស់​លោក Chung Eui-yong រដ្ឋមន្រ្តី​ការបរទេស​កូរ៉េខាងត្បូង ក្នុងកិច្ច​ប្រជុំ​សភា​នៅថ្ងៃទី​១៨ ខែកុម្ភៈ ឆ្នាំ​២០២១។

វាអាច​ជាបំណែក​នៃជើងហោះហើរលេខ ៨៥៨ របស់​ក្រុមហ៊ុនអាកាសចរណ៍ Korean Airlines ដែល​ផ្ទុះ​ឆេះនៅលើអាកាស​ក្នុងអំឡុងធ្វើដំណើរពីក្រុងបាដាត ទៅកាន់​ក្រុងសេអ៊ូល ហើយ​បានបាត់ខ្លួន​នៅលើមហាសមុទ្រ​ឥណ្ឌា កាលពីថ្ងៃទី២៩ ខែវិច្ឆិកា ឆ្នាំ​១៩៨៧។ ឧបទ្ទវហេតុ​នេះ បាន​បណ្តាលឱ្យ​មនុស្ស​នៅលើយន្តហោះ​ប្រមាណ ១១៥នាក់​ ស្លាប់ទាំងអស់។

អាជ្ញាធរកូរ៉េ​ខាងត្បូង​កាលពីពេលនោះ បាន​សន្និដ្ឋាន​ថា ការផ្ទុះយន្តហោះ​នេះ បង្កឡើង​ដោយ​ការបង្កប់គ្រាប់​បែក​ក្នុងយន្តហោះ​របស់​ភ្នាក់ងារសម្ងាត់​កូរ៉េខាងត្បូង។

​ការចរចារវាង​ប្រទេស​ទាំងពីរ​ធ្វើឡើង​ ក្រោយ​ប្រព័ន្ធផ្សព្វផ្សាយ​មួយបានរាយការណ៍​នៅដើមឆ្នាំ២០២១ថា បំណែកយន្តហោះនេះត្រូវបាន​រកឃើញ​ក្នុងសមុទ្រ​ Andaman នៃប្រទេសមីយ៉ាន់ម៉ា។

លោករដ្ឋមន្រ្តី​និយាយថា៖ «យើង​កំពុងពិភាក្សា​ជាមួយ​ភាគី​មីយ៉ាន់ម៉ា ដើម្បី​បញ្ជូន​ក្រុមស្រាវជ្រាវ​របស់​រដ្ឋាភិបាលទៅទីនោះ អាច​ធ្វើឡើង​នៅដើមខែមីនាខាងមុខ»។

គួរ​រំលឹក​ថា ដំបូងឡើយ​ប្រទេសទាំងពីរ​ព្រមព្រៀងគ្នា​ក្នុងការបញ្ជូន​ក្រុមស្រាវជ្រាវនេះទៅហើយ ប៉ុន្តែក្រោយ​មានការធ្វើរដ្ឋប្រហារ​របស់​យោធាមីយ៉ាន់ម៉ា ធ្វើឱ្យ​រឿងនេះ​ត្រូវចរចាជាថ្មី។

លោក Chung ថា «យើងបាន​ព្រមព្រៀងជាមួយ​រដ្ឋាភិបាលមីយ៉ាន់ម៉ា ក្រោមការដឹកនាំរបស់​លោកស្រី ស៊ូជី រួចហើយ តែដោយសារស្ថានភាព​ផ្លាស់ប្តូរ ដូច្នេះយើងត្រូវតែពិភាក្សា​ជាមួយអ្នកកាន់អំណាចថ្មី»៕

ប្រភព៖ Yonhapnews

អត្ថបទថ្មី
;